پرەزيدەنت تاپسىرماسىمەن ەكىباستۇزدا اشىلعان «سامعاۋ» بالالار شىعارماشىلىعى ورتالىعى قالا بالالارىنا شىعارماشىلىق قابىلەتتەرىن دامىتۋعا ەرەكشە مۇمكىندىكتەر ۇسىنادى. ورتالىق 9 مىڭنان استام جاس تالانتتى, سونىڭ ىشىندە ەرەكشە قاجەتتىلىكتەرى بار بالالاردى دا قابىلداي الادى.
«سامعاۋ» ورتالىعىندا ءتۇرلى شەبەرلىك ساباقتارى مەن شىعارماشىلىق دارىستەر وتكىزەتىن 50-دەن استام بىلىكتى پەداگوگ جۇمىس ىستەيدى. ورتالىق ەكىباستۇز قالاسى بالالارىنىڭ 70%-نا دەيىن قوسىمشا بىلىممەن قامتىپ, ولاردىڭ قابىلەتتەرىن اشىپ, شىعارماشىلىق الەۋەتىن جۇزەگە اسىرۋعا كومەكتەسەدى.
ءبىرىنشى قاباتتا بي جانە تەاتر زالدارى, سونداي-اق جەكە مۋزىكا دارىستەرىنە ارنالعان بولمەلەر مەن 275 ورىندىق كورەرمەن زالى ورنالاسقان. بالالار حورەوگرافيامەن, تەاتر ونەرىمەن, ۆوكالمەن, اسپاپتا ورىنداۋ شەبەرلىگىمەن اينالىسا الادى.
ەكىنشى قاباتتا بيولوگيا زەرتحاناسى, لاندشافتىق ارحيتەكتۋرا مەن فلوريستيكالىق ديزاين ستۋديالارى, دەبات, مەديا ورتالىقتار, سونداي-اق fashion-ستۋديا بار. ءۇشىنشى قابات تولىعىمەن IT-تەحنولوگيالارعا ارنالعان: مۇندا روبوتتەحنيكا مەن كومپيۋتەرلىك مودەلدەۋ كلۋبتارى ورنالاسقان.
سونىمەن قاتار ورتالىقتا پسيحولوگيالىق-پەداگوگيكالىق قولداۋ كابينەتتەرى, ۇستەل تەننيسى ايماقتارى, جاتتىعۋ زالى بار.