قارۋلى كۇشتەر ۇلتتىق اسكەري-پاتريوتتىق ورتالىعىنىڭ اسكەري-تاريحي مۇراجايىندا ەكىنشى دۇنيەجۇزىلىك سوعىس جىلدارىندا ۇرىس دالاسىندا قازا تاپقان جاۋىنگەرلەردىڭ تۋىستارىنا «ەرلىگى, بورىشىنا ادالدىعى ءۇشىن» مەدالى تابىستالدى.
ءىس-شاراعا ارداگەرلەر ۇيىمدارىنىڭ, «جاس سارباز» اسكەري-پاتريوتتىق قوزعالىسىنىڭ وكىلدەرى جانە قىزىلاسكەرلەردىڭ ۇرپاقتارى قاتىستى.
«مەموريالدىق ايماق» قوعامدىق بىرلەستىگىنىڭ ماراپاتى مايداندا قازا تاپقان جاۋىنگەرلەردىڭ بالالارى مەن نەمەرەلەرىنە تابىستالدى. ۇيىمدى پروفەسسور, قازاقستاننىڭ ەڭبەك سىڭىرگەن قۇرىلىسشىسى مايدان قۇسايىنوۆ باسقارادى. ول كوپ جىلدان بەرى سانكت-پەتەربۋرگ ماڭىنداعى سينياۆين باتپاقتارى مەن بيىكتىكتەردە قازا تاپقان جاۋىنگەرلەردى ىزدەستىرۋگە قاتىسىپ كەلەدى. ونىڭ ىزدەستىرۋ جاساعى اقمولا مەن پەتروپاۆلدا قۇرىلعان 310 جانە 314-اتقىشتار ديۆيزيالارىنىڭ قۇرامىندا سوعىسقان جۇزدەن اسا قازاقستاندىق جاۋىنگەردىڭ قابىرىن ىزدەپ تاپتى.
اتالعان ءىس-شاراعا قىزىلاسكەر قالمەن تايشىباەۆتىڭ 85 جاستاعى قىزى اكەسىنىڭ ناگراداسىن الۋعا ۇلدارىمەن بىرگە كەلىپتى.
– ول مايدانعا كەتكەندە مەن نەبارى ءبىر جارىم جاستا ەكەنمىن. ءسىڭلىم اكەم كەتكەننەن كەيىن كوپ ۇزاماي دۇنيەگە كەلىپتى. ءبىز ونى كورگەن جوقپىز. بۇگىن مەن – 14 نەمەرە مەن جيىرمادان اسا شوبەرە ءسۇيىپ وتىرعان اجەمىن. اۋلەتىمىزدىڭ اتىنان مايدان كومەك ۇلىنا ىزدەۋ جاساعىنىڭ جۇمىسى ءۇشىن زور العىسىمدى بىلدىرگىم كەلەدى. بۇل تۋىستارىنان ايىرىلعان جانە ولاردىڭ تاعدىرىنان حابارسىز وتباسىلار ءۇشىن وتە ماڭىزدى, – دەدى اقنۇر تايشىباەۆا.
اعايىندى بياحمەت پەن ءسلام راقىمباەۆتار سوعىستىڭ العاشقى كۇندەرى مايدانعا اتتانعان. ولاردىڭ ناگراداسى گۇلنار بياحمەتوۆانىڭ نەمەرەسىنە تابىستالدى. ءىس-شاراعا ول اپكەسى ەلميرامەن جانە ۇلدارىمەن بىرگە كەلدى.
– ءبىزدىڭ اتامىز بياحمەت راقىمباەۆ 1908 جىلى شىعىس قازاقستان وبلىسى, تارباعاتاي اۋدانى, ماڭىراق اۋىلىندا دۇنيەگە كەلگەن. ول دنەپردە سوعىسىپ, دونەتسكىنى ازات ەتۋگە قاتىسقان. لەنينگرادتى قورعاپ, كۋرسك شايقاسىنا قاتىستى. 1943 جىلى ۋكراينادا ەرلىكپەن قازا تاپتى. 1911 جىلى تۋعان ەكىنشى اتامىز ءسلام راقىمباەۆ جەڭىستى بەرليندە قارسى العان ەكەن. ۇيگە قايتىپ كەلە جاتقاندا باندەروۆشىلەردىڭ قولىنان قازا تاپقان. ءبىزدىڭ اتالارىمىز جەڭىس ءۇشىن ءوز ومىرلەرىن قۇربان ەتتى. جاستار مۇنى ءاردايىم ەستە ۇستاۋى كەرەك, – دەدى گۇلنار بياحمەتوۆا.
بۇل ءىس-شارانىڭ ۇرپاقتار ساباقتاستىعىن نىعايتۋداعى ماڭىزدىلىعىن «جاس سارباز» اسكەري-پاتريوتتىق قوزعالىسى» رقب ەلوردا فيليالىنىڭ توراعاسى اسحات نالشىبەك تە اتاپ ءوتتى. ول سونداي-اق ىزدەۋشىلەرگە سوعىس مايداندارىندا قازا تاپقان جاۋىنگەرلەردى ەسىمىن ەستە قالدىرۋعا قوسقان باعا جەتپەس ۇلەسى ءۇشىن العىس ايتتى.