بىلتىر استانا قالاسىندا V دۇنيەجۇزىلىك كوشپەلىلەر ويىندارى ءوتتى. ەتنوسپورت الامانىندا كوپشىلىكتىڭ نازارى ات سپورتى, ونىڭ ىشىندە بايگە تۇرلەرىنە اۋعانى انىق. تورتكۇل دۇنيە نازارىن اۋدارعان «ەرتەدەن سالسا كەشكە وزعان, ىلديدان سالسا توسكە وزعان» ارعىماقتاردىڭ دا ءدۇبىرى كوپتىڭ ەسىندە. اسىرەسە الاماننىڭ الدى بولعان ايقاباق ارعىماق.
قازىر ايقاباق الماتى وبلىسى, جامبىل اۋدانى, كوكباستاۋ اۋىلىندا جاس اتبەگى جامبىل بوبەكبايدىڭ باپتاۋىندا. سارىارقانىڭ سايىن ساحاراسىن دۇبىرگە بولەگەن دۇنيەجۇزىلىك كوشپەلىلەر ويىندارى وتكەنگە دەيىن بۇل جانۋار قاتارداعى كوپ جۇيرىكتىڭ ءبىرى ەدى. راس, بىرنەشە بايگەگە قاتىستى, ءتىپتى توپتى جارىپ جۇلدەلى دە بولدى. بىراق ءبىر جىلدا بىرنەشە اۆتوكولىك ۇتاتىن ارعىماقتار سەكىلدى ابىرويى اسقاقتاپ, جۇرتشىلىقتىڭ جادىنا جاتتالا قويماعان ەدى.
«ايقاباقتى دونەنگە شىعارىندا پولشا مەملەكەتىنەن ساتىپ اكەلدىك. ەۋروپادا بايگەگە قوسىلۋى بىلاي تۇرسىن, باس اساۋلىعى باسىلا قويماعان, كوپ مىنىلمەپتى دە. جۇيرىكتى ساتىپ الاردا تۇقىمىنىڭ تازالىعىنا باسا ءمان بەرەمىز. ايقاباق تا ات باپتاۋشىلارعا ەتەنە تانىس ايعىردىڭ تۇقىمى. تۇياعى كەتىلمەگەن, ءسىڭىرى سوزىلماعان, دەنە تۇرقى دا كەلىستى ەكەن. بەلدى جانۋار ەكەنى بىردەن كوزگە ۇرىپ تۇردى. ەلگە جەتكىزىلگەن سوڭ, ۇيرەتىپ جۋاسىتتىق. اتتاردى سۋىتىپ, جاراتۋ ماۋسىمى كەزىندە كوبىنە ايقاباقتى ءوزىم مىنەمىن. جۇيرىكتىڭ جالىنان ۇستاپ شوقتىعىنا قونعاندا-اق ونىڭ كۇش-قۋاتى ايقىن اڭعارىلادى. جۇرىسىنەن, تۇرىسىنان دا جۇيرىكتىگى بايقالادى. بۇل جانۋاردىڭ مىنەزى اشىق. كەيبىر جۇيرىكتى جاراتۋ كەزىندە كوبىرەك كۇش سالىپ جىبەرسەڭ ەرتەڭىنە مۇلگىپ ەسەڭگىرەپ قالادى. ال ايقاباق كەرىسىنشە, قاماۋ تەرىن الىپ تاڭ اسىرا سۋىتىپ, ەرتەڭىنە تاعى مىنسەڭ دە قۋناق قالپىندا ويناقشىپ شىعا كەلەدى. بالا سەكىلدى ەركەلەپ ويناعاندى قالاپ تۇرادى. جاراتۋ كەزىندە جۇكتەمەنى ارتتىرساق تا اۋىرسىنبايدى», دەيدى ج.بوبەكباي.
