فۋتبولدان كەلەسى جىلى وتەتىن الەم چەمپيوناتىنا ىرىكتەۋ باستالدى. العاشقى ماتچ ەلىمىزدىڭ ۇلتتىق قۇراماسى ءۇشىن ءساتسىز بولدى. سىرت الاڭدا ۋەلس ۇلتتىق قۇراماسىنا 3:1 ەسەبىمەن ەسە جىبەردى.
باس باپكەردىڭ مىندەتىن اتقارۋشى ءالي اليەۆ ماتچتان كەيىنگى ءباسپاسوز جيىنىندا جىگىتتەردىڭ تەگىس جەردە ءسۇرىنىپ, ورەسكەل جاڭساقتىق جىبەرگەنىن ايتتى. راسىندا 9-مينۋتتا ۋەلس قۇراماسىنىڭ جارتىلاي قورعاۋشىسى دەنيەل دجەيمس ۇتىمدى ءساتتى وڭتايلى پايدالانىپ, ەنشىسىنە گول جازدى. انگليانىڭ «ليدس يۋنايتەد» كلۋبىنىڭ لىپىپ تۇرعان ويىنشىسىن ءبىزدىڭ قورعاۋشىلار كوگەندەي المادى. 32-مينۋتتا پەنالتيدەن ۇلتتىق قۇرامانىڭ كاپيتانى اسحات تاعىبەرگەن تارازى باسىن تەڭەستىرگەنىمەن, ەكىنشى تايم باستالعان ساتتە-اق (47-مينۋتتا) «توتتەنحەم» كلۋبىنىڭ قورعاۋشىسى بەنجامين دەۆيس ناتيجەنى ەسەلەدى. ءۇشىنشى گولدى شوتلانديانىڭ «رەيندجەرس» كلۋبىنان گەرمانيانىڭ «گاننوۆەر» كلۋبىنا سارشا تامىزعا دەيىن جالعا بەرىلگەن روببي ماتوندو 90-مينۋتتا سوقتى.
ۋەلسكە قارسى ماتچتا داستان ساتباەۆ ۇلتتىق قۇرامانىڭ ساپىنداعى تۇساۋكەسەر ويىنىن وتكىزىپ, ەڭ جاس فۋتبولشى اتاندى. 22 ناۋرىز كۇنى «كارديفف سيتي» ستاديونىندا وتكەن ويىندا الاڭعا شىققان داستان 16 جاستان 7 اي 11 كۇن استى. بۇعان دەيىن جامبىل كوكەەۆ 2006 جىلدىڭ 28 اقپانىندا فينليانديا ۇلتتىق قۇراماسىنا قارسى ويىندا 17 جاستان 5 اي 8 كۇن اسقاندا الاڭعا شىققان بولاتىن.
فۋتبولشىلارىمىز الەم چەمپيوناتىنا ىرىكتەۋ اياسىنداعى ەكىنشى تۋردى دا سىرت الاڭدا وتكىزىپ, ليحتەنشتەين ۇلتتىق قۇراماسىن 0:2 ەسەبىمەن ۇتتى. 42-مينۋتتا ماكسيم سامورودوۆ ەسەپ اشسا, 45-مينۋتتا الەكساندر ماروچكين ناتيجەنى ەسەلەدى. فيفا-نىڭ رەيتينگىندە كوش سوڭىندا ياعني 204-ورىندا تۇرعان ليحتەنشتەين ۇلتتىق قۇراماسىنان باسىم تۇسەتىنىمىز ايدان انىق ەدى. ويىندى قورىتىندىلاعان باس باپكەردىڭ مىندەتىن اتقارۋشى ءالي اليەۆ قولداۋ كورسەتكەن جانكۇيەرلەرگە العىسىن جەتكىزىپ, بۇل جەڭىسكە توقمەيىلسۋگە بولمايتىنىن ايتتى. ەلىمىزدىڭ ۇلتتىق قۇراماسى رەسمي ماتچتاردا سوڭعى رەت 2023 جىلدىڭ 17 قاراشاسىندا جەڭىسكە جەتىپ, ءوز الاڭىمىزدا سان-مارينو قۇراماسىن 3:1 ەسەبىمەن ۇتقان ەدى. الەم چەمپيوناتىنا ىرىكتەۋ كەزەڭدەرىندە سوڭعى رەت 2013 جىلى ءوز الاڭىمىزدا فارەر ارالدارى ۇلتتىق قۇراماسىن 2:1 ەسەبىمەن ۇتتى.
سىرتتاعى ەكى ماتچ ۇلتتىق قۇراما ويىنشىلارىنىڭ دايىندىعى قانشالىقتى ەكەنىن باعامداپ بەردى. J توبىندا ەكى تۋردان كەيىن ازىرگە سولتۇستىك ماكەدونيا مەن ۋەلس قۇرامالارى 4 ۇپايمەن كوش باستاپ تۇر. 3 ۇپاي ولجالاعان ءبىزدىڭ ۇلتتىق قۇراما 3-ساتىعا ورنىقتى. كەلەسى ماتچتى ءوز الاڭىمىزدا وتكىزىپ, 9 ماۋسىمدا سولتۇستىك ماكەدونيا قۇراماسىن قابىلدايدى.