قىزىلوردا وبلىسى پوليتسيا دەپارتامەنتىنىڭ باسشىلىعى مەن جەكە قۇرامى دۋبايدا وتكەن SWAT Challenge حالىقارالىق جارىسىنان جەڭىسپەن ورالعان ارىپتەستەرى لاۋرا تولەكوۆانى سالتاناتپەن كۇتىپ الدى, دەپ حابارلايدى Egemen.kz.
وسى جىلدىڭ 1-5 اقپانى ارالىعىندا دۋباي قالاسىندا ارنايى كۇشتەردىڭ 6-شى حالىقارالىق ءتۋرنيرى وتكەن بولاتىن. جىلدام قيمىلدايتىن ارنايى جاساق ينسپەكتورى, پوليتسيا كاپيتانى لاۋرا تولەكوۆا ىشكى ىستەر مينيسترلىگىنىڭ ارنايى ماقساتتاعى بولىنىستەرىنىڭ ايەل قىزمەتكەرلەرىنەن قۇرالعان «توميريس» كومانداسىنىڭ قۇرامىندا ۇزدىك ونەر كورسەتتى,
SWAT Challenge حالىقارالىق جارىسىندا 100-دەن استام ەلدىڭ كۇشتىك قۇرىلىمدارى ارنايى بولىنىستەرىنىڭ قىزمەتكەرلەرى باق سىناسقان. بيىل العاش رەت بۇل جارىستا ەرلەرمەن قاتار قاتىسقان ايەلدەر قيىن تاپسىرمالاردى ورىنداپ شىقتى.
جارىستىڭ ءۇشىنشى كۇنىنىڭ قورىتىندىسى بويىنشا 50-دەن اسا كوماندانى باسىپ وزعان «توميريس» كومانداسى بارلىق سىناقتان ءساتتى ءوتىپ, ەرلەر كوماندالارىمەن تەرەزەسى تەڭ ونەر كورسەتتى. پوليتسەي قىزداردىڭ ءابجىل قيمىلى ارقاسىندا ايەلدەر اراسىندا قازاقستان قۇراماسى ەكىنشى ورىندى يەلەندى.