مادەنيەت جانە اقپارات ۆيتسە-ءمينيسترى ەۆگەني كوچەتوۆتىڭ قاراعاندى وبلىسىنا جۇمىس ساپارى بارىسىندا جەرگىلىكتى كرەاتيۆتى يندۋستريا وكىلدەرىمەن كەزدەسۋ ءوتتى, دەپ حابارلايدى Egemen.kz.
قاراعاندى وبلىسىندا جالپى 2161 كرەاتيۆتى يندۋستريا سۋبەكتىسى تىركەلگەن. ەڭ كەڭ تارالعان سالا قاتارىندا IT-تەحنولوگيالار, مەتالل جانە تاستان بۇيىمدار ءوندىرۋ, ارحيتەكتۋرا, كينو جانە تۆ-پروداكشن, ەتنو-فەشن باعىتى بار. قازىرگى ۋاقىتتا وڭىردە كرەاتيۆتى حاب قۇرۋ جۇمىستارى جۇرگىزىلىپ جاتىر.
كەزدەسۋ بارىسىندا سالانىڭ وزەكتى ماسەلەلەرى تالقىلاندى. اتاپ ايتقاندا, كورمە الاڭدارىن ۇسىنۋ, كرەاتيۆتى تاۋارلار مەن قىزمەتتەردى كوممەرتسيالاندىرۋ جانە ەكسپورتتاۋ ماسەلەلەرى قوزعالدى.
ەۆگەني كوچەتوۆ قازىرگى ۋاقىتتا اتالمىش ەكونوميكالىق سەكتوردى مەملەكەتتىك قولداۋدىڭ ەكىنشى پاكەتى قاراستىرىلىپ جاتقانىن اتاپ ءوتتى.
ەسكە سالا كەتەيىك, بيىل كرەاتيۆتى يندۋستريالاردى قولداۋ جانە دامىتۋ ماسەلەلەرى بويىنشا زاڭ قابىلدانعان بولاتىن. سونىمەن قاتار بيۋدجەت كودەكسى بەكىتىلدى. ەندى ۇلتتىق لوتەرەيا وپەراتورى تابىسىنىڭ 3%-ى توقسان سايىن كرەاتيۆتى يندۋستريالاردى دامىتۋعا قولداۋ كورسەتۋ جونىندەگى كورپوراتيۆتىك قورىنا بولىنەتىن بولادى. قور وسى جىلدىڭ شىلدە ايىندا جۇمىسىن باستايدى.