ءبۇتىن ءبىر ءداۋىر ەدى...

ول قىرعىزستاننىڭ بىشكەك (بۇرىنعى فرۋنزە) قالاسىندا دۇنيەگە كەلگەن. سوندا ەرجەتىپ, پەداگوگيكا سالاسىندا كەڭەس وداعىنداعى ەڭ جاس عىلىم كانديداتى اتانعان. كەيىن فيلوسوفيا عىلىمدارىنىڭ دوكتورى بولدى. 80-جىلداردىڭ سوڭىندا الدىمەن قىرعىزستاندا, كەيىن قازاقستاندا كاسىپكەرلىكپەن اينالىسا باستادى.

ەۋرازيالىق ونەركاسىپ قا­ۋىم­داستىعىن (ەوق) قۇرۋ­شى­لار­دىڭ ءبىرى رەتىندە قازاق­ستاننىڭ مەتاللۋرگيا, ەنەر­گەتيكا مەن كولىك تاسىمالى سا­لالارىنداعى بىرقاتار ءىرى ونەر­كاسىپ كاسىپورىندارىن بىرىك­تىردى. بۇگىندە بۇل قۇرىلىم Eurasian Resources Group (ERG) اتالادى. Aلەكساندر انتونوۆيچ ۇزاق جىلدار بويى كومپانيانى باسقارىپ, دامىتۋعا سۇبەلى ۇلەس قوستى. 2014–2024 جىلدار ارالىعىندا ERG ديرەكتورلار كەڭەسىنىڭ توراعاسى بولدى.

وسى مەرزىم ىشىندە اۋقىمدى جۇمىس اتقارىلىپ, كوپتەگەن ينۆەستيتسيالىق جوبا جۇزەگە اسىرىلدى. ەلدەگى بىردەن-ءبىر جوعارى ساپالى باستاپقى اليۋميني ءوندىرۋشى – قازاقستان ەلەكتروليز زاۋىتى سالىندى. اقتوبە فەرروقورىتپا زاۋىتىنىڭ №4 بالقىتۋ تسەحى ىسكە قوسىلدى. سونىڭ ارقاسىندا كاسىپورىن فەرروحروم وندىرىسىندەگى الەمدىك كوشباسشىلار قاتارىنا كىردى.

ا.ماشكەۆيچ ۇزاق جىلدار بويى «ەۋرازيالىق بانك» اق ديرەكتورلارى كەڭەسىنىڭ تور­اعاسى دا بولدى. ول جەتەكشىلىك ەتكەن تۇستا اتالعان قارجى ينس­تيتۋتى قازاقستاننىڭ بانك قىز­مەتتەرى سالاسىنداعى كوشباس­شىلاردىڭ بىرىنە اينالدى.

ا. ماشكەۆيچ قازاقستان ەكونوميكاسىن, اسىرەسە تاۋ-كەن مەتاللۋرگيا سەكتورىن دامىتۋعا زور ۇلەس قوستى. شيرەك عاسىر­دان استام ۋاقىت بويى قازاق­ستان رەسپۋبليكاسى پرەزيدەنتى­نىڭ جانىنداعى شەتەلدىك ين­ۆەستورلار كەڭەسىنىڭ مۇشەسى بولدى. كەڭەستىڭ جالپى وتىرىس­تا­رىندا ەلدەگى وزەكتى ساياسي جانە ەكونوميكالىق ماسەلەلەردى تال­قىلاۋعا, قابىلدانعان شەشىم­دەردى ىسكە اسىرۋعا بەلسەنە اتسالىستى. الەكساندر انتونوۆيچ ەكونوميكا, ونەركاسىپ, عىلىم مەن مادەنيەت سالالارىنداعى حا­لىقارالىق فورۋمدارعا ۇدايى قاتىسىپ ءجۇردى. وزەكجاردى پىكىرلەرى ۇنەمى قوعامدىق رەزونانس تۋدىرىپ, ەڭ كىرپياز تىڭدارماننىڭ دا كوڭىلىنەن شىعىپ جاتاتىن. ونىڭ ءوندىرىستى جاڭعىرتۋ مەن كورپوراتيۆتىك باسقارۋدى جەتىلدىرۋگە قا­تىس­تى ۇسىنىستارى ەڭ وزىق حا­لىقارا­لىق تاجىريبەلەر مەن تەحنولوگيالاردى قول­دانۋعا ۇمتىلاتىن ERG كاسىپ­ورىندارىندا ناقتى كورىنىس تاپتى.

2000 جىلى ا. ماشكەۆيچتىڭ باستاماسىمەن قازاقستانداعى ەۆرەيلەر كونگرەسى قۇرىلدى. ول ەۋرازيالىق جانە قازاقستان ەۆرەيلەر كونگرەستەرىنە جەتەكشىلىك ەتتى. ماقساتى – ەتنوسارالىق جانە دىنارالىق ديالوگتى نىعاي-تۋ ەدى.

ا.ماشكەۆيچتىڭ قامقورلى­عىمەن كوپتەگەن الەۋمەتتىك جانە ءبىلىم بەرۋ باستامالارى ءساتتى ىسكە استى. ەلدەگى توسىن اپاتتار كەزىندە ونىڭ تىكەلەي تاپسىرماسىمەن ERG العاشقى بولىپ قاراجات بولگەنى – Aلەكساندر ءانتونوۆيچتىڭ جومارتتىعىنىڭ ايعاعى.

قازاقستاننىڭ الەۋمەتتىك-ەكونوميكالىق دامۋىنا ەلەۋلى ۇلەس قوسقانى ءۇشىن «قۇرمەت» (2001 جىل), «پاراسات» (2016), ءىىى دارەجەلى «بارىس» (2021) وردەندەرىمەن ماراپاتتالدى. قازاقستان رەسپۋبليكاسى تا­ۋەلسىزدىگىنىڭ 30 جىلدىعى قار­ساڭىندا ەلدىڭ الەۋمەتتىك-ەكونو­مي­كالىق دامۋىنا سىڭىرگەن زور ەڭبەگى ءۇشىن ءى دارەجەلى «بارىس» (2021) وردەنىنە يە بولدى.

جانى جومارت, جۇرەگى كەڭ, ۇشقىر ويلى ازامات ور­تا­سىنا سىيلى ەدى. ERG كا­سىپ­ورىندارىنىڭ جۇمىس­كەر­لەرى ا. ماشكەۆيچتى كاسىبي بىلىك­تىلىگى مەن اسىل ادامگەرشىلىك قاسيەتتەرى ءۇشىن ەرەكشە قادىرلەپ, قۇرمەتتەيتىن.

ERG-ءدىڭ مىڭداعان ەڭبەك ۇجىمى Aلەكساندر انتونوۆيچ ماشكەۆيچتىڭ قازاسىنا بايلانىستى جان جارى – لاريسا ۆاسيلەۆنا مەن تۋعان-تۋىستارىنا قايعىلارىنا ورتاقتاسىپ كوڭىل ايتادى.

الەكساندر انتونوۆيچ سانالى عۇمىرىن ادامدارعا باقىت سىيلاۋ جولىنا سارپ ەتتى. جارقىن بەينەسى مەن رياسىز كۇلكىسى ونى بىلەتىن ادامداردىڭ جادىندا ءاردايىم ساقتالادى.

Eurasian Resources Group