قاسىم-جومارت توقاەۆ جوبالىق كەڭسەنىڭ قىزمەتىمەن تانىستى

EXPO قالاشىعىندا ورنالاسقان جوبالىق كەڭسە ەلىمىزدە قولعا الىنعان رەفورمالار مەن ستراتەگيالىق باستامالاردى جۇزەگە اسىرۋ ىسىنە ۇلەس قوسۋدى كوزدەيدى.

جوعارى بيلىك ورگانى جانىنداعى مۇنداي قۇرىلىمدار الەمنىڭ بىرقاتار ەلىندە بار. ماسەلەن, ۇلىبريتانيادا پرەمەر-ءمينيستردىڭ جوبالىق كەڭسەسى (Prime Minister`s Delivery Unit), مالايزيادا PEMANDU, بىرىككەن اراب امىرلىكتەرىندە اكسەلەراتسيا كەڭسەسى قىزمەت كورسەتەدى.

جوبالىق كەڭسە مەملەكەت باسشىسىنىڭ جولداۋلارى مەن قازاقستاننىڭ ۇلتتىق دامۋ جوسپارىنداعى باسىم باعىتتاردى ساپالى جۇزەگە اسىرۋعا ارنالعان شەشىمدەر ازىرلەۋمەن اينالىسادى.

پرەزيدەنتكە فيسكالدىق ورنىقتىلىقتى ارتتىرۋعا ارنالعان پلاتفورمالىق شەشىمدەر ەنگىزۋ, ماڭعىستاۋ وبلىسىن وركەندەتۋ, ادامي كاپيتالدى قالىپتاستىرۋ جانە دامىتۋ سەكىلدى ستراتەگيالىق ماڭىزدى جوبالاردىڭ جۇزەگە اسىرىلۋ بارىسى باياندالدى.

بۇدان بولەك, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى كولىك-لوگيستيكا, دەنساۋلىق ساقتاۋ, ءبىلىم بەرۋ جانە اعارتۋ ءىسى, ەنەرگەتيكا, سۋ, ونەركاسىپ جانە قۇرىلىس, تسيفرلىق, يننوۆاتسيالىق ءارى وڭىرلىك دامۋ سەكىلدى باعىتتارمەن شۇعىلداناتىن ۆەدومستۆوارالىق كوماندالاردى جاساقتادى. بۇل ناقتى سالاداعى بەلگىلى ءبىر مىندەتكە باسا نازار اۋدارىپ, اناعۇرلىم جىلدام ءارى ساپالى ناتيجەلەرگە قول جەتكىزۋگە مۇمكىندىك بەرەدى.

جوبالارمەن تانىسقان قاسىم-جومارت توقاەۆ ەلىمىزدىڭ الەۋمەتتىك-ەكونوميكالىق دامۋىندا ايتارلىقتاي جەتىستىككە جەتۋ ءۇشىن ۇكىمەت مۇشەلەرى باتىل شەشىم قابىلداۋى كەرەك ەكەنىن اتاپ ءوتتى

«الدىمىزدا تۇرعان ماقساتتار وتە ماڭىزدى. ەڭ باستىسى, مەملەكەت باسشىسى بەرگەن تاپسىرمالاردىڭ ورىندالۋ بارىسىن مۇقيات باقىلاۋدا ۇستاۋ قاجەت. بۇل ورتالىقتىڭ نەگىزگى ماقساتى – رەفورمالاردىڭ تيىمدىلىگىن ارتتىرۋ. پرەزيدەنت اكىمشىلىگى باسشىسىنىڭ ءبىرىنشى ورىنباسارى دارحان ساتىبالدى وسى جۇمىستى قاداعالايدى. مينيسترلەر دە, اكىمدەر دە باتىل شەشىم قابىلداۋعا دايىن بولۋعا ءتيىس. مەن وسىعان دەيىن ۇكىمەتتىڭ الدىنا ناقتى مىندەت قويدىم. ەلىمىزدىڭ الەۋمەتتىك-ەكونوميكالىق دامۋىنا قاتىستى ماسەلەلەر بويىنشا بارىنشا دەربەس شەشىم قابىلدانۋعا ءتيىس. ناقتى ناتيجەلەردى تالاپ ەتەمىن», دەدى مەملەكەت باسشىسى.

پرەزيدەنت مينيسترلەر مەن باسشىلاردى بىرقاتار مىندەتتەردى نازاردا ۇستاۋعا شاقىردى.

ء«بىز قازىر ءىرى ينفراقۇرىلىمدىق جوبالارعا, تسيفرلاندىرۋعا, جاساندى ينتەللەكت پەن يادرولىق ەنەرگەتيكاعا باسا ءمان بەرىپ جاتىرمىز. سەبەبى مۇنىڭ ءبارى – مەملەكەتىمىزدىڭ نەگىزگى ستراتەگيالىق دامۋ باعىتتارى. ۇكىمەت وسى ماڭىزدى ماسەلەلەردى جۇمىس بارىسىندا مىندەتتى تۇردە ەسكەرۋگە ءتيىس»,  دەدى پرەزيدەنت.

قاسىم-جومارت توقاەۆ اتوم ەنەرگەتيكاسىن دامىتۋ پەرسپەكتيۆاسىنا دا توقتالدى.

«اتوم ەلەكتر ستانتسياسىنىڭ قۇرىلىسىن جەدەلدەتۋ كەرەك. مەن Ana tili گازەتىنە بەرگەن سۇحباتىمدا ەكى ۇلكەن ستانتسيا سالاتىنىمىزدى ايتتىم. ولاردىڭ سانى ءتىپتى ۇشەۋ بولۋى دا مۇمكىن. قازاقستاندى يادرولىق ەنەرگەتيكاسى دامىعان, جاساندى ينتەللەكت قولدانىلاتىن, تسيفرلاندىرۋ تولىق كولەمدە جۇرگىزىلگەن ەلگە اينالدىرۋىمىز كەرەك», دەدى مەملەكەت باسشىسى.