ءماجىلىس دەپۋتاتى قايرات بالابيەۆ ەلىمىزدە سۋ قويمالارىن سالۋ ۋاقىتى نەلىكتەن سوزىلىپ كەتەتىنىن ءتۇسىندىرۋدى تالاپ ەتتى, دەپ جازادى Egemen.kz.
«اۋىل شارۋاشىلىعى مينيسترلىگى ەلىمىز بويىنشا 41 اۆاريالىق سۋ قويما مەن گيدروتەحنيكالىق نىسانداردىڭ كۇردەلى جوندەۋدەن وتكىزىلىپ جاتقانىن, سوڭعى 5 جىلدا 15 جوبانىڭ اياقتالعانىن, بيىل قالعان 19-ىن تاپسىراتىنىن ايتقان ەدى. 10 جىلدان بەرى سالىنباي كەلە جاتقان نە دەگەن بىتپەيتىن 20 سۋ قويماسى؟!», دەدى دەپۋتات پرەمەر-ءمينيستردىڭ ورىنباسارى قانات بوزىمباەۆقا جولداعان ساۋالىندا.
قايرات بالابيەۆ بىلتىر كوكتەمدەگى سۋ تاسقىنىنا دا كوپتەن بەرى ءسوز جۇزىندە قالىپ جاتقان سۋ قويمالارىنىڭ سالىنباۋى سەبەپ بولعانىن العا تارتتى.
«سۋ تاسقىنى اپاتتارىنىڭ تاعى ءبىر سەبەبى – سۋ قويمالارى مەن كانالداردىڭ كوپشىلىگى جەكەمەنشىككە ءوتىپ كەتكەنى. ءبىر عانا تۇركىستان وبلىسىندا 4 سۋ قويماسى مەن 105 كانال جەكە مەنشىكتە. بۇل – ەگىن جانە مال شارۋاشىلىعىمەن اينالىساتىن ارىس, جەتىساي, ورداباسى, وتىرار, سايرام, سارىاعاش, سوزاق, تۇلكىباس جانە شاردارا اۋداندارىندا ورنالاسقان جالپى ۇزىندىعى 335 شاقىرىمدى قۇرايتىن سۋ ارنالارى», دەدى ءماجىلىس دەپۋتاتى.
وڭىردە ەگىس ناۋقانى باستالعاندا سۋ ماسەلەسى ۋشىعا تۇسەدى. دەپۋتات جەكەنىڭ قولىنداعى سۋعا قول جەتكىزە الماعان شارۋالاردىڭ ءىسى دە تۇرالايتىنىن تىلگە تيەك ەتتى.
«وسى رەسۋرستاردى ەگەلەنىپ العاندار شارۋالاردى سۋدان تارىقتىرىپ, الدەقانداي بولادى. ولارمەن داۋلاسىپ جۇرگەندە جاز دا بىتەدى. بۇگىندە پرەزيدەنت تاپسىرماسىنا سايكەس وبلىس اكىمدىگى تاراپىنان جەكەمەنشىك سۋ يەلەرىنىڭ اراسىندا شارۋالاردى سۋدان تارىقتىرماۋ شارالارى جۇرگىزىلىپ جاتىر. بۇعان دەيىن بولعان اپاتتاردى زەردەلەي كەلە, اۋىل شارۋاشىلىعىنا وتە-موتە قاجەتتى سۋ قويمالارى مەن كانالداردىڭ ەل يگىلىگى ءۇشىن جۇمىس ىستەگەنى ءتيىمدى دەپ ەسەپتەيمىن», دەدى قايرات بالابيەۆ.
دەپۋتات جەكەگە ءوتىپ كەتكەن سۋ قويمالارىن مەملەكەت مەنشىگىنە قايتارۋدى نەمەسە شارۋاشىلىقتارعا دەر كەزىندە جانە ارزان باعادا سۋمەن قامتاماسىز ەتۋ شارالارىن قاراستىرۋدى سۇرادى.