ۇلتتىق قۇرىلتاي – ەلىمىزدەگى ماڭىزدى ديالوگ الاڭى. حالىقتىڭ ءۇنىن ەستۋگە, جاڭا رەفورمالاردى ەنگىزۋگە, ۇلتتىق بىرەگەيلىكتى ساقتاپ ونى نىعايتۋعا جانە الەۋمەتتىك ماسەلەلەردى رەتتەۋگە باعىتتالعان ءداستۇرلى باسقوسۋ بۇل جولى بۋرابايدا جالعاسىن تاپتى, دەپ جازادى Egemen.kz.
مەملەكەت باسشىسى قاسىم-جومارت كەمەل ۇلى توقاەۆتىڭ قاتىسۋىمەن وتكەن ۇلتتىق قۇرىلتايدىڭ VI وتىرىسىندا پرەزيدەنتتىڭ ايتقان نەگىزگى ويلارى قوعامدا كەڭىنەن تالقىلانۋدا. بۇل تۇجىرىمدار ەلىمىزدىڭ عىلىمي ورتاسى مەن جوعارى وقۋ ورىندارى ءۇشىن دە اسا ماڭىزدى دەپ بىلەمىن.
قازاقستانداعى العاشقى جانە ەڭ كونە ۋنيۆەرسيتەت – اباي اتىنداعى قازاق ۇلتتىق پەداگوگيكالىق ۋنيۆەرسيتەتى (Abai University) ءۇشىن مەملەكەت باسشىسىنىڭ اباي ينستيتۋتتارىن «كونفۋتسي, گيوتە, سەرۆانتەس ينستيتۋتتارى ۇلگىسىندەگى تولىققاندى مادەني-اعارتۋشىلىق مەكەمەلەر جەلىسىنە اينالدىرۋ» تۋرالى ايتقان ءسوزى ەرەكشە مانگە يە.
شىن مانىندە, اباي ينستيتۋتتارى بۇگىندە قازاقستاننىڭ باستى سەرىكتەس ەلدەرىندەگى مادەنيەت ەلشىسىنە اينالۋى ءتيىس. بۇل – تەك الەم تانيتىن ۇلى اقىننىڭ جانە قازاق ويشىلىنىڭ 180 جىلدىعى قارساڭىندا ونىڭ مۇراسىن دارىپتەۋ عانا ەمەس, سونداي-اق ۇلتتىق رۋحتى كەڭىنەن ناسيحاتتايتىن ماڭىزدى يدەولوگيالىق باستاما.
2011 جىلدان بەرى حالىقارالىق دەڭگەيدە Abai University شەت مەملەكەتتەگى سەرىكتەس جوعارى وقۋ ورىندارىنىڭ بازاسىندا 7 حالىقارالىق اباي ورتالىعىن اشتى. بۇگىندە تۇركيا, پولشا, قىتاي, ۆەتنام, رەسەي جانە وزبەكستاندا جۇمىس ىستەيتىن بۇل ورتالىقتاردىڭ باستى ماقساتى – قازاق مادەنيەتىن, قازاق ءتىلىن جانە ۇلى اعارتۋشى اباي قۇنانباي ۇلىنىڭ مۇراسىن ناسيحاتتاۋ. سونىمەن قاتار, ورتالىقتاردا تانىمدىق ءىس-شارالار, مادەني ءھام عىلىمي سەمينارلار, قازاقستاننىڭ تاريحى مەن مادەنيەتى بويىنشا ساباقتار وتكىزىلەدى. بۇل ورتالىقتار بيۋدجەتتەن تىس قاراجات ەسەبىنەن جانە شەتەلدەگى قازاقستاندىق ەلشىلىكتەردىڭ (مىسالى, سامارقاند مەملەكەتتىك ۋنيۆەرسيتەتىندەگى اباي ورتالىعى – قازاقستاننىڭ وزبەكستانداعى ەلشىلىگىنىڭ قولداۋىمەن) جانە وتاندىق بيزنەس قۇرىلىمدارىنىڭ دەمەۋشىلىگىمەن اشىلدى.
پرەزيدەنتتىڭ باستاماسىن تولىق قولداي وتىرىپ, ءبىز اباي ينستيتۋتتارىنىڭ جاھاندىق جەلىسى قازاقستاننىڭ حالىقارالىق عىلىم مەن ءبىلىم بەرۋ كەڭىستىگىنە ەنۋىنە, ەلىمىزدىڭ يميدجدىك ساياساتىن دامىتۋعا زور ۇلەس قوسادى دەپ سانايمىز. سونىمەن قاتار, بۇل ينستيتۋتتار قازاق حالقىنىڭ ۇلتتىق بىرەگەيلىگىنىڭ نەگىزىن قالاۋشى – انا ءتىلىمىز قازاق ءتىلى مەن مادەني مۇراسىن ناسيحاتتاۋدىڭ ءتيىمدى الاڭىنا اينالىپ كەلەدى. قازاق تىلىنە دەگەن قىزىعۋشىلىق تا ارتىپ كەلەدى. ماسەلەن بۇگىندە الەم بويىنشا 16,741 ميلليون ادام قازاق تىلىندە سويلەيدى.
وسىلايشا, اباي ينستيتۋتتارى قازاقستاندىق مادەنيەتتىڭ جاھاندانۋىنا, ءبىلىم جانە عىلىم سالاسىنداعى حالىقارالىق ىقپالداستىقتىڭ كۇشەيۋىنە, سونداي-اق ديپلوماتيالىق بايلانىستى نىعايتۋعا ىقپال ەتەتىن ماڭىزدى قۇرالعا اينالادى دەگەن سەنىم مول.
ال Abai University, پەداگوگيكالىق ءبىلىم بەرۋدىڭ جەتەكشى عىلىمي-ادىستەمەلىك ورتالىعى رەتىندە, قازاقستاندىق ۋنيۆەرسيتەتتەر مەن مادەني ۇيىمداردىڭ حالىقارالىق دەڭگەيدەگى كۇش-جىگەرىن بىرىكتىرۋگە ۇيىتقى بولا الادى.
بىرلىك پەن ۇلتتىق جاڭعىرۋدى ماقسات تۇتقان القالى جيىن ۇلتتىق قۇرىلتايدى پرەزيدەنت الداعى ۋاقىتتا سىر ءوڭىرى قىزىلوردادا وتكىزۋ تۋرالى شەشىم قابىلدادى.
بولات تىلەپ, اباي اتىنداعى قازۇپۋ باسقارما توراعاسى-رەكتور