الدىن الا مالىمەت بويىنشا, باكۋدەن رەسەيدىڭ گروزنىي قالاسىنا ۇشقان Az Airlines اۋە كومپانياسىنىڭ ۇشاعى اقتاۋ ماڭىندا اپاتقا ۇشىراعان, دەپ حابارلايدى Egemen.kz.
25 جەلتوقساندا كۇندىز باكۋدەن گروزنىيعا ۇشقان ازەربايجان اۋە كومپانياسىنىڭ Embraer E190 جولاۋشىلار ۇشاعى راداردان جوعالىپ كەتكەن. لوكاتورلار ۇشاقتى سوڭعى رەت اقتاۋدىڭ ۇستىنەن ۇشىپ وتكەندە انىقتاعان. الەۋمەتتىك جەلىلەردە ۇشاقتىڭ اپاتقا ۇشىراعان ساتىنەن ۆيدەو تارالىپ جاتىر.
قازاقستاننىڭ توتەنشە جاعدايلار مينيسترلىگىنىڭ مالىمەتىنشە, اپاتتان امان قالعاندار بار.
قازىرگى تاڭدا قازا تاپقاندار مەن زارداپ شەككەندەر تۋرالى اقپارات ناقتىلانىپ جاتىر.
وقيعا ورنىنا ونداعان جەدەل جاردەم كولىگى شىقتى.
اقتاۋ اۋەجايى رەيستەردى قابىلداۋ مەن جونەلتۋدى توقتاتتى. قۇتقارۋ جۇمىستارى جۇرگىزىلىپ جاتىر.
ايتا كەتەيىك, باكۋدەن شىققان ۇشاق گروزنىيداعى تۇمانعا بايلانىستى ماحاچكالاعا, ودان كەيىن اقتاۋعا باعىتتالعان.
رەسەيدىڭ Baza Telegram ارناسى ۇشاقتا 67 جولاۋشى مەن 5 ەكيپاج مۇشەسى بولعانىن حابارلادى. ازەربايجان اۋە كومپانياسى ازىرگە بۇل اقپاراتتى راستاعان جوق.