وتباسىنىڭ تسيفرلىق كارتاسى (وتسك) – ازاماتتارعا الەۋمەتتىك مارتەبەسىنە بايلانىستى كەپىلدى مەملەكەتتىك قولداۋدىڭ قانداي دا ءبىر ءتۇرىن الۋعا قاتىستى ءتيىستى ورگاندارعا جۇگىنۋدىڭ قاجەتتىلىگىنسىز مەملەكەتتىك قىزمەت كورسەتۋدىڭ پرواكتيۆتى فورماتىنىڭ جاڭا, ءتيىمدى قۇرالى. قولدانىسقا ەنگىزىلگەلى بەرى 133,6 مىڭ ادامعا حابارلاما جولدانسا, 72,3 مىڭ ازامات ءوتىنىش جازباي-اق جاردەماقى مەن تولەم الۋدىڭ يگىلىگىن كورگەن.
ىلكىمدى جوبا مەملەكەتتىك ورگانداردىڭ قولدانىستاعى بارلىق اقپاراتتىق جۇيەلەرىنىڭ دەرەكتەرى نەگىزىندە جۇزەگە اسىرىلادى. بۇگىندە وندا ەلىمىزدىڭ 20 ملن ازاماتى نەمەسە 6,2 ملن-نان استام وتباسى تۋرالى اقپارات جيناقتالعان. وتسك ەنگىزۋدىڭ باستى ماقساتى – ازاماتتارعا مەملەكەتتىك قولداۋ جۇيەسىن قولجەتىمدى ەتۋ. الەۋمەتتىك كودەكستە وتباسىنىڭ تسيفرلىق كارتاسى الەۋمەتتىك ساياساتتىڭ ورتا جانە ۇزاق مەرزىمدى مىندەتتەرى مەن باعىتتارىن ايقىنداۋ قۇرالى ەكەنى جازىلعان. وتسك-ءنىڭ تاعى ءبىر تيىمدىلىگى – ازاماتتاردىڭ الەۋمەتتىك مارتەبەسىنە بايلانىستى كەپىلدەندىرىلگەن مەملەكەتتىك قولداۋدىڭ قانداي دا ءبىر ءتۇرىن الۋعا قۇقىلى ەكەنىن كۇندەلىكتى «ەلەكتروندىق حابارلاما» ارقىلى بىلە الادى.
قازىرگى ۋاقىتتا وتسك مەملەكەتتىك قولداۋدى الۋعا قۇقىعى بار ازاماتتارعا ءتيىستى ورىندارعا بارىپ ەشقانداي ءوتىنىش جازباي-اق جاردەماقىلار مەن الەۋمەتتىك تولەمدەردىڭ 10 ءتۇرىن رەسىمدەۋگە مۇمكىندىك بەرەدى. مىسالى, ەڭبەك ەتۋ قابىلەتىنەن ايىرىلعاندا الاتىن الەۋمەتتىك تولەم, جۇمىسىنان ايىرىلعان جاعدايدا الاتىن الەۋمەتتىك تولەم, اسىراۋشىسىنان ايىرىلۋ بويىنشا الەۋمەتتىك تولەم نەمەسە جاردەماقى, مۇگەدەكتىگى بار بالانى تاربيەلەپ وتىرعان اتا-اناسىنا (قامقورشىسىنا) جاردەماقى, مۇگەدەكتىگى بويىنشا جاردەماقى, كوپبالالى وتباسىلارعا بەرىلەتىن جاردەماقى, «التىن القا», «كۇمىس القامەن» ماراپاتتالعان كوپبالالى انالارعا بەرىلەتىن جاردەماقى, اتاۋلى الەۋمەتتىك كومەك, سونداي-اق جەرلەۋگە ارنالعان بىرجولعى تولەمدى الادى.
سونداي-اق وتباسىنىڭ تسيفرلىق كارتاسى ارقىلى زەينەتاقى تولەمدەرىن الۋ مۇمكىندىگى, «قانداس» مارتەبەسى بەرىلگەندە نەمەسە ۇزارتىلعاندا مارتەبەنىڭ اياقتالۋ مەرزىمى نەمەسە جۇمىسسىز ادامدار ءۇشىن جۇمىسپەن قامتۋ شارالارى تۋرالى حابارلامالار جىبەرىلەدى.
مەملەكەتتىك قولداۋ شارالارىن الۋعا قۇقىق بەلگىلەنگەن كەزدە الەۋمەتتىك جاردەمدى الۋشىعا 1414 بىرىڭعاي بايلانىس ورتالىعىنان SMS-حابارلاما كەلەدى. حابارلاما العان ازامات وعان كەلىسىمى تۋرالى جاۋاپ بەرۋى كەرەك. ءوتىنىشتى رەسىمدەۋ, الەۋمەتتىك جاردەماقى نەمەسە تولەم تاعايىنداۋ اۆتوماتتى رەجىمدە جۇرگىزىلەدى, سودان كەيىن اقشا قاراجاتى الۋشىنىڭ بانك شوتىنا اۋدارىلادى.
ەڭبەك جانە حالىقتى الەۋمەتتىك قورعاۋ مينيسترلىگى الاياقتىققا ۇرىنباس ءۇشىن 1414 بىرىڭعاي بايلانىس ورتالىعىنان كەلىپ تۇسكەن SMS-كە جاۋاپ بەرۋ قاجەتتىگىن ەسكەرتەدى.