وسى جىلدىڭ 7 مامىرىندا استانادا جەڭىستىڭ 80 جىلدىعىنا ارنالعان اسكەري شەرۋ وتەدى. شەرۋگە قاتىساتىن 4 مىڭنان استام اسكەري قىزمەتكەردىڭ 315-ءى مۋزىكانتتار, دەپ جازادى Egemen.kz.
قر كۇشتىك قۇرىلىمدارىنان تۇراتىن وركەستردىڭ قۇرامىندا ۇلاندىقتار دا بار. ولار وزگە دە ارىپتەستەرىمەن بىرلەسىپ, جەڭىس شەرۋىن مۋزىكامەن سۇيەمەلدەيدى.
ۇلتتىق ۇلاننىڭ ءباسپاسوز قىزمەتى قۇقىقتىق ءتارتىپ اسكەرىنىڭ وركەسترى شەرۋگە قىزۋ دايىندالىپ جاتقانىن حابارلادى. بىلتىرعى جەلتوقساندا اسكەري شەرۋگە دايىندىق ماسەلەلەرى تالقىلانىپ, مۋزىكالىق شىعارمالار ىرىكتەلگەن بولاتىن. وسى ىرىكتەۋدە قر ءىىم ۇلتتىق ۇلانىنىڭ اسكەري ديريجەرلارى جازعان 4 مۋزىكالىق شىعارما شەرۋدە ورىندالۋعا لايىقتى دەپ تاڭدالدى.
«شەرۋ كەزىندە ءبىزدىڭ وركەستر «شاتتىق», «گەنەرال شاكير دجەكسەنباەۆ» جانە قۇقىقتىق ءتارتىپ اسكەرىنىڭ ءانۇرانىنا اينالعان «ەلدىڭ قورعانى» مەن «باتىر» مارشتارىن ورىندايدى. بۇل شىعارمالار جاۋىنگەرلەردىڭ بويىنداعى رۋحتى وياتادى جانە جىگەرلەندىرەدى», دەيدى اسكەري-وركەستر ورتالىعىنىڭ باسشىسى ولجاس قۇدايقۇلوۆ.
وسى تۋىندىلاردىڭ ىشىندە «باتىر» قارسى الۋ مارشىن ورتالىقتىڭ اعا وفيتسەرى نايل ۆاليەۆ جازعان.
ء«بىر جىل بۇرىن ماعان ۇرمەلى وركەسترگە ارنالعان مارش جازۋ يدەياسى كەلدى. ءوزىم دە ۇرمەلى اسپاپتاردا وينايمىن, كلارنەتيستپىن. مەنىڭ بۇل تۋىندىمنىڭ مۋزىكاسى كۇشتى, انىق, جىلدام جانە جارقىن. اۆتور رەتىندە شىعارمامنىڭ اۋقىمدى اسكەري شەرۋدە ورىندالاتىنى مەن ءۇشىن ۇلكەن ابىروي», دەدى نايل ۆاليەۆ.
ايتا كەتەيىك, ۇلتتىق ۇلاننىڭ وركەستر مۇشەلەرى اسكەري شەرۋگە وراي كيىم ۇلگىلەرىن دە جاڭارتپاق.