اقشانى قاتە اۋدارۋ – كەز-كەلگەن اداممەن بولۋى ىقتيمال جاعىمسىز جاعداي. كەيدە بۇل شوتتىڭ ءنومىرىن نەمەسە تەلەفون ءنومىرىن قاتە تەرۋ, ال كەيدە اقشانى باسقا ادامعا اۋدارىپ جىبەرەتىن كەزدەر بولادى. قالاي بولعاندا دا, اقشانى قايتارۋ, اسىرەسە, اقشانى العان ادام بايلانىسقا شىققىسى كەلمەگەن جاعدايدا قيىنعا سوعۋى مۇمكىن. Fingramota.kz مۇنداي جاعدايلاردا نە ىستەۋ كەرەك, اقشانى قايتارۋدىڭ قانداي جولدارىن ۇسىندى, دەپ حابارلايدى Egemen.kz.
بۇل رەتتە, قاتە جاسالعان اۋدارىمداردىڭ بارلىعىن سول ساتتە بولدىرماۋ مۇمكىن ەمەستىگىن ءتۇسىنۋ قاجەت. ەگەر اقشاڭىز الۋشىنىڭ شوتىنا اۋدارىلىپ كەتسە, ونى قايتارۋ پروتسەسى قيىنعا سوعادى.
ەگەر ءسىز اقشانى قاتەلەسىپ اۋدارىپ جىبەرسەڭىز نە ىستەۋ كەرەك؟
دەرەۋ بانكپەن بايلانىسىڭىز. ەگەر ءسىز اۋدارىم جاساعاننان كەيىن قاتەلەسكەنىڭىزدى بىردەن بىلسەڭىز, دەرەۋ ءوز بانكىڭىزبەن بايلانىسىڭىز. كەيبىر جاعدايلاردا, اسىرەسە, ەگەر اۋدارىم ءالى وڭدەلىپ ۇلگەرمەسە, بانك ترانزاكتسيانى بولدىرماۋى مۇمكىن. ءموبيلدى قوسىمشاداعى چاتتى پايدالانىڭىز نەمەسە قولداۋ قىزمەتىنە جەدەل تۇردە قوڭىراۋ شالىڭىز. ەگەر اقشا ءسىزدىڭ شوتىڭىزدان الىنىپ, باسقا شوتقا اۋدارىلسا, وندا باسقا شەشىم تالاپ ەتىلەدى.
الۋشىمەن بايلانىسۋعا تىرىسىڭىز. ەگەر ءسىز اقشانى كەزدەيسوق باسقا ادامعا جىبەرگەن بولساڭىز, ونىڭ بايلانىس دەرەكتەرىن تابۋعا تىرىسىڭىز (مىسالى, ءموبيلدى بانك نەمەسە تولەم تاريحى ارقىلى) جانە تىكەلەي حابارلاسىڭىز. جاعدايدى سىپايى تۇردە ءتۇسىندىرىپ, قاراجاتتى قايتارۋدى سۇراڭىز.
الۋشىنىڭ بانكىنە حابارلاسىڭىز. ەگەر تىكەلەي بايلانىس مۇمكىن بولماسا, اقشا جىبەرىلگەن بانككە حابارلاسىڭىز. قاتە اۋدارىمدى قايتارۋ تۋرالى ءوتىنىش جازىڭىز. بۇل جاعدايدا بانك الۋشىنى سۇراۋ سالۋ تۋرالى حاباردار ەتە الادى جانە اقشانى ءوز ەركىمەن قايتارۋدى ۇسىنا الادى. بۇل رەتتە اۋدارىم كۇنى مەن ۋاقىتى, سوماسى, اقشا جىبەرىلگەن شوت نەمەسە كارتا ءنومىرى جانە قاتەنىڭ سيپاتتاماسى قاجەت بولادى.
ەگەر الۋشى اقشانى قايتارۋدان باس تارتسا, وندا اقشانى ءوندىرىپ الۋ تۋرالى تالاپ-ارىز بەرۋگە بولادى, سەبەبى قولدانىستاعى زاڭنامادا, قر ازاماتتىق كودەكسىنە سايكەس بۇل ارەكەت «نەگىزسىز بايىتۋ» رەتىندە قاراستىرىلادى. سونداي-اق, ءسىز قر ۇلتتىق بانكىنىڭ قولدانىستاعى قايتا قارجىلاندىرۋ مولشەرلەمەسى بويىنشا اقشاڭىزدى پايدالانعانى ءۇشىن سىياقى ءوندىرىپ الا الاسىز. ول ءۇشىن الۋشى سوتقا دەيىنگى ءوتىنىشتى جىبەرۋى, اقشا اۋدارىمىن راستاۋى (بانكتەن ءۇزىندى كوشىرمە) جانە سوتقا ارىز بەرۋى قاجەت. سوت كوپ جاعدايدا اقشانى قايتارۋعا مىندەتتەيدى, بىراق بۇل پروتسەسس بىرنەشە ايعا سوزىلۋى مۇمكىن.
كەيدە جاعداي كەرىسىنشە سىزگە كۇتپەگەن جەردەن اقشا كەلىپ ءتۇسۋى مۇمكىن. بۇل رەتتە قاراجاتتىڭ سىزدىكى ەمەس ەكەنىن جانە ولاردى پايدالانۋ زاڭدى سالدارعا اكەلۋى مۇمكىن ەكەنىن ءتۇسىنۋ ماڭىزدى.
مۇنداي جاعدايدا بانككە حابارلاسىپ, بەلگىسىز قاراجاتتىڭ اۋدارىلعانى تۋرالى مالىمدەۋ كەرەك. سونداي-اق, بۇل اقشانى جۇمساماۋعا تىرىسىڭىز, بانكتىڭ رەسمي ءوتىنىشىن كۇتىپ, ەگەر جىبەرۋشى قايتارۋ تۋرالى ءوتىنىش بىلدىرسە, قاراجات ءسىزدىڭ قاتىسۋىڭىزسىز ەسەپتەن شىعارىلۋى مۇمكىن.
سونىمەن قاتار كەيدە الاياقتار كوبىنەسە اقشانى ادەيى از مولشەردە جىبەرىپ, سودان كەيىن ولاردى باسقا شوتقا قايتارۋدى تالاپ ەتەدى. بۇل اقشانى جىلىستاتۋ, ءسىزدى «قارجىلىق سحەماعا قاتىسۋشى» مارتەبەسىنە اۋىستىرۋ نەمەسە جەكە دەرەكتەرىڭىزدى سۇراۋ ارەكەتى بولۋى مۇمكىن.
ەستەرىڭىزگە سالا كەتەيىك, «قاتە اۋدارىمدارى» بار سحەمالاردى كوپ جاعدايدا دروپپەرلەر پايدالانادى. ەگەر ءسىز ولارعا كومەكتەسىپ, اقشانى ولار كورسەتكەن شوتقا اۋدارساڭىز, ولار سىزگە «مازالاعانى ءۇشىن» دەپ, قاراجاتتىڭ ءبىر بولىگىن قالدىرۋدى ۇسىنۋى مۇمكىن. الايدا, كەيىننەن زارداپ شەككەن ادام سىزدەن بارلىق سومانى ازاماتتىق تارتىپپەن ءوندىرىپ الۋى مۇمكىن.