پرەمەر-ءمينيستردىڭ ورىنباسارى باسشىلىق ەتەتىن ۇكىمەتتىك كوميسسيا ماڭعىستاۋ وبلىستىق كوپسالالى اۋرۋحاناسىنا باردى.
ماڭعىستاۋ وبلىسىنىڭ اكىمى نۇرداۋلەت قيلىبايدىڭ مالىمەتىنشە, ۇشاق اپاتى بولعان جەردە 22 جەدەل جاردەم بريگاداسى جانە 6 امو (اپاتتار مەديتسينا ورتالىعى) بريگاداسى جۇمىس ىستەدى. وبلىستىق كوپسالالى اۋرۋحانادا 30 حيرۋرگيالىق جانە تراۆماتولوگيالىق, سونداي-اق 10 رەانيماتسيالىق توسەك-ورىن دايىندالدى.
جالپى, اۋرۋحانالارعا 29 زارداپ شەككەن ادام جەتكىزىلدى. ونىڭ ىشىندە ماڭعىستاۋ وبلىستىق كوپسالالى اۋرۋحاناسىنا 27 ادام ءتۇستى. ولاردىڭ 13-ءى ازەربايجان, 9-ى رەسەي, 3-ەۋى قىرعىزستان ازاماتتارى. ءۇش ادامنىڭ جەكە باسى انىقتالىپ جاتىر. سونداي-اق وبلىستىق بالالار اۋرۋحاناسىندا ەكى كامەلەتكە تولماعان بالا بار.
بارلىق ناۋقاستار تولىق كولەمدە مەديتسينالىق كومەكپەن قامتىلعان.
قانات بوزىمباەۆ جاۋاپتى تۇلعالارعا ساپالى ەمدەۋ مەن ءتيىستى كۇتىمدى قامتاماسىز ەتۋدى تاپسىردى. سونداي-اق اقتاۋعا ەلدىڭ جەتەكشى عىلىمي مەديتسينالىق ورتالىقتارىنان رەانيماتولوگتار, تراۆماتولوگتار, حيرۋرگتەر, كومبۋستيولوگتار جانە باسقا دا جوعارى بىلىكتى ماماندار توبى كەلگەنىن حابارلادى.
ودان كەيىن قانات بوزىمباەۆ ازەربايجاننان كەلگەن ۇكىمەتتىك دەلەگاتسيامەن كەزدەستى. ۆيتسە-پرەمەر توتەنشە جاعدايلار ءمينيسترى كامالەددين گەيداروۆپەن جانە تسيفرلىق دامۋ جانە كولىك ءمينيسترى راشاد ءنابي وعلى نابيوۆپەن كەلىسسوزدەر جۇرگىزدى.
ازەربايجان ۇكىمەتتىك دەلەگاتسياسىنىڭ وكىلدەرى كورسەتىلگەن كومەك ءۇشىن قازاقستان حالقىنا العىس ءبىلدىردى.
ماڭعىستاۋ وبلىسى