پاراقور پوليتسەيلەر

8 جىلعا باس بوستاندىعىنان ايىرىلىپ, اباقتىعا قامالدى سوتتالۋشىلار ىزدەۋدە جۇرگەن جەڭىل كولىكتەردى ەل اۋماعى ارقىلى زاڭسىز الىپ وتۋگە جاردەمدەسكەن ۇلتتىق قاۋىپسىزدىك دەپارتامەنتى وكىلدەرىنە پارا بەرمەك بولعان. مامليۋت اۋداندىق ىشكى ىستەر ءبولىمى باستىعىنىڭ ورىنباسارى ق.بەكەنوۆ قىرعىزستان ازاماتىنىڭ ينتەرپول ىزدەۋ سالعان كولىكتەردى بىشكەك قالاسىنا تاسىمالداپ جۇرگەنىن سەزىپ, الىم تالاپ ەتۋ ارەكەتىنە كىرىسكەن. ارام ويىن وبلىستىق ىشكى ىستەر دەپارتامەنتى باسقارماسىنىڭ جەدەل ۋاكىلى م.مۇحامەدجانوۆپەن بىرگە جۇزەگە اسىرىپ, ودان قوماقتى پارا الىپ وتىرعان. ول ءۇشىن «جاڭاجول» كولىكتىك باقىلاۋ بەكەتىنەن قىمبات كولىكتەردى ەش كەدەرگىسىز وتكىزىپ, شەتەلدىك ۆاليۋتامەن ەسەپ ايىرىسقان. ءار كولىك ءۇشىن 500 اقش دوللارى مولشەرىندە الىم بەلگىلەگەن. قىرعىز رەسپۋبليكاسىنىڭ تۇرعىنى يشيموۆتىڭ كونتراباندالىق جۇك تاسۋمەن 2013 جىلدان بەرى اينالىسقانىن ەسەپتەيتىن بولساق, قانشا «پايداعا» كەنەلگەنىن باعامداي بەرىڭىز. ۇلتتىق قاۋىپسىزدىك كوميتەتى وبلىستىق باسقارماسى شەتەلدىك ازاماتتىڭ زاڭسىز ارەكەتىنە توس­قاۋىل قويىپ, «تەمىر تۇلپارلار­دى» تاركىلەگەننەن كەيىن وڭاي ولجا­د­ان ايىرىلماۋدى كوزدەگەن ول تاعى دا ەكەۋىنىڭ «كومەگىنە» جۇگىنگەن. ولار تاركىلەنگەن كولىكتەردى كەرى قايتارۋ ماقساتىمەن ۇلتتىق قاۋىپسىزدىك دەپارتامەنتىنىڭ قىزمەتكەرلەرىنە 10 مىڭ دوللار پارا ۇسىنعان. وبلىستىق سوت سوتتالعانداردىڭ اپەللياتسيالىق شاعىمدارىن قانا­عات­تاندىرۋسىز قالدىردى. باقىت رامازان, جۋرناليست. سولتۇستىك قازاقستان وبلىسى.