ەكولوگيا جانە تابيعي رەسۋرستار مينيسترلىگىندە پارلامەنت دەپۋتاتتارىنىڭ قاتىسۋىمەن جانە مينيسترلىكتىڭ باستاماسىمەن ۇيىمداستىرىلعان كيىك پوپۋلياتسياسىن تۇراقتى باسقارۋ تاقىرىبىندا دوڭگەلەك ۇستەل ءوتتى, دەپ حابارلايدى Egemen.kz.
تالقىلاۋعا ءماجىلىس دەپۋتاتتارى, مەملەكەتتىك مەكەمەلەردىڭ وكىلدەرى, عىلىمي ۇيىمدار, ۇكىمەتتىك ەمەس سەكتور, حالىقارالىق ساراپشىلار جانە بۇقارالىق اقپارات قۇرالدارىنىڭ قىزمەتكەرلەرى قاتىستى.
دوڭگەلەك ۇستەل بارىسىندا كيىك سانىنىڭ كوبەيۋى جاعدايىندا بيولوگيالىق ارتۇرلىلىكتى ساقتاۋ, اۋىل شارۋاشىلىعى سالاسىنداعى شىعىنداردى ازايتۋ جانە كيىك پوپۋلياتسياسىن عىلىمي تۇرعىدان دالەلدەنگەن ءارى قوعام ءۇشىن قولايلى تاسىلمەن رەتتەۋ ماسەلەلەرى ءسوز بولدى.
ەكولوگيا جانە تابيعي رەسۋرستار مينيسترلىگى كيىك پوپۋلياتسياسىنىڭ قازىرگى احۋالى, ولاردى قورعاۋ شارالارى, حالىقارالىق ارىپتەستىك جانە باقىلاۋ جۇيەسى بويىنشا ءوز بايانداماسىن ۇسىندى. اۋىل شارۋاشىلىعى مينيسترلىگى فەرمەرلەرگە كورسەتىلەتىن مەملەكەتتىك قولداۋ تۇرلەرى – قورشاۋلارعا بەرىلەتىن سۋبسيديالار, جابايى جانۋارلاردان كەلگەن شىعىنداردى وتەۋ جانە ەپيزووتيالىق باقىلاۋ جايىندا اقپارات بەردى.
عالىمدار قاۋىمداستىعى كيىكتەردىڭ سانىن باسقارۋعا ارنالعان عىلىمي ادىستەمەلەرمەن, ساناق جۇرگىزۋ تەحنولوگيالارىمەن, كوشى-قون پروتسەستەرىن مودەلدەۋمەن جانە پوپۋلياتسيانىڭ وڭتايلى كولەمىن انىقتاۋ جولدارىمەن تانىستىردى. سونىمەن قاتار, حالىقارالىق مىندەتتەمەلەردى ساقتاۋ, تابيعي رەسۋرستاردى ءتيىمدى ءارى ۇتىمدى پايدالانۋ جولدارى, سونىڭ ىشىندە جارتىلاي ەركىن ۇستاۋ تاسىلدەرى بويىنشا ۇسىنىستار ايتىلدى.
حالىقارالىق تابيعاتتى قورعاۋ وداعى (حتقو) اڭشىلىق رەسۋرستاردى ۇتىمدى جانە تۇراقتى پايدالانۋ تابيعاتتى ساقتاۋ قاعيدالارىمەن تەك ۇيلەسىپ قانا قويماي, سول قاعيدالاردى جۇزەگە اسىرۋعا دا ىقپال ەتەتىنىن بۇرىننان مويىنداعان. مۇنداي پايدالانۋدىڭ الەۋمەتتىك-ەكونوميكالىق تيىمدىلىگى نىسانالى جانۋارلار تۇرلەرى مەن ولاردىڭ تابيعي مەكەندەۋ ورتاسىن ساقتاۋعا سەرپىن بەرەدى (حتقو, تۇرلەردىڭ ءومىر ءسۇرۋى جونىندەگى كوميسسيا, 2012 ج.).
كيىك سانىنىڭ تاريحي شەكتەن اسىپ كەتۋى جانە جەرگىلىكتى تۇرعىندارمەن قاقتىعىستاردىڭ جيىلەۋىنە بايلانىستى كيىكتەردى تۇراقتى جانە رەتتەلگەن تۇردە پايدالانۋ قاجەتتىلىگى تۋىنداپ وتىر. بۇل ءتاسىل – سۇرانىسقا يە, عىلىمي جانە ەكونوميكالىق نەگىزدەمەگە سۇيەنگەن, ءارى حالىقارالىق ساراپشىلار تاراپىنان قولداۋ تاۋىپ وتىرعان جول.