بىلتىر ءوندىرىس كەزىندەگى جازاتايىم وقيعادان 1048 جۇمىسكەر زارداپ شەگىپ, 202 ادام قايتىس بولدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ مەملەكەتتىك ەڭبەك ينسپەكتسياسى كوميتەتىنىڭ مالىمەتىنشە, ءوندىرىس ورىندارىنداعى جاراقات الۋ دەرەگى 2023 جىلمەن سالىستىرعاندا 4,5%-عا تومەندەگەن.
ەلىمىزدىڭ وندىرىستىك ايماقتارىندا جۇمىسكەرلەردىڭ جاراقات الۋ وقيعاسى ءجيى تىركەلەدى. ماسەلەن, قاراعاندى وبلىسىندا – 159, شقو-دا – 124, پاۆلودار وبلىسىندا – 112, اباي وبلىسىندا – 101, قوستاناي وبلىسىندا – 91, الماتى قالاسىندا 116 ادام زارداپ شەككەن. تاۋ-كەن مەتاللۋرگيا ونەركاسىبىندە (18,3%), ودان كەيىن قۇرىلىس سالاسىندا (10,1%) جۇمىسكەرلەردىڭ وقىس وقيعاعا ۇشىراۋ فاكتىسى ءجيى. قىزمەتكەرلەردىڭ جۇمىس ۇستىندە ارانداۋىنىڭ باسىم كوپشىلىگى وندىرىستەگى جۇمىستىڭ ءتيىستى دەڭگەيدە ۇيىمداستىرىلماۋى (35,5%), جاپا شەگۋشىنىڭ ورەسكەل قامسىزدىعى (31%), جول قوزعالىسى ەرەجەلەرىنىڭ بۇزىلۋى (8,2%), ەڭبەك قاۋىپسىزدىگى مەن ەڭبەكتى قورعاۋ ەرەجەلەرىن ساقتاماۋدان (7,6%) تۋىنداعان.
بەس جىلدا مەملەكەتتىك ورگاندار مەن جۇمىس بەرۋشىلەردىڭ ەڭبەكتى قورعاۋعا قاتىستى جۇزەگە اسىرعان كەشەندى شارالاردىڭ ناتيجەسىندە ازاماتتاردىڭ وندىرىستە جاراقات الۋ دەڭگەيى 6,3%-عا تومەندەدى. پروفيلاكتيكا مەن بۇزۋشىلىقتى الدىن الۋ ماقساتىندا ەلىمىزدىڭ 3262 كاسىپورنىنا قاۋىپسىزدىك پەن ەڭبەكتى قورعاۋ ستاندارتتارى ەنگىزىلدى. 2019 جىلدان باستاپ مينيسترلىك «نولدىك جاراقات – Vision Zero» تۇجىرىمداماسىن جەتىلدىرۋگە ايرىقشا نازار اۋدارىپ وتىر. بۇل تۇجىرىم 605 كاسىپورىندا ىسكە قوسىلعان.
قۇرىلىس نىساندارىندا باس مەردىگەردىڭ ەڭبەك قاۋىپسىزدىگى ماسەلەلەرى جونىندە بارلىق قوسالقى مەردىگەرلەرگە جاۋاپكەرشىلىك پەن باقىلاۋدى كۇشەيتەتىن ۇلگى ەنگىزۋ قولعا الىنىپ, 318 كاسىپورىندا ىسكە قوسىلدى. جۇمىس بەرۋشىلەرگە ەڭبەكتى قورعاۋ تالاپتارىنىڭ ساقتالۋىن ءوزىن-ءوزى تەكسەرۋدەن وتۋگە مۇمكىندىك بەرەتىن «ونلاين ەڭبەك كونسۋلتانتى» ەلەكتروندىق سەرۆيسى دە بار. سەرۆيستى بۇگىنگە دەيىن 42 985 جۇمىس بەرۋشى پايدالانعان.