تەننيستەن اۋستراليانىڭ بريسبەن قالاسىندا وتكەن بيللي دجين كينگ كۋبوگىنىڭ ىرىكتەۋ سايىسىن ەلىمىزدىڭ ايەلدەر قۇراماسى ءساتتى اياقتادى. ەكى كەزدەسۋدە دە جەڭىسكە جەتكەن جەرلەستەرىمىز جارىستىڭ نەگىزگى بولىگىندە كۇش سىناسۋعا مۇمكىندىك بەرەتىن جالعىز جولدامانى يەلەندى.
ەلىمىزدىڭ تەننيسشىلەرى العاشقى اينالىمدا اۋستراليادان 2:1 ەسەبىمەن ايلاسىن اسىردى. كەشە كولۋمبيامەن كۇش سىناستى. وڭتۇستىك امەريكا قۇرلىعىنان كەلگەن ويىنشىلار جەرلەستەرىمىزگە جارىتىپ قارسىلىق كورسەتە المادى. يۋليا پۋتينتسەۆا ۆالەنتينا اررياستى 6:0, 6:1 ەسەبىمەن ويسىراتا ۇتتى. يۋلياعا نەبارى 38 مينۋت جەتكىلىكتى بولدى. ەلەنا رىباكيناعا دا ءوز قارسىلاسى يۋليانا ليزارازونى بار-جوعى 52 مينۋتتا جەڭدى – 6:1, 6:2.
سوڭعى جۇپتىق سايىس تا ءبىزدىڭ قىزداردىڭ پايداسىنا شەشىلدى. زارينا دياس پەن جىبەك قۇلامباەۆا پەرەس گارسيا/يۋليانا ليزارازو جۇبىن ءۇش سەتتە جەڭدى – 6:2, 5:7, 6:4. ەلىمىزدىڭ قۇراماسى ەندى 16-21 قىركۇيەك ارالىعىندا قىتايدىڭ شەنچجەن قالاسىندا جالاۋى جەلبىرەيتىن جارىستىڭ فينالدىق بولىگىندە كۇش سىناسادى.
بيللي دجين كينگ كۋبوگى 1963 جىلدان بەرى ۇيىمداستىرىلىپ كەلەدى. 2020 جىلعا دەيىن ول فەدەراتسيا كۋبوگى دەپ اتالدى. وسى تۋرنيردە ەڭ مول ولجاعا اقش قۇراماسى كەنەلدى. امەريكالىقتار 18 جارىستا الدىنا جان سالمادى. چەحيانىڭ 11 مارتە مەرەيى ۇستەم بولسا, اۋستراليانىڭ التى الاماندا اسىعى الشىسىنان ءتۇستى. جەكەلەگەن تەننيسشىلەر اراسىنان كريس ەۆەرتكە تەڭ كەلەر ەشكىم جوق. حح عاسىردىڭ 70-80 جىلدارى جاسىنداي جارقىلداعان اقش-تىڭ فلوريدا شتاتىنىڭ تۋماسى 8 تۋرنيردە توپ جاردى. ال بيللي دجين كينگتىڭ ءوزى جەتى رەت جەڭىس تويىن تويلادى.
وسىعان دەيىن ەلىمىزدىڭ قۇراماسى اتالعان جارىستىڭ فينالدىق بولگىندە 2022, 2023 جىلدارى ونەر كورسەتتى. بىراق قادامىمىز ءساتتى بولمادى. جەرلەستەرىمىز وسى جولى بارىنشا ناتيجەلى ويىن ورنەگىن كورسەتىپ, ءوز جانكۇيەرلەرىن قۋانتادى دەگەن ويدامىز.