كۇنتىزبە اۋىسۋىنا بايلانىستى جاڭا جىلدا ءبىراز وزگەرىس بولادى. ونىڭ كەيبىرى – زاڭناما تارتىبىندە كوزدەلگەن وزگەرىستەر بولسا, كەيبىرى – بىلتىرعى باستامالاردىڭ زاڭدى جالعاسى. ماسەلەن, ايلىق ەسەپتىك كورسەتكىش جىل ساناپ ءوسىپ وتىرادى. بىلتىر 3 692 تەڭگە بولسا, بيىل 1 اەك 3 932 تەڭگەگە تەڭ. اەك-ءتىڭ اسەرى زەينەتاقى, جالاقى, الەۋمەتتىك جاردەماقىلارعا دا اسەر ەتەدى.
تاعى ءبىر وزگەرىس – بيىلدان باستاپ جەكە تۇلعالاردىڭ دەكلاراتسيا تاپسىرۋدان بوساتىلۋى. قارجى ءمينيسترى ءمادي تاكيەۆتىڭ ايتۋىنشا, 8 ملن ازامات بۇل مىندەتتەن بوساتىلۋى مۇمكىن. سەبەپ – دەرەكتەر بازاسىنىڭ تسيفرلانۋى جانە قولما-قولسىز تولەم جۇيەسىنىڭ دامۋى. دەگەنمەن جەكە كاسىپكەرلەر, مەملەكەتتىك قىزمەتكەرلەر, كۆازيمەملەكەتتىك سەكتور باسشىلارى مەن ولاردىڭ جۇبايلارى دەكلاراتسيا تاپسىرۋدى جالعاستىرادى.
جاڭا سالىق كودەكسى 2025 جىلدىڭ شىلدەسىنە دەيىن قابىلدانىپ, 2026 جىلدىڭ قاڭتارىنان باستاپ كۇشىنە ەنەدى. نەگىزىنەن مىناداي وزگەرىستەر بولۋى مۇمكىن:
سالىق پەن تولەمدەر سانى 20 پايىزعا قىسقارادى; سالىق ەسەپتىلىگى كولەمى 30 پايىزعا ازايادى; كورپوراتيۆتى تابىس سالىعىنىڭ نەگىزگى مولشەرلەمەسى 20 پايىز دەڭگەيىندە قالادى; بانكتەر مەن ويىن مەكەمەلەرى ءۇشىن 20 پايىزعا كوتەرىلەدى; وڭدەۋشى ونەركاسىپ ءۇشىن 10 پايىزعا تومەندەتىلەدى; اۋىل شارۋاشىلىعى وندىرۋشىلەرى ءۇشىن 3 پايىز بولادى.بانك ارالىق QR-تولەمدەردىڭ ىسكە قوسىلۋى دا بيىلعا جوسپارلانىپ وتىر. ياعني پايدالانۋشىلار ساۋدا نۇكتەسىندە قاي بانكتىڭ تەرمينالى تۇرعانىنا قاراماستان كەز كەلگەن بانكتىڭ ءموبيلدى قوسىمشاسى ارقىلى QR-تولەمدى جۇزەگە اسىرا الادى. قازىر بۇل جۇمىستى ۇلتتىق تولەم كورپوراتسياسى ەكىنشى دەڭگەيلى بانكتەرمەن بىرلەسە جۇرگىزىپ جاتىر. قىزمەت 2025 جىلدىڭ ءبىرىنشى جارتىسىندا قولجەتىمدى بولماق.
2025–2027 جىلدارعا ارنالعان ۇلتتىق قوردان رەسپۋبليكالىق بيۋدجەتكە كەپىلدەندىرىلگەن ترانسفەرت كولەمى بەكىتىلدى:
2025 جىلى – 2 ترلن تەڭگە; 2026 جىلى – 2 ترلن تەڭگە; 2027 جىلى – 2 ترلن تەڭگە.ۇلتتىق قورعا مۇناي سەكتورى ۇيىمدارىنان تۇسەتىن تۇسىمدەر نەگىزىندە 2025–2027 جىلدارعا ارنالعان مۇنايدىڭ كەسىمدى باعاسى بەلگىلەندى:
2025 جىلى – باررەلىنە 42,3 دوللار; 2026 جىلى – باررەلىنە 41 دوللار; 2027 جىلى – باررەلىنە 39,4 دوللار.1 قاڭتاردان باستاپ «مەملەكەتتىك ساتىپ الۋلار تۋرالى» جاڭا زاڭ كۇشىنە ەنەدى. زاڭ ساتىپ الۋ ۇدەرىسى پروتسەدۋراسىن وڭتايلاندىرۋعا, ساتىپ الىنعان تاۋار, قىزمەت, جۇمىس ساپاسىن ارتتىرۋعا, ساتىپ الۋعا قاتىسۋشىلاردىڭ جاۋاپكەرشىلىگىن كۇشەيتۋگە, باسەكەنى دامىتۋعا باعىتتالعان. زاڭ 4 بلوكتان تۇرادى.