بىلتىرعى كوشپەلىلەر ويىندارىنان كەيىن ايقاباقتى ساتىپ الۋعا ىقىلاستى جانداردىڭ قاتارى كۇرت ارتىپتى. تۇلپار بولار ق ۇلىندى تۇياعىنان تاپ باسىپ تانيتىن اتبەگىلەر, ارينە, قىزىعادى. سەبەبى بيىل دونەننەن بەستى شىعادى, تىم جاس. الدا ءالى تالاي دودالى بايگە بار. كۇيىن قايىرىپ باپتاي السا, باعىن اسىراتىنى بەلگىلى. بىراق ساتىلمايدى دەيدى جامبىل.
جامبىلدىڭ داڭقىن اسىرعان جۇيرىگىنىڭ دۇنيەجۇزىلىك كوشپەلىلەر ويىندارىنا جولى قالاي تۇسكەنى ءوز الدىنا بولەك اڭگىمە. ويتكەنى ايتۋلى الامانعا حاس جۇيرىكتىڭ قوسىلماي قالۋى دا بەك مۇمكىن ەدى. بىلتىر بايگە فەدەراتسياسى ەرتە كوكتەمنەن سارشا تامىزدىڭ سوڭىنا دەيىن ەلىمىزدىڭ بىرنەشە وڭىرىندە ىرىكتەۋ كەزەڭىن وتكىزدى. ىرىكتەۋ ماۋسىمىنا كەيىپكەرىمىز دە تاي, قۇنان, توپ ءھام الامان بايگەگە جاراتقان 33 ارعىماعىن قوسىپ, شاما-شارقىن سىنادى. سولاردىڭ اراسىندا ايقاباق تا بار ەدى. مامىر ايىندا تالدىقورعان قالاسىندا وتكەن ىرىكتەۋ كەزەڭىندە بۇل تۇلپار توپ بايگەگە قارا ءۇزىپ كەلدى. جۇيرىكتىڭ باۋىرىن جازا كوسىلۋى, ەركىن تىنىستاۋى, كومبەگە تاياعاندا ارىنىن كۇشەيتىپ قارقىن الۋى سەنىمىن نىعايتتى. بىراق كوشپەلىلەردىڭ الامان بايگەسىنە بەرەكە دەگەن جۇيرىگىن قوسۋدى كوزدەپ جۇرگەن. كولدەنەڭ كيلىككەن قىرسىقتى قاراساڭشى, كەزەكتى بايگەدە بۇل ارعىماعى تۇياعىن كەتىرىپ الادى.
«ايقاباقتى توپ بايگەدە سىناعانىمىزبەن الامانعا قوسىپ, اۋراسىن سەزىندىرۋدىڭ مۇمكىندىگى بولمادى, ۋاقىت وتە قىسىلتاياڭ ەدى. بىراق جانۋاردىڭ مىنەزىنە, قاجىر-قايراتىنا سەنىم ارتتىم. استاناعا ارعىماقتارىمىزدى كولىكپەن كۇنى بۇرىن جەتكىزىپ, جەرگىلىكتى اۋا رايىنا بەيىمدەدىك. بىراق دۇنيەجۇزىلىك كوشپەلىلەر ويىندارىنىڭ الامانىنا ايقاباقتىڭ قوسىلۋ, قوسىلماۋى ءدۇدامالداۋ بولدى. سەبەبى ەلىمىزدىڭ اتىنان قوسىلاتىن تۇلپارلار سانى شەكتەۋلى. بايگە فەدەراتسياسىنىڭ باسشىلىعى اتىمىزدى رەزەرۆتە ۇستاۋ جونىندە شەشىم قابىلدادى. جازاتايىم جاعداي ورناپ, ەلىمىزدەن قاتىساتىن تۇلپارلاردىڭ ءبىرى اۋىرسا, نە بولماسا سۋىتۋ كەزىندە جاراقاتتانسا ورنىن الماستىراتىنىن ايتتى. دودا باستالاتىن كۇن تاياعاندا تالحيز جۇيرىكتىڭ بەلگىلى ءبىر سەبەپپەن قوسىلمايتىنى ايتىلدى دا, ايقاباقتى قوسۋعا رۇقسات ەتتى. جانۋاردىڭ بابى كەلىپ بايگە تىلەپ زار كۇيىندە جۇرگەن-ءدى. الاماننىڭ الدى بولىپ التىن مەدال ولجالايتىنىمىزعا دا ىشكى تۇيسىگىم بەرىكتەنە ءتۇستى. دەسە دە قىرعىزستاننان اكەپ قوسقان قاراقىز, ەلىمىزدە تالاي بايگەنىڭ الدىن بەرمەي داڭقى شىققان جۇمىرتۇياقتان ەپتەپ قايمىققانىم دا راس. قانشا دەگەنمەن مۇنداي دۇبىرگە ابدەن توسەلگەن تۇلپارلار تاجىريبەسى كەمشىن جۇيرىگىمدى شاڭعا كومىپ كەتە مە دەگەن وي قاۋمالاعانى دا شىندىق», دەيدى اتبەگى.
