ىشكى ىستەر مينيسترلىگى پروكۋراتۋرامەن بىرلەسىپ, 25 جىل بۇرىن ورال قالاسىندا بولعان ادام ءولتىرۋ قىلمىسىن اشتى, دەپ حابارلايدى Egemen.kz.
قايعىلى وقيعا 2000 جىلدىڭ جەلتوقسانىندا بولعان. قىلمىستىڭ جاسالۋىنا قارجىلىق كەلىسپەۋشىلىك سەبەپ بولعان. سالدارىنان ەكى تۇرعىن وق جاراقاتىنان قازا تاپقان.
جۇرگىزىلگەن جەدەل ءىس-شارالاردىڭ ناتيجەسىندە ەكى كۇدىكتى – تاپسىرىس بەرۋشى مەن ورىنداۋشى ۇستالعان.
ءىىم مالىمەتىنشە, تىكەلەي دالەلدەردىڭ بولماۋىنا بايلانىستى قىلمىس ۇزاق ۋاقىت بويى اشىلماعان.
«الايدا جەدەل-تەرگەۋ توبىنىڭ مۇقيات جۇمىسىنىڭ ارقاسىندا وقيعالار تىزبەگىن قالپىنا كەلتىرىپ, كۇدىكتىلەردى انىقتادىق. سوتقا دەيىنگى تەرگەپ-تەكسەرۋ بارىسىندا ولاردىڭ قىلمىسقا قاتىستىلىعىن راستايتىن قوسىمشا ايعاقتار الىندى. قىلمىستىق ءىس «الدىن الا ءسوز بايلاسۋ بويىنشا توپتىڭ ەكى نەمەسە ودان دا كوپ ادامدى ءولتىرۋى» بابى بويىنشا جۇرگىزىلىپ جاتىر», دەدى ءىىم كريمينالدىق پوليتسيا دەپارتامەنتىنىڭ باستىعى قانات نۇرماعامبەتوۆ.