جەتىسايدىڭ قىرىققاباتى رەسەي, بەلورۋس, ەۋروپا ەلدەرىنە ەكسپورتتالادى

شارۋا قوجالىعىنىڭ توراعاسى نۇرلىبەك جايىنباەۆتىڭ ايتۋىنشا, 45-50 كۇندە پىسەتىن «پەكينكا» قىرىققاباتىنىڭ العاشقى ءونىمى جينالىپ جاتىر. «اقپان ايىنىڭ سوڭىندا 1 گەكتارعا قىرىققاباتتىڭ ەرتە پىسەتىن «ماگنۋس» سورتىن ەكتىك. ءونىم ويداعىداي بولىپ وتىر. بۇل كەتكەن شىعىندارىمىز بەن توككەن تەرىمىزدىڭ تولىقتاي اقتالعانىن بىلدىرەدى. قىرىققاباتتى رەسەي فەدەراتسياسىنىڭ پەرم قالاسىنا جونەلتىپ جاتىرمىز», دەيدى قوجالىق توراعاسى. «ماگنۋستىڭ» ءار كەلىسىن ەگىستىك باسىنان 250 تەڭگەدەن ساۋدالاپ جاتقان شارۋا جاقىندا 2 گەكتار ەگىستىگىنە ەككەن «زاريسما» ورامجاپىراعىنان دا ءونىم الاتىنىن ايتادى. ودان بولەك, تاعى 6 گەكتارعا قاۋىننىڭ «اەروپورت» سورتىن ەگۋگە دايىندالىپ جاتىر.

جەتىساي اۋداندىق اۋىل شارۋاشىلىعى جانە جەر قاتىناستار ءبولىمىنىڭ مالىمەتىنشە, بيىل 1158 گەكتار اۋماققا ەرتە پىسەتىن قىرىققابات ەگىلىپ, بولجام بويىنشا 50 مىڭ تونناعا جۋىق ءونىم الۋ جوسپارلانىپ وتىر. «زاريسما», «ۆاليكور», «ماگنۋس», «ريندا», «زاكاز» سىندى قىرىققابات سورتتارى ەگىلگەن القاپتىڭ 893 گەكتارىنا سۋ ۇنەمدەۋ تەحنولوگياسى ەنگىزىلگەن. نەگىزىنەن ەرتە پىسەتىن قىرىققاباتتىڭ باسىم بولىگى رەسەي, بەلورۋس جانە ەۋروپا ەلدەرىنە ەكسپورتتالادى.

تۇركىستان وبلىسى