بيىل اقتاۋ قالاسى – تۇركى الەمىنىڭ مادەني استاناسى بولىپ تانىلعالى الداعى ءىس-شارالارعا دايىندىق جۇمىستارى قىزۋ ءجۇرىپ جاتىر. وسى ورايدا, اقتاۋ قالاسى اكىمدىگىنىڭ قولداۋىمەن «اقتاۋ – تۇركى الەمىنىڭ مادەني استاناسى-2025» جوباسى اياسىندا قالالىق اباي اتىنداعى مادەنيەت سارايىنا 2 اۆتوبۋس پەن 1 «گازەل» اۆتوكولىگى تابىستالدى.
ۇزىن سانى 39 شىعارماشىلىق ۇجىمى بار مادەنيەت ءۇيى گاسترولدىك ساپارلارعا ءجيى شىعاتىنى بەلگىلى. سونداي-اق اۋقىمدى شارا كەزىندە ارتىستەردى تاسۋ ءۇشىن كولىكتەردىڭ قاجەت ەكەنى انىق. جاڭا اۆتوبۋس ارتىستەردىڭ الىس-جاقىن جول جۇرۋلەرى ءۇشىن قولايلى بولسا, سول سياقتى كوستيۋمدەرىن, رەكۆيزيتتەرىن, دەكوراتسيالارىن تاسىمالداۋدى ايتارلىقتاي جەڭىلدەتەدى. ماڭعىستاۋ وبلىسى جانە اقتاۋ قالاسى اكىمدەرىنىڭ قولداۋىمەن تۇركى الەمىنىڭ مادەني استاناسى شەڭبەرىندە مادەني وشاققا 47 ورىنعا ارنالعان «Daewoo» ماركالى قوس زاماناۋي اۆتوبۋس پەن «گازەل» اۆتوكولىگى بەرىلگەنى – ۇجىم جۇمىسىنا سەرپىن سىيلارى ءسوزسىز.
– بىزدە بۇگىن ۇلكەن مەرەكە. ويتكەنى وبلىس جانە قالا اكىمدىگى 2 بىردەي اۆتوبۋس پەن «گازەل» سىيلادى. بۇل – بىزدەر ءۇشىن ۇلكەن كومەك, – دەدى قازاقستاننىڭ حالىق ءارتىسى گۇلجان تالپاقوۆا.
اباي اتىنداعى مادەنيەت سارايىنىڭ ۇجىمى زاماناۋي ۇلگىدەگى اۆتوبۋستارعا العاش رەت قول جەتكىزىپ وتىر. ونەر يەلەرى مۇنداي توسىن سىيعا تاڭدانىسىن جاسىرمادى. «بيىل اقتاۋ تۇركى الەمىنىڭ استاناسى بولىپ بەلگىلەندى. قالانىڭ مارتەبەسى وسكەنى اۋەلى مادەني وشاقتان باستالعانى دا قۋانىش سىيلاپ وتىر», دەدى مادەنيەت سارايىنىڭ كوركەمدىك جەتەكشىسى قۇدايبەرگەن احمەتوۆ.
ماڭعىستاۋ وبلىسى