ەندى جەرگىلىكتى بيۋدجەتتىڭ بورىشى ءۇشىن اكىمدەر جاۋاپ بەرەدى

بۇعان دەيىن جۇرگىزىلگەن مەملەكەتتىك اۋديت ناتيجەسىندە وڭىرلىك قارىزداردى باسقارۋ ىسىندە بىرقاتار كەمشىلىكتەر انىقتالعان بولاتىن. اتاپ ايتقاندا, «جۇمىسپەن قامتۋ جول كارتاسى» اياسىندا بولىنگەن قاراجاتتار جەرگىلىكتى اتقارۋشى ورگانداردىڭ باسقا كرەديتورلار الدىنداعى قارىزىن وتەۋگە جۇمسالعان. بۇل شىعىستار جالپى سيپاتتاعى ترانسفەرتتەردى ەسەپتەۋ كەزىندە ەسكەرىلىپ, ورتالىق بيۋدجەتكە قوسىمشا بورىشتىق جۇكتەمە سالعان.

سونىمەن قاتار, كەيبىر وڭىرلەردە قارىز الۋ ليميتتەرى (كىرىستەردىڭ 10%-ىنان اسپاۋ كەرەك) ساقتالماعان. ەڭ ماڭىزدىسى — وسى تالاپتاردىڭ بۇزىلعانى ءۇشىن جاۋاپكەرشىلىك كوزدەلمەگەن. قارىزدى باسقارۋ تاسىلدەرى دە ءارتۇرلى جانە بىرىزدىلىكتەن الشاق بولعان.

وسىعان بايلانىستى جوعارى اۋديتورلىق پالاتا ۇلتتىق ەكونوميكا مينيسترلىگىنە نورماتيۆتىك-قۇقىقتىق بازاعا وزگەرىستەر ەنگىزۋدى تاپسىردى.

ناتيجەسىندە, 2025 جىلعى 15 ناۋرىزدا قابىلدانعان جاڭا بيۋدجەت كودەكسىنە ءتيىستى تۇزەتۋلەر ەنگىزىلدى:

ەندى جەرگىلىكتى قارىزداردى وتەۋگە جۇمسالاتىن شىعىندار وڭىرلەردىڭ جالپى الەۋمەتتىك شىعىندارىنىڭ ء(بىلىم بەرۋ, مەديتسينا, ينفراقۇرىلىم جانە ت.ب.) بولجامىنا ەنگىزىلمەيدى. بۇل وڭىرلەردىڭ ءوز قارىزىنا وزدەرى جاۋاپ بەرۋىن قامتاماسىز ەتەدى; جەرگىلىكتى بورىش ليميتتەرى ەندى قر پرەزيدەنتىنىڭ جارلىقتارىمەن بەكىتىلەتىن نىسانالى باعدارلاردى ەسكەرە وتىرىپ ايقىندالادى; قارىز ءليميتىنىڭ ساقتالماعانى ءۇشىن وبلىس, رەسپۋبليكالىق ماڭىزى بار قالا جانە استانا اكىمدەرى تىكەلەي جاۋاپتى بولادى.

سونىمەن قاتار, جەرگىلىكتى بيۋدجەتتەردىڭ سالىقتىق جانە سالىقتىق ەمەس كىرىستەرىن اسىرا ورىنداۋدان تۇسكەن قوسىمشا قارجى توقسان سايىن ولاردىڭ بورىشتىق مىندەتتەمەلەرىن وتەۋگە جانە جوعارى تۇرعان بيۋدجەتتەردىڭ الەۋمەتتىك ماڭىزدى شىعىستارىن قارجىلاندىرۋعا باعىتتالادى.

ۆەدومستۆونىڭ حابارلاۋىنشا, اتالعان وزگەرىستەر بيۋدجەتتەر دەربەستىگىن نىعايتۋعا, قارجىلىق ءتارتىپتى كۇشەيتۋگە جانە بيۋدجەت قاراجاتىن ءتيىمدى ءبولۋدى قامتاماسىز ەتۋگە باعىتتالعان.