پارلامەنت سەناتىنىڭ توراعاسى, الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى ماۋلەن اشىمباەۆ ساۋد ارابياسىنا ساپارى بارىسىندا ء«دىن ليدەرلەرى ادىلەتتى جانە قاۋىپسىز الەم ءۇشىن» اتتى دوڭگەلەك ۇستەلگە قاتىستى.
فورۋمدا قاتىسۋشىلار ءوزارا ءىس-قيمىلدى نىعايتۋ جانە ادامزاتتى الاڭداتىپ وتىرعان وزەكتى پروبلەمالاردى ەڭسەرۋ تاسىلدەرىن جەتىلدىرۋ جونىندە پىكىر الماستى. ءىس-شارا اياسىندا سەنات توراعاسى دۇنيەجۇزىلىك يسلام ليگاسىنىڭ باسشىلىعىمەن كەزدەستى.
ماۋلەن اشىمباەۆ دوڭگەلەك ۇستەلگە قاتىسۋشىلارعا ءىلتيپات بىلدىرە كەلىپ, قازىر بۇكىل الەم جاڭا جاھاندىق سىن-قاتەرلەرمەن بەتپە-بەت كەلىپ وتىرعانىن اتاپ ءوتتى. سونداي-اق ول وسىنداي الماعايىپ كەزەڭدە اتالعان اۋقىمدى ءىس-شارانى ۇيىمداستىرىپ وتىرعان دۇنيەجۇزىلىك يسلام ليگاسى مەن الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ ميسسياسى ايرىقشا مانگە يە ەكەنىن, بۇل باستاما حالىقتار, مادەنيەتتەر جانە دىندەر اراسىنداعى بايلانىستى جولعا قويۋدى كوزدەيتىنىن ايتتى. بۇگىندە گەوساياسي شيەلەنىس, ەكولوگيالىق جانە ەكونوميكالىق تۇراقسىزدىق, پاندەميا سياقتى ءتۇرلى پروبلەمالار بۇكىل الەمنىڭ دامۋىنا ايتارلىقتاي تەرىس اسەرىن تيگىزىپ جاتىر. وسى رەتتە ءارتۇرلى كونفەسسيالاردىڭ, حالىقارالىق جانە ساياسي ۇيىمداردىڭ وكىلدەرىن بىرىكتىرەتىن دوڭگەلەك ۇستەل وتكىزۋ سىندارلى ديالوگ قۇرۋ جولىنداعى ماڭىزدى جانە ۋاقتىلى الاڭ ەكەنى انىق.
ء«بىز قازىرگى سىن-قاتەرلەردىڭ, ەڭ الدىمەن, ۋشىعا تۇسكەن گەوساياسي شيەلەنىستىڭ سالدارىن ەڭسەرۋ جولىندا كۇش-جىگەرىمىزدى بىرىكتىرۋ ءۇشىن قاسيەتتى جەردە جينالىپ وتىرمىز. بۇگىندە تاياۋ شىعىستا, پالەستينادا, گازادا قيىن جاعداي قالىپتاسىپ, بەيبىت تۇرعىندار زارداپ شەگۋدە. بۇل ماسەلەدە قانتوگىستى دەرەۋ توقتاتىپ, ساياسي ديالوگتى جانداندىرۋ قاجەت. اتالعان ۇدەرىستە دۇنيەجۇزىلىك يسلام ليگاسى ماڭىزدى ءرول اتقارادى. سونداي-اق دىنگە, ناسىلگە جانە سەنىمگە قاتىستى كەمسىتۋشىلىكتىڭ بارلىق ءتۇرىن ايىپتايتىن مەككە دەكلاراتسياسىنىڭ ماڭىزى مەن ءمانى زور. قۇجات الەم جۇرتىن توزبەۋشىلىك پەن جەككورۋشىلىككە قارسى بىرلەسىپ ارەكەت ەتۋگە ۇندەيدى. سوندىقتان بۇل دەكلاراتسيانى ءبارىمىز ساۋد ارابياسى مەن دۇنيەجۇزىلىك يسلام ليگاسىنىڭ جاھاندىق بەيبىتشىلىكتى نىعايتۋعا قوسقان ۇلكەن ۇلەسى دەپ قابىلدايمىز», دەدى الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى.