اتبەگىنىڭ كوشپەلىلەر ويىندارىنىڭ الامان بايگەسىنە ايقاباقتى تاۋەكەلمەن قوسقانىنا تاڭداندىق. بۇعان دەيىن الامان بايگەگە شاپپاعان, ۇزاق قاشىقتىقتا باعىن سىناماعان تۇلپاردى تۇمەن جۇرت كوزىن سۋارعان دوداعا سالدى.
كوشپەلىلەر ويىندارىنىڭ الامان بايگەدەن تۇسىرىلگەن بەينەجازباسىنىڭ ۇزىك-ۇزىك كورىنىستەرى الەۋمەتتىك جەلىدە ءجۇر. سوعان بايىپتاپ قاراساڭىز, ايقاباقتى تىزگىندەگەن شاباندوز اڭسار ارىستانبەك سوڭعى اينالىمعا دەيىن الدىڭعى توپتىڭ ورتاسىندا ۇزەڭگى قاعىستىرا قاتار جۇيتكىپ كەلەدى دە, تەك كومبەگە 500 مەتر قالعاندا قويانداي ىتقىپ سۋىرىلىپ العا شىعادى. بۇل دا شاباندوزدىڭ ەپتىلىگىن, سالقىنقاندىلىعىن اڭعارتسا كەرەك. سەبەبى كەيبىر جەتكىنشەكتەر سورەگە جاقىنداعاندا ات ايداۋشىنىڭ سوڭعى اينالىم قالدى دەگەن قۇلاقتاندىرۋىن ەستي سالا ەلىرىپ تىزگىندى قويا بەرەدى دە, اتىنىڭ كۇشىن سارقىپ الادى. اڭسار ونداي ۇشقالاق ەمەس. بۇل دا اتبەگى جامبىلدىڭ شاكىرت تاربيەلەۋدەگى وراسان تابىسى.
ءدۇيىم ەلگە دۇنيەجۇزىلىك كوشپەلىلەر ويىندارىنان كەيىن داڭقى جايىلعان ءدۇلد ۇلىن اتسەيىس جامبىل بيىلعى ماۋسىمعا دا باپتاپ ءجۇر. ۇلىستىڭ ۇلى كۇنىمەن تۇسپا-تۇس ەل ىشىندە بايگەنىڭ جاڭا ماۋسىمى دا تۇڭلىگىن تۇرەدى.
جامبىلدىڭ اكەسى سەرىك مايماقوۆ 2016 جىلى قىرعىزستاندا وتكەن ءىى دۇنيەجۇزىلىك كوشپەلىلەر ويىندارىنىڭ الامانىنا ارعىماعىن باپتاپ قوسىپ, قالىڭ قىرعىزدىڭ وزەگىنە ءورت سالا وتىرىپ باس بايگەنى قانجىعاسىنا بوكتەرىپ ەدى. سول سوقپاقتى جاڭعىرتىپ بالاسى دا زاۋ بيىككە كوتەرىلدى. قانداي كەرەمەت تاريحي ناتيجە! سايگ ۇلىگىڭ سۇرىنبەسىن, اتبەگى!