ەكى قولعا – ءبىر جۇمىس

ەلدى ەڭبەكپەن قامتۋ قالاي جۇزەگە اسۋدا؟ ەلىمىزگە اۋىر سالماعىن سەزدىرگەن 2008 جىلعى الەمدىك داعدارىستان كەيىن حالىقتى ەڭبەكپەن قامتۋ ءىسىن جۇيەلەپ, قولعا الۋ ماقساتىندا ەلباسىنىڭ تاپسىرماسىنا سايكەس ۇكىمەت «جۇمىسپەن قامتۋدىڭ جول كارتاسى-2020» باعدارلاماسىن ازىرلەگەن بولاتىن. بۇل باعدارلامانىڭ تيىمدىلىگى سالعان بەتتەن ءوز كورىنىسىن بەردى. باعدارلاما العاشقى جۇزەگە اسىرىلعان جىلدىڭ وزىندە ەلىمىز بويىنشا كوپتەگەن جۇمىس ورىندارى قۇرىلدى. ول كەيىنگى كەزدە جيىلەپ كەتكەن الەمدىك, وڭىرلىك داعدارىستاردان قاراپايىم حالىقتى قورعاۋدىڭ, الەۋمەتتىك-ەكونوميكالىق جاعدايدى تۇراقتاندىرۋدىڭ وزىندىك ءبىر ءتيىمدى تاسىلىنە اينالدى.

باعدارلامانىڭ 2014 جىلعى ورىندالۋ قورىتىندىسى

 «جۇمىسپەن قامتۋدىڭ جول كارتاسى-2020» شارالارىن رەسپۋبليكالىق قارجىلاندىرۋ كولەمى 2014 جىلى 94,5 ميلليارد تەڭگەنى قۇرادى. باعدارلاماعا قاتىسۋعا تىلەك بىلدىرۋشىلەردىڭ سانى اتالعان جىلى 212,7 مىڭ ادام بولدى. ولاردىڭ 193,7 مىڭى باعدارلامانىڭ قاتىسۋشىلارىنا اينالدى. باعدارلاماعا قاتىسۋشىلار اراسىندا الەۋمەتتىك كەلىسىمدەرگە قول قويعان جۇمىسسىزدار سانى – 113 191 ادام (58,4 پايىز), ءوزىن-ءوزى جۇمىسپەن قامتىعاندار – 79 308 ادام (40,9 پايىز). ال 1240 ادام (0,6 پايىز) ءىشىنارا جۇمىسپەن قامتىلدى. باعدارلاماعا قاتىسۋشى 29 جاسقا دەيىنگى جاستار ۇلەسى 43,5 پايىزدى قۇراپ, 84,269 ادامعا جەتتى. ايەلدەردىڭ ۇلەسى 48,2 پايىز (93 309 ادام) بولدى. 2014 جىلدىڭ ىشىندە باعدارلامانى جۇزەگە اسىرۋ اياسىندا 167,2 مىڭ ادام جۇمىسقا ورنالاستىرىلدى. ونىڭ 92,2 مىڭىن اۋىل ادامدارى قۇرادى. سونىڭ ىشىندە 151 مىڭ ادام تۇراقتى جۇمىسپەن قامتىلدى. سونىمەن قاتار, مەملەكەتتىك شارالار قولداۋىنسىز, ياعني نارىقتا بار بوس جۇمىس ورىندارىنا 87,3 مىڭ ادام تارتىلدى. باعدارلامانىڭ اتالعان باعىتى جۇمىس بەرۋشىنىڭ قاجەت ەتۋ اياسىندا ەڭبەك رەسۋرستارىن شوعىرلاندىرۋ ماسەلەسىن قاراستىراتىندىعى بەلگىلى. وسى ءىستى جۇزەگە اسىرۋ ءۇشىن باعدارلامانى جۇزەگە اسىرۋ ءىسى قولعا الىنعاننان بەرى 5 377 پاتەرگە ەسەپتەلىنگەن 1 337 ءۇيدىڭ قۇرىلىسى قولعا الىندى. مۇنىڭ 1 225-ءىن جەكە تۇرعىن ۇيلەر, 100-ءىن كوپپاتەرلى ۇيلەر قۇرايدى. سونىمەن قاتار, 12 جاتاقحانا بار. 2015 جىلدىڭ 1 قاڭتارىندا 1 295 ءۇيدىڭ (4 884 پاتەر) قۇرىلىسى اياقتالدى. باعدارلاماعا قاتىسۋشىلار مەن ولاردىڭ وتباسىلارى 1 244 ۇيگە (4 729 پاتەرگە) نەمەسە ىسكە قوسىلعان تۇرعىن جايلاردىڭ 96,1 پايىزىنا ورنالاستىرىلدى. 42 ءۇيدىڭ (493 پاتەردىڭ) قۇرىلىسى جالعاسۋدا. 2011-2014 جىلدار ارالىعىندا 16,1 مىڭ ادام كوشىرىلدى. مۇنىڭ 3 456 ادامى 2014 جىلى قونىس اۋداردى. جالپى, كوشىرىلگەندەردىڭ 7,8 مىڭى ەڭبەك جاسىنداعىلار بولسا, ولاردىڭ 6,1 مىڭى نەمەسە 78,3 پايىزى جۇمىسقا ورنالاستىرىلدى. كوشىرىلگەن وتباسىلارعا جول شىعىندارى ءۇشىن 26,5 ميلليون تەڭگەنىڭ سۋبسيدياسى تولەندى. ءسويتىپ, قاراستىرىلعان قارجىنىڭ 97,7 پايىزى يگەرىلدى. سۇڭعات ءالىپباي, امانگەلدى قياس (ينفوگرافيكا), «ەگەمەن قازاقستان».