دۇنيەجارىس

بۇل بايعۇس وزىمەن ءوزى اۋرەلەنىپ كىمدەرمەن دۇنيەجارىسقا تۇسپەيدى دەيسىز؟ ونىڭ ءوزى ىشتەي بەلگىلەپ العان قارسىلاس-باقتالاستارىنىڭ قۇرامىندا كورشى-قولاڭ, اعايىن-تۋىس, قۇدا-جەگجاتتار, سىنىپتاستار, «گرۋپپالاستار», دوس-جاراندار, ارىپتەستەر, ءبارى-ءبارى بار. بۇعان سالساڭ, بيلل گەيتس, يلون ماسك سىندى الەمدىك دەڭگەيدەگى قالتالىلاردان وزگەنىڭ بارلىعىمەن ىشتەي قارسىلاسا بەرەدى. ءتىپتى, بۇل جازعان كەيدە ەنشىسىن الدەقاشان الىپ كەتكەن, بۇگىندە بىلدەي كاسىپكەر, ءوزىنىڭ ۇلكەن ۇلىمەن دە باسەكەلەسەدى, ونى كورە المايدى.

الگىلەر قانداي جەتىستىككە جەتسە, سونى ەستىپ-بىلگەن ساتتەن باستاپ مۇنىڭ مازاسى قاشا باستايدى, قىزعانىشتان ءىشى كۇيىپ, ورتەنىپ, ەكى بۇكتەلىپ قالادى, جۇرەگى شانشىپ, قان قىسىمى كوتەرىلىپ, ورنىنان تۇرا الماي ۇيەلەيدى. ءتىپتى, جۇرت كوزىنە, اسىرەسە الگى جەتىستىككە جەتكەنگە كورىنۋدەن قالادى. ۇيات قىسىپ, بەتىن دۋىلداتىپ جىبەرەتىنىن قايتەسىڭ؟ سەبەبى, ودان قالىپ قويدى. ەندى قايتىپ جەر باسىپ جۇرە الادى؟

بۇل دەرتىنىڭ ەمىن ءوزى عانا بىلەدى. ازداپ جان شاقىرىپ الادى دا, دۇنيە جارىستان وزىنەن بايقاۋسىزدا نەمەسە ادەيى وزىپ كەتكەندى شاڭ قاپتىرۋعا بەكىنەدى. بۇلاي ەتپەي وڭالا المايدى. ءوزى قازىپ, ءوزى ءتۇسىپ شىعا الماي جاتقان وردان قۇتىلۋ ءۇشىن بۇل نە ىستەمەيدى دەيسىڭ؟

ءبارىن ايتىپ تاۋىسا المايسىڭ, ءبىرىن جەتكىزەيىن.

وسىدان ءبىراز بۇرىن مۇنىڭ ەسىنەن كەتپەس قورلىقتى جاعداي ورىن العان... وسىنداي قورلىقتى بۇل جازعان كورەمىن دەپ ويلاپ پا؟ باسقا تۇسكەن سوڭ قيىن عوي, ارينە. ول نە دەيسىز بە؟ بۇل سول كۇنى جەردىڭ ۇستىمەن بارىپ, استىمەن قايتقان. باسىن كوتەرە المادى... وسى قالاداعى جولداستارى ءبىر رەستورانعا جينالعان. كورىسپەگەلى ءبىراز بولعان دوستارىمەن باسقوسۋعا جەلپىنىپ «لەكسۋس-570»-پەن بارعان شىرەنىپ. رەستوراننىڭ اۆتوتۇراعىنا كولىگىن قويا بەرگەن ساتتەن مۇنىڭ تىنىسى تارىلىپ سالا بەرگەن. «لەكسۋس-570»-ءتى ابىروي ساناپ ءمىنىپ كەلگەندە اينالا قاپتاعان «لەكسۋس-600»-ءدى كورگەن مۇنىڭ جاعدايى قايدان ءماز بولسىن؟

بۇل رەستورانعا جينالعان جولداستارىنىڭ اراسىنا سۇمىرەيىپ, سالى سۋعا كەتىپ ازەر ەندى. وتىرىس قىزىپ كەلىپ بەردى. بىراق بۇل كوڭىلسىز. ءبارى ءوزىن مەنسىنبەيتىن, شەتتەتەتىن, كەلەكەلەيتىن ءتارىزدى. جيىن اياقتالعانشا ىشتەي ۇيالىپ وتىردى, ءوزىن توپتاعىلاردىڭ ەڭ سورلىسى ەسەپتەدى. ءوزىن قور سانادى.

