وڭىرلەردە سۋ تاسقىنىنا قارسى دايىندىق باستالدى

مينيسترلىكتىڭ مالىمەتىنشە, ەلىمىزدە سۋ باسۋ قاۋپى بار 1 223 ەلدى مەكەن انىقتالىپ وتىر.  جالپى وڭىرلەردە 1 400 سۋ تاسقىنىنا قارسى ءىس-شارا جۇزەگە اسىرىلعان. ەلدى مەكەندەردى قورعاۋ ءۇشىن 576 كيلومەتر قورعانىش بوگەتتەرى سالىنىپ, 164 كيلومەتر درەناج جۇيەسى جوندەلگەن. 960 اۆتوموبيل جانە تەمىر جولداردىڭ استىنا سۋ وتكىزۋ قۇرىلىستارى ورناتىلىپ, اۋىستىرىلعان. 658 كيلومەتر كانال مەن ارىق قازىلعان. 74 وزەننىڭ قاۋىپتى ۋچاسكەسىندە ءۇش جۇزدەن استام كيلومەتر تەرەڭدەتۋ مەن جاعالاۋدى نىعايتۋ, 190 كيلومەتردە تازارتۋ جۇمىستارى جۇرگىزىلگەن.

ەلدى مەكەندەردىڭ ىشىندە جاڭبىر مەن درەناج جۇيەلەرى جوندەلىپ, سالىنىپ جاتىر. سونىمەن قاتار اۋىلداردا قار شىعارۋ ءۇشىن قاۋىپسىز پوليگوندار الدىن الا انىقتالعان.

اقتوبە وبلىسىنىڭ اكىمى اسحات شاحاروۆ وڭىردەگى سۋ تاسقىنىنا قارسى ءىس-شارالاردىڭ بارىسىن تەكسەردى. تجد كوماندالىق-شتابتىق ماشيناسى مەن ۇشقىشسىز ۇشۋ اپپاراتتارىنىڭ كومەگىمەن اسحات شاحاروۆ ەلەك جانە قارعالى وزەندەرىنىڭ بويىنداعى ىقتيمال قاۋىپتى ۋچاسكەلەردى, سونداي-اق سازدى سۋ قويماسىن باقىلادى.

الماتى وبلىسىنىڭ تالعار اۋدانىندا دا سۋ تاسقىنىنىڭ الدىن الۋ شارالارى جۇرگىزىلىپ جاتىر. دايىندىق  اياسىندا قازتۋعان جىراۋ كوشەسىندەگى ارىق جەلىلەرى مەن ارنالار, توپولەۆكا وزەنىنىڭ جاعالاۋىن تازارتۋ جانە ءتۇبىن تەرەڭدەتۋ جۇمىستارى جۇرگىزىلگەن. 

استانا سۋ رەتتەگىشى قۇرىلىسىنا تەكسەرۋ جۇرگىزىلدى. تەكسەرۋ جۇمىستارى بارىسىندا تجد جانە تج الدىن الۋ كوميتەتىنىڭ قىزمەتكەرلەرى «قازسۋشار» رمك اقمولا فيليالىنىڭ وكىلدەرىمەن بىرلەسىپ, تاسقىن سۋلاردى قابىلداۋ جانە وتكىزۋ, وبەكتىنى رەكونسترۋكتسيالاۋعا دايىندىق ماسەلەلەرىن زەردەلەگەن. 

جامبىل وبلىسىنىڭ اكىمى ەربول قاراشوكەەۆ بيىل بايزاق اۋدانى مەن تاراز قالاسىندا سۋ تاسقىنىنىڭ الدىن الۋ, ونىڭ ىشىندە تالاس وزەنى جاعالاۋىن نىعايتۋ ءىس-شارالارى بارىسىمەن تانىستى. تەكسەرۋ بارىسىندا تجد قىزمەتكەرلەرى بايزاق اۋدانىنداعى سارىكەمەر, ديحان, ايمانتوبە جانە قوستوبە اۋىلدارى ارقىلى وتەتىن تالاس وزەنىنىڭ ارناسىن تازالاۋ جانە نىعايتۋ جۇمىستارىن قاجەت ەتەتىن سۋ باسۋى مۇمكىن 6 قاۋىپتى ۋچاسكەنى انىقتادى. 

شىمكەنت قالاسىنىڭ تجد جەرگىلىكتى اتقارۋشى ورگاندار جانە باسسەيندىك ينسپەكتسيامەن بىرلەسىپ, سۋ تاسقىنى قاۋپى بار ۋچاسكەلەردى كوزبەن شولىپ تەكسەرۋ ماقساتىندا جەدەل كەڭەس وتكىزگەن. تەكسەرۋ بارىسىندا ىقتيمال قاۋىپتەرگە جان-جاقتى تالداۋ جاسالعان.