قازاقستان ەلشىلىگى اقش-تاعى ميگراتسيا ساياساتىنىڭ قاتاڭداۋىنا بايلانىستى سوندا جۇرگەن ازاماتتارىمىزعا تارتىپكە باعىنىپ, وزگەرىستەردەن حاباردار بولۋعا شاقىردى, دەپ جازادى Egemen.kz.
ەكىنشى رەت اقش پرەزيدەنتى بولعان دونالد ترامپ ەلدەگى زاڭسىز كوشى-قون ساياساتىن رەتتەۋگە اسا دەن قويىپ وتىر. جاڭا وزگەرىستەرگە ساي شتاتتاردا ۆيزاسىز جۇرگەن جانە تۇراقتى تۇرۋعا رۇقساتى جوق ازاماتتار قاماۋعا الىنىپ نە ەلدەن ءماجبۇرلى تۇردە شىعارىلادى. ولارعا اقش-قا قايتا كىرۋگە شەكتەۋ ەنگىزىلىپ, الەۋمەتتىك كومەك, جۇمىس ىستەۋگە رۇقسات بەرەتىن قۇجاتتار مەن باسقا دا الەۋمەتتىك جەڭىلدىكتەردى جويۋ قاراستىرىلىپ جاتىر.
«اقش بيلىگى زاڭسىز نەگىزدە جۇرگەن شەتەلدىكتەرگە (قۇجاتى جوق, جارامسىز ۆيزا مەن تۇراقتى تۇرۋعا رۇقساتى (گرين كارتا) جانە باسقا قۇجاتتار بولماۋى) ەلدەن ءوز ەركىمەن كەتۋگە مۇمكىندىك بەرىپ وتىر. بۇل شارا قازاقستان ازاماتتارىنىڭ دەپورتاتسياعا ۇشىراۋ قاۋپىن ازايتۋعا جانە ونىڭ سالدارىنان بولاشاقتا اقش ۆيزاسىنا ءوتىنىش بەرگەندە ەل اۋماعىنا كىرۋگە تىيىم سالىنۋىنان ساقتانۋعا كومەكتەسەدى», دەلىنگەن قازاقستان ەلشىلىگىنىڭ حابارلاماسىندا.
ەلشىلىكتىڭ تۇسىندىرۋىنشە, «مەكسيكادا قالىڭىز» ساياساتى قايتا ەنگىزىلگەن. ميگرانتتار مەن ساياسي باسپانا سۇرايتىندار ميگراتسيالىق سوتقا شاقىرعانعا دەيىن مەكسيكادا قالۋعا مىندەتتەلەدى.
«ۇستا دا جىبەر» (catch and release) شاراسى توقتاتىلعان. بۇل وزگەرىسكە وراي اقش شەكاراسىنان زاڭسىز وتكەن ميگرانتتار ءىسى قارالمايىنشا قاماۋدا بولادى. ولار ارنايى ورتالىقتارعا قامالىپ نەمەسە بىردەن كەلگەن ەلدەرىنە قايتارىلادى. ازاماتتار ءۇشىنشى ەلدەرگە دە جىبەرىلۋى مۇمكىن (مىسالى, «مەكسيكادا بولۋ» باعدارلاماسى بويىنشا). سونداي-اق, شارتتى تۇردە ۋاقىتىنان ەرتە بوساتاتىن نەمەسە اقش-قا كىرۋگە الدىن-الا جەڭىلدىكتەر قاراستىرىلعان «CBP One» موبيلدىك قوسىمشاسى جۇمىسىن توقتاتقان.
كونسۋلدىق قۇقىقتىق كومەك قاجەت بولعان جاعدايدا ەلشىلىككە حابارلاسۋ كەرەك ەكەنىن ەسكەرتەدى.