قازاقستان رەسپۋبليكاسىنىڭ كاتارداعى ەلشىسى اسقار شوقىباەۆتىڭ وسى ەلدىڭ بۇرىنعى باسشىسى, ءامىردىڭ اكەسى شەيح حاماد بەن حاليفا ءال-تانيمەن كەزدەسۋى بولىپ ءوتتى.
كەزدەسۋ بارىسىندا ءامىردىڭ اكەسى قازاقستان ەلشىسىن ونىڭ كاتار مەملەكەتىندەگى ديپلوماتيالىق ميسسياسىنىڭ باستالۋىمەن قۇتتىقتاپ, قازاقستان-كاتار قارىم-قاتىناستارىنىڭ جوعارى الەۋەتىن اتاپ ءوتتى.
شەيح حاماد ءوز ەلىنىڭ قازاقستان رەسپۋبليكاسىمەن جان-جاقتى بايلانىستارىنىڭ دامۋى مەن كۇشەيۋىنە ۇلكەن ءمان بەرەتىندىگىن اتاپ ءوتتى. ول ءوزىنىڭ قازاقستان پرەزيدەنتى ن.ءا.نازارباەۆپەن وتكىزگەن كەزدەسۋلەرىن جىلى سەزىممەن ەسكە الا وتىرىپ, ەلباسىنىڭ مەملەكەتىمىزدىڭ قالىپتاسۋى مەن دامۋىنا قوسقان وراسان زور ۇلەسىن اسا جوعارى باعالاي كەلە, ەلباسىنا سالەمى مەن جىلى لەبىزدەرىن جەتكىزۋدى سۇراي وتىرىپ, دوحاعا ساپارمەن كەلۋىن كۇتىپ وتىرعاندىعىنا نازار اۋداردى.
ا.شوقىباەۆ قازاقستان تاۋەلسىزدىككە يە بولعالى بەرى ساياسي, ەكونوميكالىق جانە الەۋمەتتىك سالالاردا قول جەتكىزگەن جەتىستىكتەرى تۋرالى ايتىپ بەردى. سونىمەن قاتار, سۇحبات بارىسىندا ەكىجاقتى ىنتىماقتاستىقتىڭ كۇن ءتارتىبىندەگى, ساۋدا-ەكونوميكالىق جانە ينۆەستيتسيالىق بايلانىستاردى كۇشەيتۋ, كاتاردىڭ قازاقستانداعى ينۆەستيتسيالىق جوبالارعا قاتىسۋى, قازاقستان-كاتار ۇكىمەتارالىق كوميسسياسىنىڭ وتىرىسىن وتكىزۋ, قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋعا, ازىق-ءتۇلىك قاۋىپسىزدىگى بويىنشا يسلام ۇيىمىنىڭ كەڭسەسىن استانادا قۇرۋ تۋرالى باستامالارىنا كاتاردىڭ قولداۋ ءبىلدىرۋى, سونداي-اق, استانا قالاسىندا شەيح ءتاميم بەن حاماد ءال-ءتانيدىڭ اتىنداعى مەكتەپ پەن سەمەي قالاسىندا رەسپۋبليكالىق ساۋىقتىرۋ ورتالىعىن سالۋ سياقتى كوكەيكەستى ماسەلەلەر تالقىلاندى.
جالپى العاندا, ءامىردىڭ اكەسى قازاقستان مەن كاتار اراسىنداعى ەكىجاقتى ىنتىماقتاستىقتى نىعايتۋ بويىنشا بارلىق باستامالاردى قولدايتىندىعىن جانە ونىڭ ىسكە اسىرىلۋىن ءوزىنىڭ جەكە باقىلاۋىنا الاتىندىعىن جەتكىزدى.
«ەگەمەن-اقپارات».