بۇگىن پارلامەنت سەناتىنىڭ سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وندا سەناتورلار دەنە شىنىقتىرۋ جانە سپورت, ارتىق زاڭنامالىق رەگلامەنتتەۋدى بولعىزباۋ ماسەلەلەرىنە قاتىستى زاڭدى قارادى. سونداي-اق ولار وزدەرىنىڭ دەپۋتاتتىق ساۋالدارىن جولدادى, دەپ حابارلايدى Egemen.kz.
وتىرىس بارىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت, سونداي-اق ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ەكى وقىلىمدا قارادى. اتالعان زاڭ سپورتتىڭ باسىم تۇرلەرىن ايقىنداۋعا, ولاردى قارجىلاندىرۋعا جانە دەنە شىنىقتىرۋ جانە سپورت سۋبەكتىلەرىمەن ءوزارا ءىس-قيمىلعا باعىتتالعان. سونداي-اق قۇجات نورمالارى دەنە شىنىقتىرۋ جانە سپورت سالاسىن رەتتەۋدىڭ نورماتيۆتىك نەگىزىن تۇجىرىمدامالىق تۇرعىدان وزەكتەندىرۋگە مۇمكىندىك بەرەدى جانە ۇلتتىق زاڭنامانى, ونىڭ قۇقىق قولدانۋ پراكتيكاسىن ودان ءارى جەتىلدىرۋگە ىقپال ەتەدى.
«سوڭعى جىلداردا ەلىمىزدە سپورت سالاسىن دامىتۋعا باسا ءمان بەرىلىپ كەلەدى. پرەزيدەنتىمىز قاسىم-جومارت كەمەل ۇلى توقاەۆ ۇلتتىق قۇرىلتايدىڭ IV وتىرىسىندا سپورتتى دامىتۋ ماسەلەسىنە ەرەكشە كوڭىل ءبولدى. بۇگىن قارالعان زاڭ – سپورت سالاسىن باسقارۋدى جەتىلدىرۋ باعىتىندا ىسكە اسىرىلىپ جاتقان ماڭىزدى قادامداردىڭ ءبىرى. زاڭدا سپورت سالاسىنا بولىنەتىن بيۋدجەت قاراجاتىن ءتيىمدى پايدالانۋدى قامتاماسىز ەتەتىن ەرەجەلەر قامتىلدى. ۇلتتىق سپورت تۇرلەرى باسىم سپورت تۇرلەرىنىڭ قاتارىنا قوسىلدى. سپورتشىلار مەن باپكەرلەرگە مەملەكەتتىك الەۋمەتتىك قولداۋ كورسەتۋ ءتارتىبىن جەتىلدىرۋگە ارنالعان جەكەلەگەن تۇزەتۋلەر دە ەنگىزىلدى. ماقۇلدانعان زاڭ سالاماتتى ءومىر سالتىن ناسيحاتتاۋعا, ازاماتتاردى, اسىرەسە, بالالاردى سپورتقا باۋلۋعا جانە جوعارى سپورتتىق جەتىستىكتەرگە قول جەتكىزۋگە وڭ سەپتىگىن تيگىزەدى دەپ سەنەمىز», دەدى ماۋلەن اشىمباەۆ.
اتالعان قۇجاتتا ۇلتتىق سپورتتىق مەديتسينا جانە وڭالتۋ ۇيىمىنىڭ قىزمەتىن زاڭنىڭ جەكە بابىندا رەگلامەنتتەۋ كوزدەلگەن. وزگەرىستەر رەسپۋبليكالىق جانە وڭىرلىك سپورت فەدەراتسيالارىنىڭ مارتەبەسىنە دە اسەر ەتەدى. ناقتى ايتقاندا, ولار ۇلتتىق سپورت فەدەراتسيالارى بولىپ وزگەرتىلەدى.
سونداي-اق بالالار-جاسوسپىرىمدەر سپورتتىق ءبىلىم بەرۋ ۇيىمدارىنىڭ جاتتىقتىرۋشى-وقىتۋشىلارى ءۇشىن اپتاسىنا 18 ساعاتتىق نورماتيۆتىك وقۋ جۇكتەمەسى ەنگىزىلەدى. ال, قازاقستان ازاماتى بولىپ تابىلمايتىن سپورتشىلاردى بيۋدجەت قاراجاتى ەسەبىنەن قارجىلاندىرۋعا تىيىم سالىنادى.
بۇدان باسقا, بىرقاتار سالالىق زاڭداردىڭ زاڭنامالىق اكتىلەردىڭ ماقساتتارىن, مىندەتتەرى مەن قاعيداتتارىن ايقىنداۋ بولىگىنە وزگەرىستەر مەن تولىقتىرۋلار ەنگىزىلەدى.
سونىمەن قاتار پالاتا وتىرىسىندا سەناتور اندرەي لۋكين دەپۋتاتتىق ساۋال جولداعان. ول جەر رەسۋرستارىن پايدالانۋدى مەملەكەتتىك باقىلاۋ سالاسىنداعى پروبلەمالارعا نازار اۋدارىپ, اتالعان تۇيتكىلدەردى جويۋعا قاتىستى ناقتى شارالار ۇسىنعان. ونىڭ ىشىندە جەر رەسۋرستارىن باسقارۋ جونىندەگى كوميتەتتى تاراپتاردىڭ ءبىرى ونىڭ اۋماقتىق ورگاندارى بولعان سوت اكتىلەرىنە اي سايىنعى مونيتورينگ جۇرگىزۋگە جانە انىقتالعان بۇزۋشىلىقتاردى جەدەل جويۋعا مىندەتتەۋ جونىندە ۇسىنىس بار.