پرەزيدەنت قاسىم-جومارت توقاەۆ جۇمىس ساپارىمەن ماڭعىستاۋ وبلىسىنا بارىپ, وڭىردەگى بىرقاتار ماڭىزدى نىساننىڭ قىزمەتىمەن تانىستى.
ايماقتاعى ىرگەلى نىساندار
قاسىم-جومارت توقاەۆتىڭ وڭىرگە جۇمىس ساپارى اقتاۋ قالاسىنداعى كوتەرمە ساۋدا-تاراتۋ ورتالىعىنىڭ جۇمىسىمەن تانىسۋدان باستالدى. مەملەكەت باسشىسىنا ازىق-ت ۇلىك قاۋىپسىزدىگىن ساقتايتىن مۇنداي نىساننىڭ ايماقتا العاش رەت سالىنعانى جونىندە باياندالدى.
اتالعان ورتالىق ءوڭىردى ازىق-تۇلىكپەن قامتاماسىز ەتۋ, تۇتىنۋشىلارمەن اراداعى دەلدالداردى ازايتۋ جانە ءونىم باعاسىن تومەندەتۋ ماقساتىندا بوي كوتەرگەن. اۋماعى 80 مىڭ شارشى مەتر بولاتىن كەشەندە 40 مىڭ توننا ءونىم ساقتاۋعا بولادى. جوبانى جۇزەگە اسىرۋعا 5 ملرد تەڭگە ينۆەستيتسيا تارتىلعان. جىل سوڭىنا دەيىن ورتالىقتىڭ ەكىنشى كەزەڭىن ىسكە قوسۋ جوسپارلانعان. قازىرگى كەزدە ءونىم جەتكىزۋمەن اينالىساتىن وتاندىق ءىرى كاسىپكەرلەرمەن كەلىسىمشارت جاساۋ جۇمىستارى بەلسەندى تۇردە جۇرگىزىلىپ جاتىر.
بۇدان كەيىن قاسىم-جومارت توقاەۆ شاحماردان ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىنىڭ اۋماعىندا ورنالاسقان Yessenov Technopark قىزمەتىمەن تانىستى.
پرەزيدەنتكە تەحنولوگيا پاركىنىڭ زاماناۋي ينفراقۇرىلىممەن جاساقتالعانى جونىندە ايتىلدى. مۇنىڭ ءبارى ستارتاپتار مەن جوبالار ازىرلەۋمەن اينالىساتىن كاسىپكەرلەردى, ستۋدەنتتەردى, سونداي-اق وقۋشىلاردى قولداۋعا ارنالعان. سونداي-اق مەملەكەت باسشىسىنا يننوۆاتسيالىق زەرتحانالار مەن شەبەرحانالار تانىستىرىلدى. وندا ستۋدەنتتەر مەن جاس ماماندار ەلەكترونيكا, روبوتتى تەحنيكا, لازەرمەن كەسۋ, اعاش جانە مەتالل وڭدەۋ, پوليگرافيا, 3D-ديزاين, تىگىنشىلىك داعدىلارىن مەڭگەرەدى.
پرەزيدەنت حالىقارالىق باعدارلاما بويىنشا ءىت-مامانداردى دايارلايتىن وقۋ ايماعىن جانە تسيفرلىق ءارى تەلەكوممۋنيكاتسيالىق قۇزىرەتتەردى دامىتۋعا باعىتتالعان زەرتحانانى ارالاپ كوردى.
قاسىم-جومارت توقاەۆ ستۋدەنتتەرمەن اڭگىمەلەسۋ بارىسىندا قازىر جاڭا تەحنولوگيالار مەن جاساندى ينتەللەكت باعىتتارىن دامىتۋ وزەكتى بولىپ وتىرعانىن جەتكىزدى. پرەزيدەنتتىڭ ايتۋىنشا, ەلىمىزدە كولىك-لوگيستيكا سالاسىنىڭ بىلىكتى ماماندارىنا سۇرانىس جوعارى. مەملەكەت باسشىسى جاستاردى كەلەشەكتىڭ كەپىلى سانالاتىن ساپالى ءبىلىم الۋعا شاقىردى.
سودان سوڭ مەملەكەت باسشىسى كوپفۋنكتسيونالدى BS Arena سپورت كەشەنىنە باردى. زاماناۋي قۇرىلعىلارمەن جابدىقتالعان نىساندا حالىقارالىق جانە رەسپۋبليكالىق سپورت جارىستارىن, سونداي-اق مادەني-كوپشىلىك ءىس-شارالاردى وتكىزۋگە بولادى. مۇندا ۆولەيبول, باسكەتبول الاڭقايلارى, فۋتزال, جابىق جانە اشىق تەننيس كورتتارى, باسسەين, جەكپە-جەك تۇرلەرى مەن فيتنەسكە ارنالعان زالدار, سونداي-اق فۋتبول الاڭى بار.
