ورتاق وتان توعىستىرعان قۇندىلىقتار

ديلفۋزا بايراقتاروۆا – قىزىلوردا وبلىسى, قارماقشى اۋدانى, ءىىى ينتەرنوتسيونال اۋىلىنىڭ تۇرعىنى, تۇرىك ەتنوسىنىڭ وكىلى

اۋىلىمىز قازاقستاننىڭ كىشكەنتاي مودەلى ىسپەتتى. ويتكەنى اۋىلىمىزدا 11 ەتنوس وكىلدەرى بىرگە تۇرامىز. ءبىر-ءبىرىمىزدىڭ سالت-ءداستۇر, ءتىلىمىز بەن ءدىنىمىزدى جاقسى بىلەمىز, سىيلاسامىز. سول سالت-ءداستۇر, مادەنيەتىمىز ارقىلى ءبىر-بىرىمىزبەن تىعىز بايلانىستامىز. وسى قۇندىلىقتاردى تەرەڭ تۇسىنگەن سايىن قارىم-قاتىناسىمىز دا تەرەڭدەي تۇسەدى. ەلىمىزدىڭ باعا جەتپەس بايلىعى  - حالىقتار اراسىنداعى دوستىق. تاتۋلىقتىڭ بەسىگى دەپ ايتۋعا دا بولادى. ويتكەنى ءاربىر ۇلتقا ءوزىنىڭ سالت-ءداستۇرى مەن مادەنيەتىن, جاڭعىرتۋعا, ءوزىنىڭ انا ءتىلىن, ءدىنىن زەرتتەۋگە, بىلۋگە, ناسيحاتتاۋعا بارلىق جاعداي جاسالعان. مول مۇمكىندىك بەرىلگەن. قازاقستان ۇلتارالىق تۇراقتىلىق پەن كەلىسىمنىڭ ورتالىعى. سوزىمىزگە ءار وبلىس ورتالىعىندا ورنالاسقان دوستىق ۇيلەرى دالەل. بيىل ەلىمىزدە اسسامبلەيانىڭ 30 جىلدىعى تويلانىپ جاتىر. اسسامبلەيانىڭ باستى ءرولى كوپ ۇلتتى ەلىمىزدە بەيبىتشىلىك پەن كەلىسىمدى قولداۋ. ءبىز ەلىمىزدەگى دوستىقتى جوعارى باعالايمىز. قازاقستان حالقى اسسامبلەياسىنىڭ الەمدە انالوگى جوق. ءبىز وسىنى ماقتان تۇتامىز. ءبىرتۇتاس حالىق ورتاق وتان تاعدىرىنا جاۋاپتى ەكەنىمىزدى سەزدىرەدى.

ديلنوزا تادجيمەتوۆا – تۇركىستان وبلىسى, بايدىبەك اۋدانىنىڭ تۇرعىنى, وزبەك ەتنوسىنىڭ وكىلى

قازاقستان - كوپتەگەن ۇلتتار مەن ۇلىستاردىڭ ورتاق شاڭىراعى. ەلىمىزدەگى حالىقتار دوستىعىنىڭ باستى قۇندىلىقتارى - بىرلىك پەن تاتۋلىق, ءوزارا سىيلاستىق پەن ورتاق مۇددە ءۇشىن ىنتىماقتاسا ەڭبەك ەتۋ. ءار ۇلت ءوز ءداستۇرى مەن مادەنيەتىن ساقتاي وتىرىپ, ءبىر-ءبىرىن قۇرمەتتەيدى, بۇل - ءبىزدىڭ باستى بايلىعىمىز.

مەن وزبەك ۇلتىنىڭ وكىلى بولسام دا, قازاق مادەنيەتىن ۇلكەن قۇرمەتپەن قابىلدايمىن. ءوز ۇلتىمنىڭ سالت-ءداستۇرىن ۇمىتپاي, قازاق حالقىنىڭ ءتىلى مەن مادەنيەتىن دە قاستەرلەيمىن. وسىلايشا ەكى مادەنيەتتى ۇيلەستىرە وتىرىپ, ەلىمنىڭ دامۋىنا ءوز ۇلەسىمدى قوسۋعا تىرىسامىن. قازاق مادەنيەتىن مەڭگەرۋدى دومبىرا ۇيرەنۋدەن باستادىم. وسى تالپىنىسىمنىڭ ارقاسىندا قازاق حالقىنىڭ ۇلتتىق ەرەكشەلىكتەرى مەن رۋحاني مۇراسىن بويىما ءسىڭىردىم. ونەرىم ورگە سۇيرەپ, قازىر بايقاۋلاردا باق سىناپ, جۇلدەلى ورىندارعا قول جەتكىزىپ ءجۇرمىن. سوندىقتان تۇرىپ جاتقان ەلىڭنىڭ مادەنيەتىن مەڭگەرۋ جاڭا مۇمكىندىكتەرى جول اشادى. 

