شۆەيتساريانىڭ ەنگادين قالاسىندا فريستايل-اكروباتيكادان الەم چەمپيوناتى باستالدى. جارىستىڭ العاشقى كۇنى ايانا جولداس, دىنمۇحاممەد رايىمقۇلوۆ, اسان اسىلحان ارالاس كوماندالىق سايىستى جەتىنشى ورىنمەن قورىتىندىلادى. باس جۇلدە اقش-قا بۇيىردى, كۇمىس پەن قولا مەدالدى ۋكراينا مەن شۆەيتساريا ەنشىلەدى.
گەرمانيانىڭ شتۋتگارت قالاسىندا وتكەن تۋرنيردە گيمناست زەينوللا ىدىرىسوۆ اسقان شەبەرلىگىمەن كوزگە ءتۇستى. «ات» جاتتىعۋىندا 14,066 ۇپاي جيناپ, باس جۇلدەنى ولجالادى. ەكىنشى, ءۇشىنشى ورىنداردى يتاليالىق ەدواردو دە روسسو (13,966) مەن جاپونيالىق ريوسۋكە دويگە (13,766) يەلەندى.
ەلىمىزدىڭ تەننيسشىسى دميتري پوپكو مەكسيكانىڭ مورەليا قالاسىندا وتكەن ATP Challenger 125 تۋرنيرىندە توپ جاردى. الەمدىك رەيتينگتە 245-ورىنعا تۇرعان جەرلەسىمىز فينالدا تىزىمدە 95-ساتىعا جايعاسقان اۋستراليانىڭ وكىلى دجەيمس داكۆورتتى ۇتتى. 1 ساعات 47 مينۋتقا سوزىلعان سايىس 1:6, 6:2, 6:4 ەسەبىمەن اياقتالدى. باسەكە بارىسىندا د.پوپكو سەگىز ەيس جاساپ, التى برەيك-پوينتتىڭ ۇشەۋىن ءساتتى پايدالاندى.
فۋتزالدان جاستار اراسىنداعى ەۋروپا چەمپيوناتىنىڭ (U-19) ىرىكتەۋ تۋرنيرىندە ەلىمىزدىڭ قۇراماسى فرانتسياعا ەسە جىبەردى. پورتۋگاليادا وتكەن ماتچ 1:3 ەسەبىمەن اياقتالدى. جەڭىمپازدار قاتارىنان يۋنەس وۋبريك, ەيۋبە موحامەد ادام, ەليوتت كولسكي گول سوقسا, جەرلەستەرىمىزدىڭ اراسىنان ءالازيز كامالوۆ مەرگەندىك تانىتتى. پاۋلو ريكاردو كاكا جاتتىقتىراتىن كوماندا بۇگىن پورتۋگاليامەن كەزدەسەدى, ەرتەڭ بەلارۋسكە قارسى وينايدى.