قاسىم-جومارت توقاەۆ جەرگىلىكتى سپورتشىلارمەن اڭگىمەلەسىپ, ولارعا ساتتىلىك تىلەدى.
ينفراقۇرىلىمدىق 24 باستاما جۇزەگە اسىپ جاتىر
پرەزيدەنت ەلىمىزدىڭ ترانزيتتىك الەۋەتىن دامىتۋدا ماڭىزدى رولگە يە باستى لوگيستيكالىق حابتىڭ ءبىرى – اقتاۋ حالىقارالىق تەڭىز پورتىنا باردى.
بۇگىندە اتالعان نىسانداعى كوپماقساتتى زاماناۋي تەرمينال شىعىس – باتىس, سولتۇستىك – وڭتۇستىك باعىتتارى بويىنشا تاۋلىك بويى جۇك تيەۋ مەن ءتۇسىرۋ قىزمەتىن ۇسىنادى. پورتتىڭ حالىقارالىق كولىك دالىزدەرىنىڭ توعىسىندا ورنالاسۋى ۇلتتىق جانە وڭىرلىك لوگيستيكانى نىعايتۋدا ايرىقشا ستراتەگيالىق ءمانىن كورسەتەدى.
پرەزيدەنتكە ماڭعىستاۋ وبلىسىنىڭ كولىك-لوگيستيكا ينفراقۇرىلىمىن دامىتۋ پەرسپەكتيۆاسى, سونىڭ ىشىندە ەلىمىزدىڭ ترانزيتتىك الەۋەتىن كەڭەيتۋ جانە پورت قۋاتىن جاڭعىرتۋ جوسپارلارى جونىندە باياندالدى.
كولىك ءمينيسترى مارات قاراباەۆ وڭىردە جالپى قۇنى 1,9 ترلن تەڭگە بولاتىن 24 ينفراقۇرىلىمدىق جوبانىڭ جۇزەگە اسىرىلىپ جاتقانىن ايتتى. بىلتىر ترانسكاسپي حالىقارالىق كولىك ءدالىزى بويىنشا جۇك تاسىمالى 62 پايىزعا ءوسىپ, 4,5 ملن تونناعا جەتكەن. اتالعان باعىتپەن 358 كونتەينەرلىك پويىز, 27 مىڭ اۆتوكولىك جۇك تاسىمالداعان. ەكسپورت كولەمى 3,2 ملن توننانى قۇراعان. 2028 جىلعا دەيىن بۇل كورسەتكىشتى 10 ملن تونناعا دەيىن جەتكىزۋ جوسپارلانىپ وتىر.
اقتاۋدا كونتەينەرلىك حاب سالىنىپ جاتىر. بۇل جوبا پورتتىڭ جۇك وتكىزۋ قابىلەتىن 140 مىڭنان 240 مىڭ جفە-گە دەيىن ۇلعايتادى.
مەملەكەت باسشىسىنىڭ تاپسىرماسىنا سايكەس, كەندىرلى كۋرورتى ايماعىندا جاڭا اۋەجايدىڭ قۇرىلىسى باستالدى. اۋەجاي ساعاتىنا 150 جولاۋشىنى قابىلداي الادى. كەندىرلىنى الماتى جانە استانا قالالارىمەن جالعايتىن تۇراقتى اۋە رەيستەرىن اشۋ جوسپارلانعان.
بۇعان قوسا ورتالىق – باتىس جانە بەينەۋ – سەكسەۋىل سەكىلدى اۋقىمدى جول قۇرىلىسى جوبالارىن جۇزەگە اسىرۋ كوزدەلگەن. سونىڭ ناتيجەسىندە باستى باعىتتارداعى لوگيستيكانى وڭتايلاندىرىپ, ترانزيت جانە ەكسپورت جۇكتەرىن تاسىمالداۋ شىعىندارىن ەداۋىر ازايتۋعا مۇمكىندىك تۋادى. اتاپ ايتقاندا, استانادان اقتاۋعا دەيىنگى جول 800 شاقىرىمعا, ال قورعاستان اقتاۋعا دەيىنگى اراقاشىقتىق 900 شاقىرىمعا قىسقارادى.