ۆەرونيكا كيم – تۇركىستان وبلىسى, شاردارا اۋدانى, قوسسەيىت اۋىلىنىڭ تۇرعىنى, كارىس ەتنوسىنىڭ وكىلى

تاريح تامىرىنا كوز سالساق, قازاق حالقى ءتۇرلى ساياسي سالدارمەن قازاقستانعا تابان تىرەگەن حالىقتاردى ىستىق ىقىلاس, كەڭ قۇشاقپەن قارسى الدى. وسى قۇندى قادام ارقىلى وزگە ەتنوس وكىلدەرىنە جاڭا جەردە تىرشىلىگىن تۇلەتۋگە مۇمكىندىك سىيلاسا, ەكىنشىدەن بەرىك دوستىقتىڭ نەگىزى سول سىن شاقتاردا قالاندى. ءوز كەزەگىندە ءتۇرلى تاعدىرمەن قازاقستانعا قونىس تەپكەندەر سان سالاداعى بار بىلگەن, تۇيگەن تاجىريبەسىن بۇگىپ قالمادى. ماسەلەن مەنىڭ اتام, اكەم «كۇرىش ساۆحوزىندا» ەڭبەك ەتتى. سۋ قويمالارىن سالۋعا ۇلەس قوستى. تۋعان جەرىمىزدەي بولىپ كەتكەن قازاقستان بارشاعا تەڭ قۇقىق پەن جۇمىس ىستەۋ ءۇشىن بىردەي مۇمكىندىك سىيلاپ وتىر. بۇل ءبىز ءۇشىن باستى قۇندىلىقتىڭ ءبىرى. مەملەكەتىمىزدەگى بار ازاماتتىڭ ارمانىن ورىنداۋعا جاعداي جاساپ وتىرعان مەملەكەتتىك ساياساتتى ءاردايىم قولدايمىز. ءبىز دە تاتۋلىعى جاراسقان جەرىمىزدىڭ جەتىستىگىن كوبەيتۋ جولىندا تەر توگۋدەن جالىقپايمىز.

ۆلاديسلاۆ گوريزانوۆ - استانا قالاسىنىڭ تۇرعىنى, ورىس ەتنوسىنىڭ وكىلى

قازاقستاندا 130-دان استام ەتنوس وكىلدەرى تۇرادى. بۇل وزگە ەتنوس پەن قازاق حالقى ءۇشىن ۇلكەن جاۋاپكەرشىلىك. بىرلىك مەرەكەسى قارساڭىندا قوس تاراپ جاۋاپكەرشىلىك جۇگىن تەڭ ارقالاپ كەلە جاتقانىن ايتقىم كەلەدى. بۇل سوزىمە بىلتىر ەلىمىزدىڭ باتىس, سولتۇستىگىن سۋ باسقاندا قازاق حالقىمەن تەڭ كومەككە ۇمتىلعان اسسامبلەيا مۇشەلەرىنىڭ ارەكەتى جارقىن مىسال. حالىقتاردىڭ ورتاق ماقساتقا جۇمىلدىرعان وسى جۇدىرىقتاي جۇمىلۋ, ىنتىماققا ۇمتىلۋ. كوپتەگەن ەتنوستىڭ تەرەزەسى تەڭ تۇرمىس كەشۋى مەملەكەتتىك قولداۋدىڭ ارقاسى دەپ بىلەمىن. 

اڭگىمە اۋانىنان بايقاعانىمىزداي ەلىمىزدەگى ەتنوس وكىلدەرى مەن قازاق حالقىن ءبىر ارمان مەن مۇددەگە جۇمىلدىرىپ تۇرعان - بىرلىك كۇشى. سوندىقتان بىرلىگى مىعىم مەملەكەتىمىزدىڭ قورعانى بۇزىلماسى ءسوزسىز.