سونىمەن قاتار م.اشىمباەۆ دوڭگەلەك ۇستەلدە كوتەرىلگەن ماسەلەلەردىڭ وزەكتىلىگىنە ەرەكشە نازار اۋدارىپ, الەمدە الەۋمەتتىك-ەكونوميكالىق پروبلەمالار دا ۋشىعا تۇسكەنىن اتاپ ءوتتى. سونداي-اق قالىپتاسقان رۋحاني داعدارىس جانە تابيعات پەن قوعامعا تۇتىنۋشىلىق كوزقاراس تا ادامزاتقا ءوز سالدارىن تيگىزەتىنى ءسوز بولدى. مۇنداي جاعدايدا جاھاندىق ديالوگتى دامىتۋدىڭ جانە ءوزارا سەنىمدى نىعايتۋدىڭ جاڭا تاسىلدەرىنە دەگەن قاجەتتىلىك ارتا تۇسەتىنى انىق.
«قازاقستان پرەزيدەنتى قاسىم-جومارت توقاەۆ حالىقارالىق قاۋىپسىزدىكتىڭ بەرىك جۇيەسىن قالىپتاستىرۋ ماسەلەلەرىنە ۇنەمى باسا ءمان بەرىپ كەلەدى. وسى ماقساتپەن پرەزيدەنت بەيبىتشىلىككە شاقىراتىن جاڭا جاھاندىق قوزعالىس قۇرۋ تۋرالى باستاما كوتەردى. بۇل ۇدەرىستە ءدىن كوشباسشىلارى ايرىقشا ءرول اتقارا الادى. بيىل قىركۇيەك ايىندا استانادا «دىندەر ديالوگى: بولاشاق جولىنداعى سينەرگيا» تاقىرىبىنا ارنالعان VIII سەزد وتەدى. قازىر ءدىني, ساياسي جانە قوعامدىق كوشباسشىلاردىڭ بىرلەسكەن ارەكەتتەرى اسا ماڭىزدى. سونداي-اق سەزد اياسىندا بىرىككەن ۇلتتار ۇيىمى وركەنيەتتەر اليانسىمەن بىرلەسىپ, ءدىني نىسانداردى قورعاۋ جونىندەگى ارنايى سەسسيا ۇيىمداستىرىلادى. وسى ورايدا سەزد بەن دۇنيەجۇزىلىك يسلام ليگاسىنىڭ قىزمەتىندەگى نەگىزگى باسىمدىقتار ۇقساس ەكەنىن اتاپ وتكەن ءجون. ءبىز الداعى ۋاقىتتا وسى جولدا ليگامەن جان-جاقتى ىنتىماقتاستىقتى ودان ءارى نىعايتۋعا مۇددەلىمىز», دەدى م.اشىمباەۆ.
دوڭگەلەك ۇستەلدىڭ قورىتىندىسى بويىنشا دۇنيەجۇزىلىك يسلام ليگاسى مەن قازاقستاندا ورنالاسقان حالىقارالىق كونفەسسياارالىق جانە دىنارالىق ديالوگ ورتالىعى اراسىندا ءوزارا تۇسىنىستىك تۋرالى مەموراندۋمعا قول قويىلدى. ايتا كەتەيىك, دوڭگەلەك ۇستەلگە ساۋد ارابياسىنىڭ مەملەكەتتىك ورگاندارىنىڭ, اكادەميالىق توپتاردىڭ, ازاماتتىق قوعامنىڭ جانە بۇقارالىق اقپارات قۇرالدارىنىڭ وكىلدەرى دە قاتىستى.
سونىمەن قاتار بۇل كۇنى ماۋلەن اشىمباەۆ دۇنيەجۇزىلىك يسلام ليگاسى باس حاتشىسىنىڭ ورىنباسارى ابدۋلراحمان بەن ابدۋللا ءال-زايدپەن كەزدەستى. وندا تاراپتار قازىرگى سىن-قاتەرلەرگە نازار اۋدارىپ, ولاردى ەڭسەرۋ جولدارىن تالقىلادى. سونداي-اق ولار ءتۇرلى باعىتتاردا ءوزارا ىنتىماقتاستىقتى ودان ءارى نىعايتۋ جونىندە پىكىر الماستى.
ءوز تاراپىنان دۇنيەجۇزىلىك يسلام ليگاسى باس حاتشىسىنىڭ ورىنباسارى قازاقستاننىڭ جاھاندىق دىنارالىق ديالوگتى دامىتۋعا ارنالعان باستامالارىن جوعارى باعالادى جانە بىرلەسكەن جوبالاردى ىسكە اسىرۋ باعىتىنداعى جۇمىستى ءارى قاراي جالعاستىرۋعا مۇددەلى ەكەنىن جەتكىزدى. اتاپ ايتقاندا, استانادا مۇحاممەد پايعامباردىڭ ءومىربايانىنا ارنالعان حالىقارالىق كورمە ۇيىمداستىرۋ جانە يسلام وركەنيەتى مۇراجايىن سالۋ جونىندەگى ماسەلەلەر ءسوز بولدى.