العىس ايتۋ كۇنى – كەڭ بايتاق قازاقستانعا قونىس اۋدارعان ءتۇرلى ەتنوستاردىڭ ميلليونداعان وكىلدەرى قوناقجاي قازاق حالقىنا جۇرەكجاردى العىستارىن ايتىپ, تاعزىم ەتۋدى داستۇرگە اينالدىردى. وسىعان وراي, قوناەۆ قالالىق كوپسالالى اۋرۋحاناسىنىڭ ساۋلەلى زەرتتەۋ بولىمشەسىنىڭ لابورانتى نيكولاي نەدوۆودەەۆپەن از-كەم تىلدەسكەن ەدىك. مەملەكەتتىك ءتىلدى ەركىن مەڭگەرگەن جاس مامان وتانى مەن ورتاسىنا زور العىسىن ءبىلدىردى.
– نيكولاي سەرگەي ۇلى, ءسوز باسىن تۋعان جەر, وسكەن ورتادان باستاساڭىز. مەديتسيناعا جۇرەك قالاۋىڭىزبەن كەلدىڭىز بە؟
– اۋىل – قازاقتىڭ التىن تامىرى, ۇلتىمىزدىڭ ۇيىتقىسى عوي. سوندىقتان ءوزىم تۋىپ-وسكەن مەكەنىم وڭتۇستىك قازاقستان وبلىسى شاقپاق-بابا اۋىلىن ماقتان ەتەمىن. كيەلى مەكەندە 14 جاسىما دەيىن اتا-اناممەن تۇردىم. دوستارىم ايان جانە راشيد ۇشەۋىمىز اۋىلدىڭ قارا شاڭىنا اۋناپ-قۋناپ, اۋىر جۇمىسقا ابدەن ىسىلىپ, مال باعىپ, ءشوپ شاۋىپ, كوكپار تارتىپ وستىك. اۋىلىمدا ەشكىم قازاق تىلىنەن باسقا تىلدە سويلەمەيتىن ەدى, سوندىقتان, وتباسىمىزبەن قوناەۆ قالاسىنا قونىس اۋدارعانىمىزدا ورىس ءتىلىن مەڭگەرىپ, ەركىن سويلەۋ قيىنعا سوقتى. سەبەبى, ورىس ۇلتىنان بولسام دا جۇرەگىم «قازاق» دەپ سوققان ەر-ازاماتپىن. مەكتەپتەن سوڭ مەديتسينالىق كوللەدجگە ءتۇسىپ, وقۋىمدى ويداعىداي اياقتاعانىما دا 5 جىل تولىپ قالىپتى. ماماندىعىمدى اداسپاي تاڭداعانىما كۇندە قۋانامىن. مەديتسينا سالاسىندا ەڭبەك ەتەتىنىمدى كىشكەنتاي كەزىمنەن-اق بىلەتىنمىن, ويتكەنى, دارىگەر, مەدبيكەلەردى كورگەنىمدە جۇرەگىم ەرەكشە سەزىمدە بولاتىن.
– ەڭبەك ەتەتىن بولىمشەنىڭ جۇمىس جايىن تارقاتا كەتسەڭىز.
– بولىمشەنىڭ قۇرامىنا رەنتگەنودياگنوستيكالىق كابينەت, فليۋوروگرافيالىق كابينەت, رەنتگەندىك كومپيۋتەرلىك توموگرافيا كابينەتى, ماگنيتتى-رەزونانستى توموگرافيا كابينەتى كىرەدى. بولىمشەدە جۇمىس جاسايتىن دارىگەرلەر جاقىن جانە الىس شەت ەلدەردەگى ءىرى رەسپۋبليكالىق ورتالىقتاردا وقىعان. ءبولىم جەتەكشى الەمدىك وندىرۋشىلەردىڭ دياگنوستيكالىق جابدىقتارىنىڭ تولىق جيىنتىعىمەن جابدىقتالعان. جالپى, كەز-كەلگەن ەمدەۋ پروتسەسىنىڭ ساپاسى ەڭ الدىمەن سەنىمدى جانە تولىق دياگنوزعا بايلانىستى عوي. سوندىقتان مەن جۇمىس جاسايتىن بولىمشەدەگى دياگنوزعا ەرەكشە جاۋاپكەرشىلىكپەن قارايدى. ساۋلەلىك دياگنوستيكانىڭ جوعارى بىلىكتى دارىگەرلەرى مەن زاماناۋي رەنتگەنودياگنوستيكالىق اپپاراتۋرانىڭ بارلىق سپەكترى – دۇرىس دياگنوز قويۋداعى تابىستىڭ كەپىلى ەكەندىگى ءسوزسىز. ساۋلەلىك دياگنوستيكا – بۇل مەديتسيناداعى دەربەس ءبولىم, ول ساۋلەلەنۋدىڭ ءارتۇرلى تۇرلەرىن قولدانۋ نەگىزىندە دياگنوستيكالىق ماقساتتار ءۇشىن كەسكىن الۋدىڭ ءارتۇرلى ادىستەرىن بىرىكتىرەدى.
