استانا قالاسىنىڭ اكىمى جەڭىس قاسىمبەك Instagram-داعى پاراقشاسىندا LRT قۇرىلىسى قالاي ءجۇرىپ جاتقانى تۋرالى جازدى, دەپ حابارلايدى Egemen.kz اقپارات اگەنتتىگى.
— № 112 ستانتسياعا (ابۋ دابي پلازا) بارىپ, LRT قۇرىلىسىنىڭ بارىسىمەن تانىستىم. ماسەلەن, ابۋ دابي پلازاداعى № 112 ستانتسيادا جالپى اۋدانى شامامەن 5 مىڭ شارشى مەتر بولاتىن قاسبەتتىڭ سىرتقى مەتالل قاڭقاسىن مونتاجداۋ, ارى قاراي ۆيتراجدار مەن پانەلدەردى ورناتۋ جۇمىسى جۇرگىزىلىپ جاتىر. بيىل 3-توقساندا سىناق جۇمىسىن باستاۋ ءۇشىن وسىعان ۇقساس جۇمىس بارلىق 18 ستانتسيادا اياقتالاتىن بولادى, — دەدى اكىم.
ونىڭ سوزىنشە, وسىعان دەيىن ەستاكادانىڭ قۇرىلىسى اياقتالىپ, ستانتسيالاردىڭ نەگىزگى تەمىربەتون كونسترۋكتسيالارى سالىنعان.
— ەسىل وزەنى ارقىلى وتەتىن اسپالى كوپىردىڭ قۇرىلىسى, 101-ستانتسيانىڭ قاسبەتتىك بولىگىنىڭ قۇرىلىسى اياقتالدى. سول سياقتى LRT قۇرامىنىڭ 19 بىرلىگىنە تاپسىرىس بەرىلدى. LRT جەلىسى ستانتسيالارىنىڭ نەگىزگى تەمىربەتون كونسترۋكتسيالارىنىڭ قۇرىلىسى 100% اياقتالدى. № 116 جانە № 117 ستانتسيالار اراسىنداعى ەستاكادا ۋچاسكەسىندە رەلس جولىنىڭ العاشقى 500 مەترى توسەلدى. 2025 جىلدىڭ سوڭىنا دەيىن جولدىڭ جوعارعى بولىگىنىڭ قۇرىلىسىن تولىقتاي اياقتاۋ, ونىڭ ىشىندە رەلستەردى توسەۋ, دابىل جانە بايلانىس جۇيەلەرىن باپتاۋ, ستانتسيالاردى ىشكى جانە سىرتقى ارلەۋ, قۇرامداردى جەتكىزۋمەن دەپو سالۋ جوسپارلانىپ وتىر, — دەپ ءتۇسىندىردى جەڭىس قاسىمبەك.
سونىمەن قاتار, ەلوردا اكىمى 2025 جىلى قابانباي باتىر داڭعىلى مەن قالداياقوۆ كوشەسىندەگى LRT-نىڭ استىڭعى ەستاكادالىق بولىگىن اباتتاندىرۋ جوسپارلانىپ وتىرعانىن ايتتى.
ء— بىز LRT بويىنداعى مارشرۋتتى كەزەڭ-كەزەڭىمەن اباتتاندىرامىز. مىسالى, بيىل قابانباي باتىر داڭعىلىن اۋەجايدان ماڭگىلىك ەل داڭعىلىنا دەيىن اۋقىمدى كوگالداندىرۋ جوسپارلانعان. سىعاناق كوشەسىنىڭ بويىنداعى ۋچاسكەدە (قابانباي باتىر داڭعىلىنان تاۋەلسىزدىك داڭعىلىنا دەيىن) اعاشتار, ۆەلوجولدار, بىرىڭعاي ستيلدەگى كوشە جيھازدارى ورناتىلادى. LRT-نىڭ نەگىزگى ايالدامالارىنىڭ جانىندا — Mega Silk Way سوو, بوتانيكالىق باق جانە «پوكولەنيە» تك ماڭىندا قالا تۇرعىندارىنىڭ دەمالىسى مەن ۋاقىتىن پايدالى وتكىزۋى ءۇشىن جاڭا قوعامدىق كەڭىستىكتەر اشىلادى. ولار زاماناۋي اباتتاندىرىلعان, قالانىڭ تارتىمدى ءارى ىڭعايلى ورىندارىنىڭ بىرىنە اينالادى, — دەپ جازدى جەڭىس قاسىمبەك.