ەلىمىزدە ۇلتتىق كرەاتيۆ فەستيۆالى باستالدى

بۇل فەستيۆال — ەلىمىزدىڭ مادەنيەت, ونەر جانە ءبىلىم سالالارىنداعى ءتۇرلى وكىلدەردى بىرىكتىرۋدى ماقسات ەتكەن ماڭىزدى ءىس-شارا. باعدارلاما اياسىندا قاتىسۋشىلار شەبەرلىك ساباقتارىنا, دارىستەر مەن شىعارماشىلىق شەبەرحانالارعا قاتىسا الادى. سونىمەن قاتار كورەرمەندەر ديزاينەرلەر, سۋرەتشىلەر, يلليۋستراتورلار تۋىندىلارىنان قۇرالعان كورمەلەر مەن قولونەرشىلەردىڭ جارمەڭكەسىن تاماشالايدى. 

فەستيۆالدىڭ نەگىزگى ماقساتى — قوناقتار مەن وتاندىق كورەرمەندەردى شىعارماشىلىق يندۋستريامەن جاقىنىراق تانىستىرۋ جانە بۇل سالانىڭ وركەندەۋىنە قولداۋ ءبىلدىرۋ. قازىرگى تاڭدا كرەاتيۆ سالاسى جاھاندىق دەڭگەيدە مادەني مۇرانى ناسيحاتتاپ قانا قويماي, جاڭا جۇمىس ورىندارىنىڭ قۇرىلۋىنا, كاسىپكەرلىك بەلسەندىلىكتىڭ ارتۋىنا جانە يننوۆاتسيالىق باستامالاردىڭ دامۋىنا سەرپىن بەرىپ وتىر.

بىرىككەن ۇلتتار ۇيىمىنىڭ دەرەكتەرىنە سۇيەنسەك, كرەاتيۆتى يندۋستريا الەمدىك جالپى ىشكى ءونىمنىڭ شامامەن 3,1%-ىن قۇرايدى جانە بۇل سالادا جۇمىس ىستەيتىندەردىڭ 6,2%-ىن جاستار قۇرايدى. ساراپشىلاردىڭ پىكىرىنشە, 2030 جىلعا قاراي بۇل كورسەتكىش 10%-عا جەتۋى مۇمكىن. قازاقستاندا بولسا, 2029 جىلعا دەيىن كرەاتيۆتى ەكونوميكانىڭ ۇلەسى 2%-عا دەيىن وسەدى دەگەن بولجام بار.

ايتا كەتكەن ءجون, 2017 جىلى بۇۇ باس اسسامبلەياسى 21 ءساۋىر كۇنىن دۇنيەجۇزىلىك كرەاتيۆ پەن يننوۆاتسيالار كۇنى دەپ بەلگىلەدى. بۇل داتا — شىعارماشىلىقتىڭ ءتۇرلى سالاداعى ماڭىزىن اتاپ وتۋگە ارنالعان ەرەكشە كۇن.

فەستيۆال ۇيىمداستىرۋشىلارى قازاقستاننىڭ بۇل مەرەكەگە قاتىسۋىن — مادەنيەت, ءبىلىم جانە يننوۆاتسيا سالاسىنداعى حالىقارالىق ارىپتەستىككە باعىتتالعان ماڭىزدى قادام دەپ سانايدى. 2026 جىلى فەستيۆال اۋقىمىن كەڭەيتىپ, ەلىمىزدىڭ بارلىق ءوڭىرىن قامتۋ جوسپارلانىپ وتىر.