– قازىرگى ەڭبەك ەتىپ جۇرگەن ورتاڭىزداعى وزگە ۇلت وكىلدەرىنىڭ ءوزارا قارىم-قاتىناسى قانداي؟
– ۇجىمىمىز وتە ۇلكەن. مۇندا تاتار, وزبەك, ۇيعىر, كارىس, ۋكراين, باسقا دا ۇلت وكىلدەرىمەن ءبىر وتباسىنىڭ بالالارىنداي ەڭبەك ەتۋدەمىز. ءبىر-بىرىمىزگە باعىت بەرىپ, قامقور بولۋ, سۇرىنگەنگە سۇيەنىش, جىلاعانعا جۇبانىش بولۋدى باستى پارىزىمىز سانايمىز. مۇنداي اسىل قاسيەت پەن كەڭ پەيىل دارحان دالامىزدان, قازاقى قاسيەتتەن بويىمىزعا دارىدى.
– قازاقشاڭىز سۋداي ەكەن. ءتىل مەڭگەرۋ قيىن ەمەس پە؟
– جوق, ەلىمىزدە سوڭعى ۋاقىتتا قازاقشا سويلەيتىن وزگە ۇلت وكىلدەرى ايتارلىقتاي كوبەيگەنى – باستى جەتىستىگىمىز سانالادى. قازاقشا تەك قانا ءوزىم عانا ەمەس, ۇيدەگى اتا-انام, باۋىرىم, جۇبايىم ناستيا جانە قىزىم ەميليا دا سويلەيدى. مەملەكەتتىك ءتىل – انا ءتىلىمىز ءتارىزدى, ارقاشان قۇرمەتتەيمىز. قابىلداۋىما كەلگەن پاتسيەنتتەردىڭ قالاۋىنا قاراي ەكى تىلدە ەركىن تىلدەسەمىن.
– العىس ايتۋ كۇنىندە كىمدەرگە العىس ايتار ەدىڭىز؟
– سوڭعى جىلدارى 1 ناۋرىز ورتاق تاعدىر توعىستىرعان رەسپۋبليكا ازاماتتارى مەن تۇرعىندارىنىڭ ءبىر-بىرىنە شىنايى العىس سەزىمدەرى مەن ريزاشىلىعىن بىلدىرەتىن ايتۋلى كۇنگە اينالىپ كەلەتىنى ءسوزسىز. ۇلت پەن ۇلىس اراسىنداعى ءوزارا قۇرمەت پەن سىيلاستىق ءبىزدى جاڭا بيىكتەر مەن بەلەستەرگە باستاي بەرەتىنىنە سەنىمىم مول. مۇمكىندىكتى پايدالا وتىرىپ, وسىناۋ كەرەمەت مەرەكەدە, تۋعان ەلىمە, جەرلەستەرىمە, ءوزىم ەڭبەك ەتىپ جۇرگەن اۋرۋحانانىڭ ديرەكتورى راكيشەۆا ايمان عالىمجانقىزىنا, ارىپتەستەرىمە, اتا-اناما, جاقىندارىما ەرەكشە العىسىمدى بىلدىرەمىن!
– جايدارى اڭگىمەڭىزگە العىس ايتامىن!
الماتى وبلىسى,
قوناەۆ قالاسى.