ەلىمىزدە الەۋمەتتىك كودەكس شەڭبەرىندە ءبىلىم بەرۋ ۇيىمدارىنىڭ تۇلەكتەرىن جۇمىسپەن قامتۋدى قامتاماسىز ەتۋدە كوپتەگەن ءىس-شارا ىسكە اسىرىلادى. سونىڭ ءبىرى – «جاستار پراكتيكاسى». وقۋ ورنىن بىتىرگەن تۇلەكتەردىڭ ءوز ماماندىعى بويىنشا العاشقى جۇمىسقا ورنالاسۋىنا باعىتتاۋ ءۇشىن ەڭبەك موبيلدىلىگى ورتالىعى ءبىر جىلعا دەيىنگى مەرزىمگە جاستار پراكتيكاسىن ۇيىمداستىرادى.
2023 جىلى ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعىمەن بەكىتىلگەن قاعيداعا سايكەس ءبىلىم بەرۋ ۇيىمدارىن 5 جىل ىشىندە بىتىرگەن ءارى 35 جاستان اسپاعان جۇمىسسىز تۇلەكتەر جاستار پراكتيكاسىنا قاتىسا الادى. سالىقتار, مىندەتتى زەينەتاقى جارناسى سىندى الەۋمەتتىك اۋدارىمداردى ەسكەرە وتىرىپ, ەڭبەكاقى سوماسى 30 ايلىق ەسەپتىك كورسەتكىش مولشەرىندە بولماق. جاستار پراكتيكاسىنا قاتىسۋعا ىقىلاس تانىتقان تۇلەك ءوزىنىڭ تۇرعىلىقتى جەرى بويىنشا مانساپ ورتالىعىنا ءوتىنىش جازىپ, قاجەتتى قۇجاتىن وتكىزسە جەتكىلىكتى.
«ەڭبەك» مەملەكەتتىك باعدارلاماسىنىڭ ءىىى باعىتى سانالاتىن «جاستار پراكتيكاسى» ارقىلى بىلتىر 33,3 مىڭ ادام جۇمىسقا ورنالاستى. حالىقتى جۇمىسپەن قامتۋدى نىعايتۋ ماقساتىندا قولعا الىنعان يگى باستاما اياسىندا جۇمىس بەرۋشى جاستارعا كاسىبي ءبىلىم مەن جۇمىس تاجىريبەسىن ۇيرەتۋ ءۇشىن ارنايى تالىمگەر دە بەكىتەدى.
«جاستار پراكتيكاسىن» قارجىلاندىرۋدى ەڭبەك موبيلدىلىگى ورتالىعى «ازاماتتارعا ارنالعان ۇكىمەت» مەملەكەتتىك كورپوراتسياسىمەن بىرلەسە اي سايىنعى جالاقى تولەۋ ارقىلى جۇزەگە اسىرادى. «جاستار پراكتيكاسى» بويىنشا ورتاشا جالاقى مولشەرى 109,5 مىڭ تەڭگە بولسا, ەڭ جوعارى سوما اقتوبە وبلىسىندا – 120,9 مىڭ تەڭگە.
بىلتىر «جاستار پراكتيكاسى» بويىنشا جۇمىسقا ورنالاستىرۋ كورسەتكىشى تۇركىستان وبلىسىندا جوعارى بولدى – 8,6 مىڭ ادام, ودان كەيىن قىزىلوردا وبلىسى – 3,2 مىڭ, جامبىل وبلىسى –2,6 مىڭ, شىمكەنت قالاسى 2,4 مىڭ ادام.
باعدارلاما ارقىلى جۇمىسقا ورنالاستىرىلعاندار اراسىندا ەڭ كوپ سۇرانىسقا يە ماماندىقتار مىناداي: مەيىرگەر – 2 216, باستاۋىش سىنىپ مۇعالىمى – 1 498, زاڭگەر – 1 481, دەنە شىنىقتىرۋ مۇعالىمى – 1 323, فەلدشەر – 1 277 ادام.