الەمدىك گەوساياسات قۇبىلىپ تۇر. قارجى نارىعىندا دا تۇراقتىلىق بايقالمايدى. مۇناي باعاسى ارزانداپ, جاھان بەيمازا كۇي كەشە باستادى. داعدارىس ەكى وكپەدەن قىسىپ, دۇنيەنىڭ دامۋ جولىن باسقا ارناعا قاراي بۇرىپ جىبەردى. وسىنداي سىن ساعاتىندا مەملەكەتتىڭ مىقتىلىعى سىنالماق. سوندىقتان, الدا بولاتىن قيىندىقتارعا بۇگىننەن قام جاساپ, ناقتى قادامدارعا بارماسا بولمايدى. ۇكىمەتتىڭ كەڭەيتىلگەن وتىرىسىندا ەلباسى ەلدەگى كەلەلى ماسەلەلەردى قوزعادى. قيىن-قىستاۋ كەزەڭدە بوس ىسىراپشىلدىققا بارماي, حالىقتى تارىقتىرىپ الماي, قايتا بۇدان پايدامەن شىعۋ كەرەكتىگىن ايتتى.
بيىلعى رەسپۋبليكالىق بيۋدجەتتىڭ ون پايىزعا قىسقارۋى داعدارىستى ەڭسەرۋگە جاسالعان العاشقى قادام دەپ بىلەمىز. سەبەبى, قازىنانىڭ قارجىسىن ەسەپپەن جاراتىپ, قاجەتتى پروبلەمالاردى شەشۋگە جۇمساماسا, وندا ەرتەڭ بارماق تىستەپ قالۋىمىز مۇمكىن. سوندىقتان بيۋدجەتتەن بولىنەتىن ءاربىر تەڭگەنى ماقساتتى تۇردە شىعىنداۋ قاجەت. «دەگەنمەن, مەملەكەتتىڭ حالىق الدىندا موينىنا العان الەۋمەتتىك جاۋاپكەرشىلىگى ءوز كولەمىندە وتەلۋى كەرەك»,– دەدى ەلباسى. بۇل مەملەكەت تاراپىنان بەرىلەتىن ءتۇرلى الەۋمەتتىك كومەكتەر قىسقارمايدى, بۇرىنعى كولەمدە تولەنە بەرەدى دەگەن ءسوز. مەملەكەت باسشىسى بۇعان دەيىن داعدارىس كەزىندەگى قيىنشىلىق حالىقتىڭ ەسەبىنەن شەشىلمەيتىنىن ايتقان. كەشەگى ۇكىمەتكە بەرگەن تاپسىرماسى سول ءسوزدىڭ ورىندالۋى ەدى.
ءبىلىم بەرۋ, دەنساۋلىق ساقتاۋ سالالارىنا بولىنەتىن قارجىنىڭ دا كولەمى قىسقارمايدى. قايتا «بالاپان» باعدارلاماسىن ودان ءارى جالعاستىرۋ تاپسىرىلدى. حالىقتىڭ دەنساۋلىعى مەن بىلىمىنە قۇيىلعان قارجى, مەملەكەتتىڭ بولاشاقتاعى ەكونوميكالىق احۋالىن قالىپتاستىرماق. سول سەبەپتى, ەلباسى بۇل تاراپتا باستالعان جۇمىستاردىڭ جالعاسۋ كەرەكتىگىن ەسكەرتتى.
داعدارىس كەزىندە جاڭا جوبالاردىڭ باستالمايتىنى بەلگىلى. دەي تۇرعانمەن, بۇعان دەيىن قولعا الىنعان جۇمىستىڭ ءبارى اياقتالادى. ول ءۇشىن مەملەكەت بارلىق جاعدايدى جاساپ, ۇلتتىق قوردان قاجەتتى قارجىنى بەرىپ وتىر. وسى رەتتە, ەلباسى قارجىنى وڭتايلى جۇمساۋدى, ءاربىر تيىننىڭ ەسەپتە بولۋىن, ونى قاتاڭ قاداعالاۋدى تاپسىردى.
– تىكەلەي مەنىڭ باستاماممەن قۇرىلعان كوميسسيا قارجىنىڭ ماقساتتى تۇردە جۇمسالۋىن قاداعالاپ, بارلىق ناتيجەنى وزىمە بايانداپ وتىراتىن بولادى. اكىمدەرگە ۇلكەن جاۋاپكەرشىلىك جۇكتەلەدى. «نۇر وتان» پارتياسى دا بۇل ىسكە بەلسەنە ارالاسىپ, پارتيالىق قاداعالاۋ ورناتۋى كەرەك. ەشقانداي ارتىق شىعىن بولماۋى قاجەت. بيۋدجەتتىڭ ەسەبىنەن جاسالاتىن مەرەيتويلار مەن ءتۇرلى شارالاردى قىسقارتۋدى ۇكىمەتكە تاپسىرامىن, – دەدى ەلباسى.
كەڭەيتىلگەن كەڭەس بارىسىندا مەملەكەت باسشىسى بولاشاق باعىتىمىزدى, اتقاراتىن ناقتى جۇمىستار مەن مىندەتتەردى ايقىنداپ بەردى. جاسالعان باعدارلاما بار. ونى ىسكە اسىراتىن قارجى دا جەتكىلىكتى. ەندى ءاربىر قازاقستاندىق ازاماتتىڭ ورتاق ىسكە جۇمىلىپ, جاناشىرلىقپەن جۇمىس ىستەۋى عانا قالىپ تۇر.
ناۋرىزباي بايقاداموۆ,
«نۇر وتان» پارتياسى قىزىلوردا وبلىستىق فيليالى توراعاسىنىڭ ءبىرىنشى ورىنباسارى.
قىزىلوردا.