مەملەكەت باسشىسى كەندىرلى كۋرورتى اۋماعىنداعى اۋەجاي قۇرىلىسىن تەزىرەك اياقتاۋدى تاپسىردى. پرەزيدەنتتىڭ ايتۋىنشا, ەلىمىزدى ەۋرازيانىڭ كولىك-لوگيستيكا حابىنا اينالدىرۋ جولىندا ماڭعىستاۋدىڭ الاتىن ورنى ەرەكشە. سوندىقتان ونىڭ الەۋەتىن ءتيىمدى پايدالانۋ قاجەت. ويتكەنى بۇل مىندەتتىڭ ستراتەگيالىق ماڭىزى زور.
يگىلىگى مول ينۆەستيتسيالىق مۇمكىندىك
سونىمەن قاتار مەملەكەت باسشىسىنا ماڭعىستاۋ وبلىسىنداعى ينۆەستيتسيالىق جوبالار تانىستىرىلدى.
وڭىردەگى ءىرى ينۆەستيتسيالىق جوبالار قاتارىندا اقتاۋ قالاسىنداعى قۋاتى 160 مۆت بولاتىن بۋ-گاز قوندىرعىسىنىڭ قۇرىلىسى, مۋلتيمودالدى لوگيستيكالىق-اۆياتسيالىق حاب, كەمە قۇراستىرۋ ۆەرفى, بەكىرە بالىعىن ءوسىرۋ جانە ۋىلدىرىق ءوندىرۋ شارۋاشىلىعى, «بوزجىرا» ۆيزيت ورتالىعىن سالۋ, سونداي-اق اممياك-كارباميد كەشەنىن ىسكە قوسۋ سەكىلدى ەلەۋلى جوبالار بار.
قاسىم-جومارت توقاەۆقا بىلتىر ايماق ەكونوميكاسىنا 1,1 ملرد دوللار كولەمىندە تىكەلەي شەتەلدىك ينۆەستيتسيا تارتىلعانى جونىندە مالىمەت بەرىلدى. قۇنى 36 ملرد تەڭگە بولاتىن 15 ينۆەستيتسيالىق جوبا جۇزەگە اسىرىلىپ, 530 تۇراقتى جۇمىس ورنى اشىلعان. 5,7 ترلن تەڭگەگە 55 الەۋەتتى ينۆەستيتسيالىق جوبانىڭ پۋلى جاساقتالدى.
مەملەكەتتىك ماراپات تاپسىرىلدى
پرەزيدەنت قاسىم-جومارت توقاەۆ ماڭعىستاۋعا ساپارى كەزىندە ايماقتاعى قۇقىق قورعاۋ ورگاندارىنىڭ قىزمەتكەرلەرىمەن كەزدەستى. مەملەكەت باسشىسى ولاردىڭ ەل ىشىندەگى تۇراقتىلىق پەن تىنىشتىقتى ساقتاۋعا زور ۇلەس قوسىپ كەلە جاتقانىن اتاپ ءوتتى.
– ادىلەتتى قازاقستاندى قۇرۋ جانە «زاڭ مەن ءتارتىپ» قاعيداتىن قوعامدا تەرەڭ ورنىقتىرۋ ءۇشىن تاباندى ەڭبەك ەتىپ جۇرسىزدەر. قاۋىپ-قاتەرگە قاراماستان, بارلىق جۇكتەلگەن مىندەتتى ابىرويمەن اتقارىپ جاتىرسىزدار. ادال قىزمەتتەرىڭىزگە شىنايى ريزاشىلىعىمدى بىلدىرەمىن. مەن ايماقتا قاۋىپسىزدىكتى ساقتاۋ ءۇشىن ءمىنسىز قىزمەت ەتىپ جۇرگەن بىرقاتار كۇشتىك قۇرىلىم وكىلدەرىن مەملەكەتتىك ناگرادامەن ماراپاتتاۋ تۋرالى شەشىم قابىلدادىم. جالپى, مەن مەملەكەت باسشىسى رەتىندە قۇقىق قورعاۋ ورگاندارىنىڭ قىزمەتكەرلەرىن ءاردايىم قولدايمىن, ەڭبەكتەرىڭىزدى جوعارى باعالايمىن. الداعى ۋاقىتتا دا مەملەكەتتىڭ تىرەگى, حالىقتىڭ قورعانى بولىپ, ادال قىزمەت ەتەسىزدەر دەپ سەنەمىن, – دەدى پرەزيدەنت.
مەملەكەت باسشىسىنىڭ جارلىعىمەن قىزمەتتىك بورىشىن اتقارۋدا كورسەتكەن ەرلىگى مەن جانقيارلىعى ءۇشىن وفيتسەرلەر مەن سەرجانتتارعا II دارەجەلى «ايبىن» وردەنى, «ەرلىگى ءۇشىن» جانە «جاۋىنگەرلىك ەرلىگى ءۇشىن» مەدالدارى تاپسىرىلدى.