ورال. 11 اقپان. ۆەنگريانىڭ «ەۆوپرو» كومپانياسى قازاقستاننىڭ باتىستاعى قاقپاسى ورال قالاسىندا اۆتوبۋستار قۇراستىرۋدى قولعا الماق. بۇل تۋرالى اتالمىش كومپانيا دەرەكتورى بالاش بودنار ەلىمىزدىڭ كونە دە جاڭا قالاسىنا ارنايى كەلگەن ساپارىندا مالىمدەدى, دەپ حابارلادى egemen.kz ءتىلشىسى.
ب.بودناردىڭ ايتۋىنشا, قازىرگى زامانعى قوعامدىق كولىكتىڭ بىرنەشە ءتۇرىن شىعارۋ كوزدەلگەن. اۆتوبۋستاردىڭ ۇزىندىعى 6,5 – 11 مەتر ارالىعىندا بولماق. ال نەگىزگى قاڭقاسى مەن سۇيەگى كومپوزيتتىك ماتەريالداردان قۇرالادى.
جوبانىڭ تاعى ءبىر ارتىقشىلىعى, ۆەنگريالىق مامانداردىڭ قازاقستانعا اكەلەتىن ونىمدەرى بۇگىنگى پايدالانىلىپ جۇرگەن مەتالل اۆتوبۋستاردان الدەقايا جەڭىل, باعاسى دا ءبىرشاما ارزان. سونىمەن قاتار, ەكونوميكالىق جاعى مەن قولايلىلىعى تۇرعىسىنان دا ۇتىمدى. مۇندا مۇمكىندىگى شەكتەۋلى جانداردىڭ مۇددەلەرى دە ەسكەرىلگەن ەكەن. اۆتوبۋستىڭ كولىك قوزعالقىشى قۋات ۇنەمدەيتىن تەحنولوگياعا نەگىزدەلگەن. ءارى مۇمكىندىگى مەن قاجەتتىلىگىنە قاراي تابيعي گازبەن, جانار-جاعارمايمەن جانە ەلەكتر قۋاتىمەن قوزعالا بەرەدى.
ورال وڭىرىندە ەجەلدەن ماشينا قۇراستىرۋ سالاسى جاقسى دامىعاندىقتان اتىشۋلى ۆەنگريالىق كومپانيانىڭ دا تاڭداۋى ناق وسى ورال قالاسىنا ءتۇسىپ وتىر. مىسالى, مۇنداعى « ورالاگرورەمماش» اكتسيونەرلىك قورىندا تاۋەلسىزدىكتىڭ العاشقى جىلدارىنان بەرى كومۋنالدىق جانە ارنايى تەحنيكا تۇرلەرى قۇراستىرىلىپ كەلەدى. بۇل وتاندىق كاسىپورىننىڭ ۆەنگريالىق «ەۆوپرو» كومپانياسىمەن كەلىسىمى دە بار ەكەن.
بۇعان قوسا, ايماقتا قولايلى ينۆەستيتسيالىق احۋال قالىپتاسقان. ءوز كەزەگىندە, ۆەنگريالىق ارىپتەستەرگە باتىسقازاقستاندىقتار تاراپىنان حالىقارالىق زاڭ نورمالارى شەڭبەرىندە بارلىق قولداۋ مەن كومەك تۇرلەرى كورسەتىلمەك.
تەمىر قۇسايىن.
دەرەك: egemen.kz.
سۋرەت: inform.kz.