قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ اتقارۋشى ديرەكتورى, ەلشى گۋن تسزيانۆەيدى ونىڭ ءوتىنىشى بويىنشا قابىلدادى.
سەنات توراعاسى بەلگىلى قىتاي ديپلوماتىن جوعارى لاۋازىمعا تاعايىندالۋىمەن قۇتتىقتاي كەلىپ, قىتايدىڭ اوسشك-گە تابىستى توراعالىق ەتكەنىن اتاپ ءوتتى. سونىڭ ارقاسىندا بۇل فورۋم بەدەلگە يە بولدى جانە قاۋىپسىزدىكتى قامتاماسىز ەتۋدە ازيا قۇرلىعىنداعى ماڭىزدى فاكتورعا اينالدى.
ق.توقاەۆ شانحايدا وتكەن ازياداعى سەنىم شارالارى مەن ىنتىماقتاستىقتى نىعايتۋدىڭ ءىس جۇزىندەگى تەتىكتەرى ازىرلەنگەن اوسشك-ءنىڭ 4-ءشى ءسامميتىن مەملەكەت باسشىسى ن.ءا.نازارباەۆ جوعارى باعالايتىنىن اتاپ ءوتتى.
گۋن تسزيانۆەي اوسشك-ءنى ودان ءارى دامىتۋ جوسپارى جانە ونى ازياداعى قاۋىپسىزدىك جانە دامۋ ۇيىمىنا وزگەرتۋ مۇمكىندىگى تۋرالى حاباردار ەتتى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.