قازاقستاننىڭ ءورت سوندىرۋشىلەرى كەشەدەن بەرى توقسانعا جۋىق ءورتتى ءوشىردى, دەپ حابارلايدى Egemen.kz توتەنشە جاعدايلار مينيسترلىگىنە سىلتەمە جاساپ.
جاڭا جىل قارساڭىندا قۇتقارۋشىلار كۇشەيتىلگەن رەجىمدە جۇمىس ىستەدى. ماسەلەن, 31 جەلتوقساندا رەسپۋبليكا بويىنشا 88 رەت ءورت پەن تۇتانۋ وقيعاسى تىركەلدى. بۇدان بولەك, ىزدەستىرۋ, اۆاريالىق-قۇتقارۋ جانە باسقا دا جۇمىستارعا قاتىستى.
«بۇل رەتتە 25 ادام, ونىڭ ىشىندە 8 بالا قۇتقارىلدى جانە ەۆاكۋاتسيالاندى», دەيدى قۇتقارۋشىلار.
ال جاڭا جىلعا قاراعان ءتۇنى كاسپي جاعالاۋىندا جاساندى پالما وتقا وراندى. ءورت سوندىرۋشىلەر ونى ءوشىرىپ ۇلگەردى. ال جاعالاۋدا جينالعان حالىق قۇتقارۋشىلارعا قوشەمەت كورسەتتى.
توتەنشە جاعدايلار مينيترلىگى ازاماتتاردى قاۋىپسىزدىك شارالارىن, داۋىل تۋرالى ەسكەرتۋلەردى, اۋا-رايىنىڭ وزگەرۋىن, جولداردىڭ جابىلۋى تۋرالى حابارلامالاردى باقىلاپ, الىس ساپارلارعا شىقپاۋعا شاقىرادى. ال اۋىلدىق جەرلەردە تۇراتىن تۇرعىندارعا اۋا رايى ناشارلاعان جاعدايدا الىس قاشىقتىققا شىقپاعان ابزال.