22 مامىر كۇنى قازاقستاننىڭ 16 وبلىسىندا اۋا رايىنا بايلانىستى ەسكەرتۋ جاريالاندى. ەلدىڭ باسىم بولىگىندە جاڭبىر, نايزاعاي, قاتتى جەل, بۇرشاق, شاڭدى داۋىل جانە ۇسىك بولادى دەپ بولجانعان. كەي جەرلەردە قار ارالاس جاڭبىر جاۋى مۇمكىن, دەپ حابارلايدى Egemen.kz «قازگيدرومەتكە» سىلتەمە جاساپ.
استانادا تۇندە توپىراق بەتىندە 2 گرادۋسقا دەيىن ۇسىك جۇرەدى. الماتىدا جاڭبىر مەن نايزاعاي كۇتىلەدى, تۇندە كەي ۋاقىتتا قاتتى جاڭبىر جاۋادى. جەلدىڭ ەكپىنى سەكۋندىنا 15-18 مەترگە دەيىن جەتەدى.
اباي, شىعىس قازاقستان, پاۆلودار, قوستاناي, اقمولا جانە قاراعاندى وبلىستارىندا تۇمان ءتۇسىپ, تۇندە ۇسىك بولۋى مۇمكىن. كەي وڭىرلەردە قار ارالاس جاڭبىر جاۋادى. جەل كۇشەيىپ, ەكپىنى 23-28 م/س-قا دەيىن بارادى.
الماتى, جامبىل جانە جەتىسۋ وبلىستارىنىڭ تاۋلى ايماقتارىندا قاتتى جاڭبىر, نايزاعاي, بۇرشاق پەن داۋىل كۇتىلەدى. كەي جەرلەردە جەل وتە قاتتى سوعادى.
اقتوبە, اتىراۋ, باتىس قازاقستان, قىزىلوردا جانە ماڭعىستاۋ وبلىستارىندا شاڭدى داۋىل بولۋى ىقتيمال. سونىمەن قاتار كوپتەگەن وڭىردە جوعارى جانە توتەنشە ءورت قاۋپى ساقتالادى.
سينوپتيكتەر جاز مەزگىلى ىستىق بولاتىنىن, بىراق جاۋىن-شاشىن ءجيى تۇسەتىنىن حابارلادى.