الماتىدا «Assyltas» قوعامدىق قورىنىڭ جىل قورىتىندىسى شىعارىلىپ, ۇزدىكتەر ماراپاتتالدى. اتالعان قور كەيىنگى جىلدارى قوعامدىق ماڭىزى بار ءتورت سالانى تاڭداپ, حالىقتىڭ داۋىس بەرۋى ءھام قازىلاردىڭ تاڭداۋىمەن جۇيرىكتەردى ىرىكتەۋدى داستۇرگە اينالدىرعان.
بيىلعى ءتورت اتالىم بويىنشا ماراپاتتالعان جەڭىمپازدار اراسىندا «ەگەمەندىك» ەكى ارىپتەسىمىز قاتارىنان قارا ءۇزىپ, وزىق شىقتى.
وسى, 2024 جىلى, «Assyltas» قوعامدىق قورى ءبىلىم, ونەر, سپورت جانە مادەنيەت سالالارىن قولداۋعا 1 ميلليون دوللاردان استام قاراجات جۇمساپتى. بيىل ادەبيەت اتالىمى بويىنشا «اssyltas» ستيپەندياسىنىڭ يەگەرى 2024 جىلى جارىق كورگەن «اعىراپتاعى اتى جوق ادام» كىتابىنىڭ اۆتورى, گازەتىمىزدىڭ ساياسات جانە قۇقىق ءبولىمىنىڭ اعا ءتىلشىسى, جازۋشى قانات ابىلقايىر بولدى. ال جۋرناليستيكا اتالىمىندا گازەتىمىزدىڭ اعا ءتىلشىسى مارجان ءابىش «Assyltas» ستيپەندياسىنىڭ يەگەرى اتاندى. عىلىم مەن سپورت اتالىمدارى بويىنشا نۇرحات جاقيەۆ پەن ابيبا ابۋجاقىنوۆا لايىقتى دەپ تانىلدى. ءار جەڭىمپازعا 1 500 000 تەڭگە كولەمىندەگى ستيپەنديا تابىستالدى.