ول سول جيىن اياقتالار-اياقتالماستان ەرتەرەك ۇيىنە قايتىپ كەتتى. جولداستارىنا «لەكسۋس-570»-پەن كەلگەنىن كورسەتپەۋ ءۇشىن تەز سىتىلىپ شىققان ءتۇرى ەدى بۇل. سودان كەشە عانا ابىروي ساناپ جۇرگەن «لەكسۋس-570»-ءىن اياماي ايداپ كەلدى دە, گاراجعا دا كىرگىزبەستەن سىرتقا قويا سالىپ, ءوزى توسەگىنە بۇك ءتۇسىپ جاتىپ قالعان. مىناداي قورلىققا شىداۋ وڭاي ما؟

ول شۇعىل ىسكە كىرىسىپ, اينالاسى ءبىر اپتانىڭ ىشىندە «لەكسۋس-600»-ءتى ەسىكتىڭ الدىنا «بايلاعان». وسى ارالىقتا ونىڭ قالاي دىزاقتاپ, زىر جۇگىرگەنىن كورسەڭىز عوي. وسىندايدا ءناپسىنى قالاي قۇدىرەتتى دەمەيسىڭ؟ پەندەسىن اقىل-ەستەن ايىرىپ, جۇگىرتىپ قويعان.

ونىڭ ورتانشى ۇلى ۇيلەنگەندە ءبىر تۋىسىنىڭ جاساعان تويىنان اسىرامىن دەپ تامادانىڭ تاڭداۋلىسىنا جۇگىنىپ, ءانشى-قۇشىناشتى توي الاڭىنا ءيىرىپ قويامىن دەپ شاتى ايىرىلا جازداعانى, بۇل الا-وكپە تىرلىگى ءۇشىن ەشكىمنەن «جارايسىڭ, بارەكەلدى» دەگەن ءبىر اۋىز ءسوز ەستىمەي, قۇرى بوسقا شىعىنعا شاش ەتەكتەن باتقانىنا ىشكى الەمى كۇل بولىپ ورتەنىپ كەتكەنى دە بار, بۇل جازعاننىڭ.

بۇل وزىنە قاراعاندا دۇنيە-مۇكامالى كەم, جوق-جىتىكتەۋ اعايىن, جاقىندارىنىڭ اراسىندا تاكاپپار, مەنمەن. ءشىرتيىپ قالادى. وزىنەن دۇنيە جاعىنان ءباسى جوعارىنىڭ الدىندا ءلاپپايشىل. وندايلاردىڭ كەز كەلگەن تومەندەتۋلەرىنە كونە بەرەدى. ارلانبايدى. وزىنەن ءجۇز تەڭگەسى ارتىقتىڭ مۇنى بوقتاپ, بالاعاتتاۋىنا قاشان دا رۇقسات.

سوڭعى كەزدەرى ونىڭ مازاسى قاتتى قاشىپ ءجۇر. سەبەبى وتە ۇلكەن. ول وسىدان ءۇش-ءتورت جىل بۇرىن كەلىستىرىپ تام سالىپ كىرگەن. ەكى قاباتتى, جيىرما بولمەلى ءۇيدىڭ ءىشى-سىرتىندا ادامعا نە كەرەكتىڭ ءبارى بار. بارلىق جاعداي جاسالعان. قۇدايدىڭ بەرگەن بەس پەرزەنتى وسى ۇيدە ءوسىپ-ونەدى, بارلىق كەلىندەرىم وسىندا تۇرادى, نەمەرەلەرىم, شوبەرەلەرىم قىزىعىن كورەدى دەگەن نيەتپەن سالعان جوق ول بۇل ءۇيدى. بۇل ماقتانگەرشىلىكپەن, دۇنيەجارىس الەگىمەن سالىنعان. ەكى قىزدىڭ ءبىرى تۇرمىستا, ەكى ۇل ەنشىسىن الىپ كەتكەن. كەنجە ۇل مەن كىشى قىز قولدا. ولار دا امەريكاعا بارىپ وقيمىز دەپ, مۇحيتتىڭ ارعى بەتىنە قاراپ « ۇلىپ» ءجۇر.

ءوز نەمەرەلەرى, جيەندەرى كەلسە بۇل جارىقتىق تىرىسىپ قالادى. قايسىسى كەلسە دە سوڭدارىنا ءتۇسىپ اڭدۋمەن بولادى. بار قاۋپى – قىمبات وبويلاردى بۇلدىرەدى نەمەسە تاعى بىرنارسەنى قۇرتادى.

