رەسەي پرەزيدەنتى ۆلاديمير پۋتين ەر-ريادتا رەسەي مەن اقش دەلەگاتسيالارى اراسىنداعى كەلىسسوزدىڭ ناتيجەلى وتكەنىن جوعارى باعالاپ وتىر, دەپ حابارلايدى Egemen.kz.
بۇل تۋرالى كرەمل باسشىسى سانكت-پەتەرۋبرگتەگى «رادار ممس» عىلىمي-وندىرىستىك كاسىپورنىنا بارعان كەزىندە تىلشىلەرگە بەرگەن سۇحباتىندا ايتتى.
پرەزيدەنت باسقوسۋدا تالقىلانعان باستى تاقىرىپتىڭ ءبىرى ۋكرايناداعى جاعداي بولعانىن اتاپ ءوتتى. بۇدان بولەك تاراپتار تاياۋ شىعىستاعى احۋال, ەكونوميكا, ەنەرگەتيكا جانە عارىشتى يگەرۋ ماسەلەلەرى قوزعالعانىن جەتكىزدى. ۆلاديمير پۋتين ماسكەۋ مەن ۆاشينگتونداعى ەكى ەل ديپلوماتيالىق ميسسيالارىنىڭ جۇمىسىن قايتا قالپىنا كەلتىرۋ شەشىمىن دە قۇپتايتىنىن ءبىلدىردى.
«كەلىسسوزدىڭ ماقساتى - رەسەي مەن اقش قارىم-قاتىناسىن قالپىنا كەلتىرۋ. ەكى ەل اراسىنداعى سەنىم دەڭگەيىن ارتتىرمايىنشا, ۋكرايناداعى جاعدايدى رەتتەۋ سىندى كۇردەلى ماسەلەلەردى شەشۋ مۇمكىن ەمەس. تەلەفون ارقىلى سويلەسكەندە دونالد ترامپ كەلىسسوزدەرگە رەسەي دە, ۋكراينا دا قاتىساتىنىن ايتقان. ەشكىم ۋكراينانى شەتتەتكەن جوق. امەريكا پرەزيدەنتىمەن كەزدەسۋ ءۇشىن ءبىزدىڭ كوماندامىز ەكى جاققا دا ماڭىزدى سۇراقتاردى دايىنداۋ كەرەك. بۇل قوس تاراپ ءۇشىن ءتيىمدى شەشىمدەر قابىلداۋعا قاجەت. ال ول وڭاي شارۋا ەمەس», دەدى ۆ. پۋتين.