بيىل ءماجىلىس 106 زاڭ جوباسىن قاراپ, 37 زاڭدى قابىلدادى. ونىڭ ىشىندە 19 زاڭعا پرەزيدەنت قول قويعان. بۇگىن پارلامەنت جىلدى قورىتىندىلاپ, جۋىردا دەپۋتاتتار وڭىرلەرگە ءىس ساپارعا شىعاتىنى ايتىلدى, دەپ جازادى Egemen.kz.
بيىل مەملەكەت باسشىسىنىڭ قاتىسۋىمەن العاش رەت ءماسليحاتتاردىڭ رەسپۋبليكالىق فورۋمى ءوتتى.
جيىن ماڭىزدى مەملەكەتتىك شەشىمدەر قابىلداۋعا بۇكىل قازاقستان قوعامىن جۇمىلدىرۋدىڭ تاعى ءبىر ءتيىمدى تەتىگىنە اينالدى. اۋقىمدى ءىس-شارا ساياسي پارتيالاردان, ءبىر مانداتتى وكرۋگتەردەن سايلانعان ءماسليحات دەپۋتاتتارىن, سونداي-اق ۇكىمەت مۇشەلەرىن العاش رەت ءبىر الاڭدا باس قوسۋىنا سەپ بولدى. ءماجىلىس توراعاسى ەرلان قوشانوۆ بۇل باستامانى ورتالىقتان وڭىرلەرگە دەيىنگى بيلىكتىڭ بارلىق تارماعى اراسىنداعى جالپىحالىقتىق ديالوگتىڭ جاڭا فورماتى ەكەنىن اتاپ ءوتتى.
«الەۋمەتتىك ادىلدىك ورناتۋعا باعىتتالعان كونستيتۋتسيالىق نورمالار بيىل تولىق ىسكە اسىرىلا باستادى. قابىلداعان زاڭداردىڭ ناتيجەسىن قازىردىڭ وزىندە كورىپ وتىرمىز. «ۇلتتىق قور – بالالارعا» جوباسى مەن قولدى بولعان كاپيتالدى قايتارۋ تۋرالى زاڭ – وسىعان ايقىن دالەل. جىل باسىنان بەرى بالالاردىڭ جيناقتاۋشى شوتتارىنا العاشقى كىرىس ءتۇسىپ, زاڭسىز شىعارىلعان اكتيۆتەرگە ەلدە الەۋمەتتىك نىساندار سالىنا باستادى», دەدى ەرلان قوشانوۆ.
وسى ساياسي ماۋسىمدا قوعامنىڭ دەرتىنە اينالعان تۇيتكىلدى ماسەلەلەردى شەشۋ ءۇشىن ءماجىلىس بىرقاتار زاڭ قابىلدادى. ويىن بيزنەسى تۋرالى زاڭ, سول سياقتى ۆەيپكە تىيىم سالۋ تۋرالى نورمالاردىڭ ىسكە اسىپ وتىرعانىن اتاپ وتكەن ءجون.
ءبىز ەسىرتكىگە قاتىستى قىلمىستار ءۇشىن جازالاۋدىڭ سارالانعان ءتاسىلى جونىندەگى پرەزيدەنتتىڭ تىكەلەي تاپسىرماسىن زاڭنامالىق دەڭگەيدە ورىندادىق.
«زاڭ ارقىلى ءبىز ەسىرتكى ءوندىرۋ مەن تاراتۋ اراسىنداعى جاۋاپكەرشىلىكتىڭ ارا-جىگىن اجىراتتىق. سونىمەن قاتار, ەسىرتكى ءوندىرۋدى ەڭ اۋىر قىلمىستارعا تەڭەستىرىپ, ول ءۇشىن جاۋاپكەرشىلىكتى مەيلىنشە كۇشەيتتىك. وسىلايشا, ەسىرتكى تۇتىنۋ سياقتى بەلەڭ العان دەرتكە دەپۋتاتتار تاراپىنان تاعى ءبىر توسقاۋىل قويىلدى. حالىقارالىق قوعامداستىق وتباسىنداعى جانە تۇرمىستاعى زورلىق-زومبىلىق تۋرالى زاڭعا جوعارى باعا بەردى. بۇل زاڭدى بىرىككەن ۇلتتار ۇيىمى «گەندەرلىك زورلىق-زومبىلىقتى جويۋ جولىندا جاسالعان قادام» دەپ اتاپ, استاناعا العىسىن ءبىلدىردى», دەدى ءماجىلىس توراعاسى.
سەسسيا بارىسىندا ماجىلىسمەندەر جاڭا ەكونوميكالىق ساياساتتىڭ زاڭنامالىق نەگىزىن قالاۋ جۇمىسىن دا باستى نازارعا الىپ, جاڭا بيۋدجەت كودەكسىن قابىلدادى. ولار سول ارقىلى بيۋدجەت قاراجاتىنا دەگەن كوزقاراستى تۇبەگەيلى وزگەرتۋدى كوزدەيدى.
«بيۋدجەت زاڭناماسىنىڭ نەگىزگى قاعيداتى – قاراجاتتى ۇتىمدى, ۇنەمدى يگەرۋ جانە ناقتى قاجەتتىلىككە باعىتتاۋ. دەپۋتاتتاردىڭ ۇسىنىسى بويىنشا مەملەكەتتتىك سەكتور قاراجاتى ەندى تولىعىمەن پارلامەنت باقىلاۋىندا بولادى. سونىمەن بىرگە بيۋدجەت كودەكسى ارقىلى ءبىز ايماقتارعا كوبىرەك دەربەستىك بەرىپ وتىرمىز. بىرقاتار تۇسىمدەردى رەسپۋبليكالىق دەڭگەيدەن جەرگىلىكتى دەڭگەيگە بەرۋ جونىندەگى شارالار دا كوزدەلگەن. سونداي-اق اۋدان اكىمدەرىنىڭ وكىلەتتىگىن كەڭەيتۋ ءۇشىن شاعىن جانە ورتا بيزنەستەن الىناتىن كورپوراتيۆتىك تابىس سالىعى مەن جەكە تابىس سالىعى وبلىستىق دەڭگەيدەن اۋداندىق دەڭگەيگە بەرىلەدى. مۇنىڭ ءبارى كەلەشەكتە جەرگىلىكتى جەرلەردە رەسۋرستاردى ءتيىمدى يگەرۋگە ىقپال ەتەدى», دەدى ەرلان قوشانوۆ.
ءماجىلىس جىلدىڭ سوڭعى جالپى وتىرىسىندا مەملەكەت باسشىسىنىڭ تاپسىرماسىمەن تۇركىستانعا ەرەكشە مارتەبە بەرۋگە باعىتتالعان زاڭدى دا قابىلداپ ۇلگەردى. مۇنداي مارتەبە جەرگىلىكتى ماسەلەلەردى اناعۇرلىم ءتيىمدى شەشۋگە, ينۆەستيتسيا تارتۋعا مۇمكىندىك بەرىپ, ءوڭىر ەكونوميكاسىنىڭ ودان ءارى دامۋىنا سەپتىگىن تيگىزبەك.