Pioneer وتباسىلىق كۋرورتىنىڭ باسشىسى مۇرات قاراتاي ۇكىمەت وتىرىسىندا ينكليۋزيۆتى بالالار كۋرورتىن قۇرۋ تاجىريبەسى تۋرالى ايتىپ, قازاقستاندا وسى باعىتتى ودان ءارى دامىتۋدى ۇسىندى, دەپ حابارلايدى Egemen.kz.
ول رioneer وتباسىلىق ينكليۋزيۆتى كۋرورتى 2015 جىلى الماتى قالاسىنىڭ مەدەۋ اۋدانىندا, قازاقستاننىڭ ەڭ كونە تاۋ شاڭعىسى بەتكەيلەرىنىڭ ءبىرىنىڭ بازاسىندا قۇرىلعانىن اتاپ ءوتتى.
«ەگەر مەملەكەت بازالىق تاۋ ينفراقۇرىلىمىن قامتاماسىز ەتسە, ءالپى ەلدەرىندە عاسىرلار بويى قالىپتاسقان مۇنداي وتباسىلىق بيزنەس-كەيستەر ءبىزدىڭ ەلىمىزدە ودان دا كوپ بولار ەدى. قازاقستان بىرگەگەي تابيعي رەسۋرستارعا يە بولا وتىرىپ, ءدال وسىنداي باعىتتا دامۋى ءتيىس دەپ سەنەمىز. تاۋعا شىعۋ بارلىق بالالار ءۇشىن قولجەتىمدى ءارى قاۋىپسىز بولۋى كەرەك. ءبىزدىڭ باعدارلامالارىمىز ارقىلى 6 مىڭنان استام بالا ءوتتى. 100-دەن استام ينسترۋكتور دايىندادىق. دۇنيەجۇزىلىك بانكتىڭ قولداۋىمەن عىلىمي زەرتتەۋ جۇرگىزىلدى. بۇل – جاي عانا ساندار ەمەس. بۇل – العاش رەت سويلەگەن, جۇرگەن, قارىم-قاتىناسقا تۇسە باستاعان بالالار. بۇل – ءۇمىتى قايتا ويانعان وتباسىلار», دەدى مۇرات قاراتاي.
مۇرات قاراتاي بۇگىندە ەلىمىزدە بالالار مەن وتباسىلىق ءتۋريزمدى دامىتۋ ماسەلەسى وزەكتى ەكەنىن, جىل سايىن ەرەكشە ءبىلىم بەرۋ قاجەتتىلىكتەرى بار بالالار سانى ارتىپ كەلەتىنىن, ولاردىڭ سانى 300 مىڭنان اساتىنىن ايتتى.
ايتا كەتەيىك, الماتى تاۋ كلاستەرى مودەلدى كەڭەيتۋگە, وتباسىلارعا, بالالارعا, قاۋىپسىزدىككە جانە الەۋمەتتىك ينكليۋزياعا باعدارلانعان جاڭا ۇلگىدەگى مامانداندىرىلعان كۋرورتتاردى دامىتۋدا شەشۋشى ءرول اتقارا الادى.
سونىمەن قاتار ول رەسپۋبليكادا ينكليۋزيۆتى جانە بالالار كۋرورتتارىنىڭ جەلىسىن قۇرۋدى, سونداي-اق ينكليۋزيۆتى جانە بالالار ءتۋريزمى بويىنشا ماماندار دايارلاۋدىڭ ۇلتتىق ورتالىعىن قۇرۋدى ۇسىنعان.
قر پرەمەر-ءمينيسترى ولجاس بەكتەنوۆ ۇكىمەت بۇل ماسەلەدە مىندەتتى تۇردە قولداۋ كورسەتەتىنىن اتاپ ءوتتى.
«الماتى تاۋ كلاستەرىن دامىتۋ شەڭبەرىندە بالالار ءتۋريزمى ءۇشىن, ونىڭ ىشىندە ەرەكشە بالالار ءۇشىن ينفراقۇرىلىمدى قامتاماسىز ەتۋ قاجەت», دەپ اتاپ ءوتتى ولجاس بەكتەنوۆ.