قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە «بارشاعا ارنالعان قازىرگى زامانعى مەملەكەت» – 100 ناقتى قادام ۇلت جوسپارىن ىسكە اسىرۋ تۇرعىسىندا ەتنومادەني بىرلەستىكتەردىڭ قىزمەتى تۋرالى» تاقىرىبىندا بريفينگ ءوتتى.
شاراعا قحا كەڭەسىنىڭ مۇشەلەرى, اتاپ ايتساق, قازاقستان نەمىستەرىنىڭ «ۆوزروجدەنيە» قاۋىمداستىعى» قوعامدىق بىرلەستىگىنىڭ توراعاسى الەكساندر دەدەرەر, قازاقستان تۇرىكتەرىنىڭ «احىسكا» قوعامى» قوعامدىق بىرلەستىگىنىڭ توراعاسى زياتدين كاسانوۆ, استانا قالاسىنداعى «زلاتا» بولگار ەتنومادەني بىرلەستىگىنىڭ ءتورايىمى ولگا اندريەۆسكايا, «قازاقستان كۇردتەرىنىڭ «باربانگ» قاۋىمداستىعى» رەسپۋبليكالىق قوعامدىق بىرلەستىگىنىڭ توراعاسى كنياز ميرزوەۆ, پرەزيدەنت اكىمشىلىگى قازاقستان حالقى اسسامبلەياسى حاتشىلىعىنىڭ سەكتور مەڭگەرۋشىسى ءنازيپا شاناي قاتىستى.
جيىن بارىسىندا «بارشاعا ورتاق قازىرگى زامانعى مەملەكەت» – 100 ناقتى قادام ۇلت جوسپارىن ىسكە اسىرۋ ءمان-ماتىنىندە ەتنومادەني بىرلەستىكتەردىڭ قىزمەتى تۋرالى» باياندالىپ, قازاقستان حالقى اسسامبلەياسى جىلىنىڭ ارالىق قورىتىندىلارى تۋرالى, قحا جىلىن ۇيىمداستىرۋ جانە وتكىزۋ جونىندەگى مەملەكەتتىك كوميسسيانىڭ الدا بولاتىن ءماجىلىسى تۋرالى ايتىلدى. 20 جىل ىشىندە اسسامبلەيا ن.ءا.نازارباەۆتىڭ ەتنوسارالىق تولەرانتتىلىق پەن قوعامدىق كەلىسىمنىڭ قازاقستاندىق ۇلگىسىن قالىپتاستىرۋدا بەدەلدى بۋىنعا اينالعانى اتاپ كورسەتىلدى.
بۇگىندە رەسپۋبليكادا 960-تان استام ەتنومادەني بىرلەستىك بار, سونىڭ ىشىندە 29-ى – رەسپۋبليكالىق ەتنومادەني بىرلەستىك ەكەن. 11 دوستىق ءۇيى, الماتىدا رەسپۋبليكالىق دوستىق ءۇيى جۇمىس ىستەپ تۇر. جىل سوڭىنا دەيىن اقتاۋ, قىزىلوردا, ورال قالالارىندا دوستىق ۇيلەرى اشىلاتىن بولادى.
اسسامبلەيانىڭ باستاماسىمەن وبلىستىق, قالالىق, اۋداندىق جانە اۋىلدىق دەڭگەيلەردە, سونداي-اق, ءىرى كاسىپورىنداردىڭ ۇجىمدارىندا قوعامدىق كەلىسىم كەڭەستەرى مەن وتباسىندا تولەرانتتىلىقتى تاربيەلەۋ ماسەلەلەرى جونىندەگى انالار كەڭەستەرى قۇرىلدى. قوعامدىق كەلىسىم كەڭەستەرىنىڭ سانى – 1470, وتباسىندا تولەرانتتىلىقتى تاربيەلەۋ ماسەلەلەرى جونىندەگى انالار كەڭەستەرىنىڭ سانى – 163-كە جەتتى. 14 جوعارى وقۋ ورنىندا قازاقستان حالقى اسسامبلەياسىنىڭ كافەدراسى اشىلدى.
پارلامەنت ماجىلىسىندە دە قحا-نىڭ دەپۋتاتتىق توبى جۇمىس ىستەيدى. V شاقىرىلىمداعى قحا دەپۋتاتتىق توبى وسىعان دەيىن 38 وتىرىس وتكىزىپ, 6 زاڭ جوباسىنا باستاماشىلىق جاسادى. 151 دەپۋتاتتىق ساۋال جاريا ەتىلسە, ولاردىڭ 317-ءسى بىرلەسكەن دەپۋتاتتىق ساۋالدار. ازاماتتاردىڭ 1511 جازباشا وتىنىشتەرىن قارادى. قحا-نىڭ دەپۋتاتتىق توبى 472 ەلدى مەكەنگە بارىپ, حالىقپەن 1199 كەزدەسۋ وتكىزدى, 1422 ادامدى جەكە قابىلدادى.
قحا جىلى اياسىندا ءتۇرلى باعىتتاعى ءىس-شارالار, ونىڭ ىشىندە «قحا – 20 ىزگى ءىس» اكتسياسى جىل سوڭىنا دەيىن جالعاسادى.
راۋشان تاۋىرحانقىزى,
جۋرناليست.
استانا.