سوڭعى كەزدەرى وسى ەكى قاباتتى ءۇيدىڭ مۇنىڭ الدىندا بەدەلى قاشا باستادى. وسىناۋ ءزاۋلىم عيمارات مۇنىڭ كوزىنە كىشكەنتاي ۇيشىك, تاۋىق كەپە نە جاي عانا كەتەكحانا بولىپ كورىنىپ ءجۇر. ۇيىنە كىرسە دە, شىقسا دا قۇتى قاشىپ, ەڭسەسى ءتۇسىپ, يىعى قۋشيىپ, قۇنىستانىپ, ءبۇرىسىپ قالادى. اينالاسىنداعى كورشىلەرىنىڭ ءبارى بىرىنەن سوڭ ءبىرى ۇيلەرىن كوپ قاباتتى ەتىپ سالا باستادى. ءتىپتى, وڭ جاعىنداعىسى مەن سول جاعىنداعىسى ءۇش قاباتتى قىلىپ كەلىستىرە سالىپ, قونىس تويىن تويلاپ كىرىپ تە الدى. بۇل ەكى كورشىسى باسىندا ءتورت قاباتتى ەتىپ سالماق بولعان. مۇنى ەستىگەن بۇل ولارعا «ۋاعىزىن» اياماي, ءۇش قاباتتى ەتىپ سالۋعا ازەر كوندىرگەن. ەگەر ولار ءتورت قاباتتى ەتىپ سالعاندا مۇنىڭ جاعدايى قازىرگىدەن دە اۋىر بولار ەدى.

الگى ەكى كورشىسى جاڭا تام سالامىز دەگەندە بۇل ولارمەن ەتەنە جاقىنداسىپ, جاناشىرلىق تانىتقان بولىپ «اقىل كەڭەسىن اياماعان». سونداعى ماقساتى – ولاردى وزىنەن اسىپ تۇسىرمەۋ. باستاپقىدا ەكى قاباتتى ەتىپ سالۋلارىنا «كۇش سالعان». ونىسىنان تۇك تە شىقپاعان. سودان ول بارىن سالىپ, نە بولسا دا ءۇش قاباتتان اسىرماۋلارىنا ۇندەپ, ءتورت قاباتتى ءۇيدى جىلىتۋ, سۋمەن, جارىقپەن قامتۋ كوپ شىعىن ەكەنىن, باسقا دا قيىندىعىن ايتىپ, اعالىق شىن جاناشىرلىق تانىتقان بولىپ ءجۇرىپ كوندىرگەن. ەگەر ولار ءتورت قاباتتى ءۇي سالىپ كىرگەندە بۇل «كومادان» ءبىر-اق شىعار ەدى.

باتىسى مەن شىعىسىنداعى كورشىلەرى دە بىرەر جىلدا ۇيلەرىن جاڭالاماق. ول ەندى وسى ەكەۋىمەن امپەي-جامپەي. ەگەر بۇل ەكەۋى ءۇش نە ءتورت قاباتتى ەتىپ سالسا, مۇنىڭ جاعدايى ودان سايىن قيىنداي تۇسەرى ءسوزسىز. سوندىقتان ولاردى قالاي دا تىزگىندەپ, ايتقانعا كوندىرۋ كەرەك. بۇل ۇلكەن مىندەت. كوڭىلگە ءبىر دەمەۋ بولاتىنى – شىعىسىنداعى كورشىسىنىڭ ازىرگە ءزاۋلىم ءۇي سالۋعا جاعدايى جوق. مۇنىڭ ءوزى داتكە قۋات.

ەگەر كورشىلەرىنىڭ بارلىعى ءۇي جاعىنان كەلگەندە وزىنەن اسىپ تۇسسە بۇل باسقا جاقتان ءزاۋلىم ءۇي سالىپ كوشىپ كەتەدى نەمەسە ەسىل جاڭا ءۇيىن بۇزىپ ءتورت قاباتتى ەتىپ باسىنان سالادى. سوندا عانا بۇل تىنىشتالادى. مىنە, سولاي.

ۇل مەن قىزى, ايەلى كيىم كيۋ, ساندەنۋ, سوڭعى نۇسقاداعى سمارتفون ساتىپ الۋ, شەتەلگە قىدىرۋ جارىسىندا بەلسەنىپ ءجۇر. ءوزىنىڭ جاعدايى بولسا مىناداي.

دۇنيەجارىس «چەمپيوناتى» قىزۋ ءجۇرىپ جاتىر. قوعام ەنتىگىپ تۇر. بايىڭ دا, قالتالىڭ دا, ورتاشاڭ دا, كەدەيىڭ دە, كەپشىگىڭ دە سول «جارىستا». قۇداي سابىر بەرسىن, جاقسىلىعىنا باستاسىن. وكپەمىز ءوشىپ قالىپ جۇرمەسىن. اياز بي قۇساپ, كەشەگى كۇنىمىزدى ەستەن شىعارمايىق, اعايىن. اقىلدى بولايىق, ارزىمايتىن ىسپەن, ارزان دا ابىرويسىز جولعا تۇسپەيىك. قارىندى دا, كوڭىلدى دە قاناعات قانا تويدىرادى. ونسىز ولاردى تويدىرامىن دەپ بوسقا ارامتەر بولاسىز. قينالاتىن ءوزىڭىز, وزگەنىڭ تۇگى دە كەتپەيدى. دۇنيەجارىس وزگەگە قۇل ەتەدى, ودان باسقا ەشتەڭە بەرمەيدى. ءناپسىڭدى بيلە. ونىڭ تابانىنىڭ استىندا قالما. ءناپسىنىڭ تابانىندا جاتقاندار از با؟..