استانا. 12 اقپان. مۇناي باعاسى وسىلايشا تومەندەي بەرەتىن بولسا, تەڭگە باعامىندا بىرتىندەپ وزگەرىستەر بولادى دەگەن بولجام بار. بۇل تۋرالى ۇلتتىق بانك توراعاسى قايرات كەلىمبەتوۆتىڭ سوزىنە سىلتەمە جاساعان Tengrinews.kz ءتىلشىسى حابارلادى.
«ەگەر مۇناي باعاسى 50 دوللاردان تومەن تۇسسە, جاعىمسىزداۋ ستسەناريلەردى جۇزەگە اسىرامىز. ونداي جاعدايدا تەڭگەنى اۋىستىرۋ باعامىندا بىرقالىپتى وزگەرىس بولادى دەگەن بولجام بار. بۇل جەردەگى اڭگىمە ايىرباس باعامى ءدالىزىنىڭ كەڭەيۋى ارقىلى مۇناي باعاسىنىڭ تومەندەۋى مەن جىلدىق ورتاشا باعا تۋرالى ايتىلىپ وتىر», - دەپ ءتۇسىندىردى بانك توراعاسى ورتالىق كوممۋنيكاتسيالار قىزمەتىندە وتكەن بريفينگتە.
الايدا, ءدال بۇگىن ونداي الاڭداۋشىلىققا نەگىز جوق. «قازىرگى تاڭدا مۇنىڭ العىشارتتارى بايقالمايدى. ماكروەكونوميكالىق كورسەتكىشتەر بۇعان نەگىز بەرمەيدى. سونىمەن قاتار, قازىرگى ءدالىز ءبىزدىڭ ءدال سول جەردە بولۋىمىزعا مۇمكىندىك بەرىپ وتىر - دوللار 185 تەڭگە تۇرادى», - دەدى كەلىمبەتوۆ.
ايتا كەتەيىك, 11 اقپان كۇنى اقوردادا وتكەن ۇكىمەتتىڭ كەڭەيتىلگەن وتىرىسىنان كەيىن قايرات كەلىمبەتوۆ قازاقستاندا ءبىر ساتتىك دەۆالۆاتسيا بولمايدى دەپ مالىمدەگەن ەدى.
ۇكىمەتتىڭ كەڭەيتىلگەن وتىرىسىندا قازاقستان پرەزيدەنتى نۇرسۇلتان نازارباەۆ قازاقستاندىقتاردى تەڭگە باعامىنىڭ وزگەرىسى تۋرالى قاۋەسەتتەرگە سەنبەۋگە شاقىردى. «بۇگىن ۇلتتىق بانكتىڭ توراعاسى بۇل ماسەلەلەردى شەشۋ ءۇشىن بارلىق شارالار جاسالىپ جاتقانىن باياندادى. وعان سەنبەۋگە نەگىز جوق», - دەدى مەملەكەت باسشىسى.
ساكەن مايلىباي.
دەرەك, فوتو: Tengrinews.kz.