پاريجدە يۋنەسكو-نىڭ حاتشىلىعىنا ادامزاتتىڭ ماتەريالدىق ەمەس مادەني مۇراسىنىڭ تىزىمىنە ەنگەن توعىزقۇمالاق ويىنىنىڭ تاقتاسى تارتۋ ەتىلدى. يگى ءىس ەلىمىزدىڭ يۋنەسكو-داعى تۇراقتى وكىلدىگىنىڭ قولداۋىمەن جۇزەگە استى.
دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ يۋنەسكو-نىڭ ماتەريالدىق ەمەس مادەني مۇرانى قورعاۋ جونىندەگى كونۆەنتسيا حاتشىسى فۋميكو وحيناتامەن كەزدەستى. كەزدەسۋدە ءا.بايمەنوۆ 2020 جىلى توعىزقۇمالاق ويىنىن ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك تىزىمىنە ەنگىزىلۋىنە قولداۋ كورسەتكەنى ءۇشىن العىس ايتتى. كونە ويىننىڭ تاريحىنان قۇلاعدار ەتىپ, بۇگىنگى دامۋ ۇدەرىسىن دە تانىستىردى. توعىزقۇمالاق حالقىمىزدىڭ مادەني مۇراسى سانالاتىنىن, زياتكەرلىك ويىن وركەن جايىپ كەلە جاتقانىن جەتكىزدى.
كەزدەسۋ بارىسىندا ءا.بايمەنوۆ يۋنەسكو حاتشىلىعىنا توعىزقۇمالاق تاقتاسىن سىيعا تارتتى. بىلتىر استانا قالاسىندا V دۇنيەجۇزىلىك كوشپەلىلەر ويىندارى قارساڭىندا عارىشقا جەتكىزىلگەن تۇزدىقتى تابىس ەتتى.
يۋنەسكو وكىلدەرىن زياتكەرلىك ويىننىڭ ەرەجەسىمەن تانىستىرىپ, جولداستىق سايىس وتكىزدى.
بىلتىر حالىقارالىق توعىزقۇمالاق فەدەراتسياسىنىڭ ۇيىمداستىرۋىمەن چەحيادا الەم كۋبوگى تۇڭلىگىن ءتۇردى. سونداي-اق V دۇنيەجۇزىلىك كوشپەلىلەر ويىندارىندا توعىزقۇمالاق سايىسىنا 41 مەملەكەتتەن 114 سپورتشى قاتىسىپ, باعىن سىنادى. رۋمىنيادا جاستار اراسىندا الەم كۋبوگى, تۇركيادا الەم چەمپيوناتى ءوتتى. موڭعوليا مەملەكەتى توعىزقۇمالاقتان جاسوسپىرىمدەر اراسىندا حالىقارالىق ءتۋرنيردى جوعارى دەڭگەيدە ۇيىمداستىردى. توعىزقۇمالاق ويىنى ءار قۇرلىقتا قارقىندى دامىپ كەلەدى, فەدەراتسيالار كوپتەپ اشىلىپ جاتىر. ەلىمىزدە زياتكەرلىك ويىنعا باۋليتىن 5 681 ۇيىرمە بار. 200 مىڭعا جۋىق ادام توعىزقۇمالاق ويىنىن شەبەر مەڭگەرگەن, تۇراقتى شۇعىلدانادى, 2 556 جاتتىقتىرۋشى تىركەلگەن.